Juízis
2 Nton, un anju di Jeová subi di Jilgal pa Bokin i el fla: “N tra nhos di Ijitu i N traze nhos pa kel téra ki N jura ma N ta daba nhos gentis grandi. Tanbê, N fla: ‘Nunka N ka ta kebra nha kontratu ki N faze ku nhos. 2 Má anhos, nhos ka debe faze ninhun kontratu ku kes algen di kel téra li i nhos debe kaba ku ses altar.’ Má nhos ka obi ku mi. Pamodi ki nhos faze kel-li? 3 É pamodi kel-li ki tanbê N fla: ‘N ka ta kóre ku es di nhos dianti. Es ta ben bira un armadilha pa nhos i ses deus ta poi nhos ta afasta di mi.’”
4 Kantu kel anju di Jeová fla kes palavra li pa tudu kes israelita, povu kumesa ta txora riju. 5 Pur isu, es txoma kel lugar di Bokin,* i la es oferese sakrifisiu pa Jeová.
6 Kantu Juzué manda povu pa bai ses kaminhu, kada tribu sai pa ba toma kes tiritóriu ki es resebe pa ser ses eransa. 7 Povu kontinua ta sirbi Jeová duránti tudu ténpu di Juzué i duránti tudu ténpu di kes ansion ki kontinua bibu dipôs di Juzué i ki odjaba tudu kes kuza grandi ki Jeová fazeba pa Israel. 8 Dipôs Juzué, fidju di Nun i sérvu di Jeová, móre ku 110 anu. 9 I es intera-l na tiritóriu di se eransa na Timnate-Eres, na zóna di Efrain ki ten montanha, na nórti di monti Gás. 10 Tudu kel jerason di ténpu di Juzué ba diskansa djuntu ku ses gentis grandi.* Dipôs, ben un otu jerason ki ka konxeba Jeová i ki ka sabia kuzê ki dja el fazeba pa Israel.
11 Nton, kes israelita staba ta faze kes kuza ki Jeová ta atxaba ma éra mariadu i es adora Baal.* 12 Asi es bandona Jeová, kel Deus di ses gentis grandi, ki traba es di téra di Ijitu. Es sigi otus deus, kes deus di kes povu na ses vólta. Es inbaxa ses dianti i es ofende Jeová. 13 Es bandona Jeová i es adora Baal i kes imajen di Astorete. 14 Nton, Jeová fika txeu xatiadu ku Israel. Pur isu, el dexa ses inimigu vense-s i toma-s ses kuza, i es ka staba ta konsigi ganha ses inimigu más. 15 Pa kalker lugar ki israelitas ta baba, mô di Jeová staba kóntra es i ta trazeba es disgrasa, sima Jeová dja flaba i sima Jeová dja juraba es. Es staba na un grandi frónta. 16 Pur isu, Jeová ta daba es juís ki ta salvaba es di mô di ses inimigu ki ta tomaba ses kuza.
17 Má, es nega obi ti mésmu ku kes juís. Es adora* otus deus i es inbaxa ses dianti. Es disvia faxi di kel kaminhu ki ses gentis grandi anda na el, ki éra kes ki obi ku kes mandamentu di Jeová. Es ka aji di mésmu manera. 18 Sénpri ki Jeová ta daba es un juís, Jeová ta staba ku kel juís. I timenti kel juís staba bibu, Deus ta salvaba kes israelita di mô di ses inimigu. Jeová ta fazeba kel-li pamodi el ta xintiba péna di es óras ki es ta txoraba pamodi ses inimigu staba ta pô-s ta sufri i ta maltrata-s.
19 Má óras ki kel juís moreba, kes israelita ta torna konportaba más piór di ki ses gentis grandi. Es ta sigiba kes otu deus, es ta sirbiba es i es ta inbaxaba ses dianti. Es ka para di faze kes kuza mariadu i es kontinua temozu. 20 Nton, Jeová fika txeu xatiadu ku Israel i el fla: “Dja ki kel nason li viola nha kontratu ki N faze ku ses gentis grandi i es ka obi ku mi, 21 ami tanbê, N ka ta tra di ses dianti nen mésmu un di kes nason ki Juzué dexa kantu ki el móre. 22 Asi N ta poi Israel na próva pa N odja si es ta anda na kaminhu di Jeová sima ses gentis grandi faze.” 23 Pur isu, Jeová dexa kes nason kontinua ta vive la. El ka kóre ku es lógu i nen el ka intrega-s na mô di Juzué.