Juízis
21 Kes ómi di Israel dja fazeba kel juramentu li na Mispá: “Ninhun di nos ka ta da nos fidju-fémia pa kaza ku un ómi di tribu di Benjamin.” 2 Pur isu, kes israelita bai pa Betel i es xinta la dianti di Deus verdaderu ti noti, ta grita i ta txora txeu. 3 Es staba ta fla: “Ó Jeová, Deus di Israel, pamodi ki kel-li kontise na Israel? Pamodi ki oji debe falta un tribu na Israel?” 4 I na kel otu dia, povu labanta sédu i es faze un altar la pa oferese oférta kemadu i oférta di pas.
5 Nton, povu di Israel fla: “Kal di kes tribu di Israel ki ka bai djunta ku nos dianti di Jeová?” Pamodi dja es fazeba un juramentu sériu ma kenha ki ka parseba dianti di Jeová, na Mispá, tinha ki moreba. 6 Kes israelita fika tristi pamodi kuzê ki kontise ku ses irmon Benjamin. Es fla: “Oji dja kabadu ku un tribu na Israel. 7 Kuzê ki nu debe faze pa ranja mudjer pa kes ómi di Benjamin ki resta, dja ki nu jura pa Jeová ma nu ka ta daba es nos fidju-fémia pa kaza ku es?”
8 Es pergunta: “Entri kes tribu di Israel, ken ki ka bai djunta ku nos dianti di Jeová, na Mispá?” Es odja ma ningen di Jabes-Jiliade ka bai djuntaba ku es na undi ki es tinha ses ténda na Mispá. 9 Kantu ki es konta povu, es odja ma ningen di Jabes-Jiliade ka staba la. 10 Pur isu, kes israelita manda 12 mil ómi más balenti pa Jabes-Jiliade. Es da-s kel órdi li: “Nhos bai i nhos mata ku spada kes algen di Jabes-Jiliade, ti mésmu kes mudjer i kriansa. 11 É kel-li ki nhos debe faze: Nhos debe mata tudu ómi i tanbê tudu mudjer ki dja faze relason seksual ku un ómi.” 12 Na meiu di kes algen di Jabes-Jiliade, es atxa 400 minina vírjen, ki nunka ka fazeba relason seksual ku ninhun ómi. Nton, es leba-s pa undi ki es tinha ténda armadu na Silu, na téra di Kanan.
13 Dipôs, tudu kes israelita ki staba la manda alguns ómi pa ba pidi kes ómi di Benjamin ki staba na rótxa di Rimon, pa faze pas ku es. 14 Nton, kes ómi di Benjamin volta. Es dadu kes mudjer di Jabes-Jiliade ki es ka mata, má es ka atxa mudjer ki ta txigaba pa es tudu. 15 I povu fika ku péna di tribu di Benjamin, pamodi Jeová sipara-l di kes otu tribu di Israel. 16 Kes ansion di povu di Israel fla: “Kuzê ki nu debe faze pa ranja mudjer pa kes ómi ki resta, dja ki tudu kes mudjer di Benjamin matadu?” 17 Es fla: “Kes ómi di Benjamin ki skapa debe kontinua ku ses eransa, asi pa un tribu ka dizaparse di Israel. 18 Má, nu ka ta pode da nos fidju-fémia pa kaza ku kes ómi di Benjamin, pamodi povu faze kel juramentu li: ‘Kenha ki da se fidju-fémia pa kaza ku un ómi di Benjamin ta maldisuadu.’”
19 Nton, es fla: “Tudu anu ten un fésta pa Jeová na Silu, ki ta fika na nórti di Betel i na lésti di kel strada ki ta subi di Betel pa Sikén, na sul di Lebona.” 20 Nton, es da kes ómi di Benjamin kel órdi li: “Nhos bai i nhos fika sukundidu na kes plantason di uva. 21 Óras ki nhos odja kes minina* di Silu ta sai pa badja,* kada un di nhos debe sai di meiu di kes plantason di uva i pega un di kes minina di Silu pa ser nhos mudjer. Dipôs, nhos debe volta pa téra di Benjamin. 22 I si ses pai ô ses irmon ben faze un kexa kóntra nos, nu ta fla-s: ‘Nhos faze-nu es favor pa djuda kes ómi di Benjamin, pamodi nu ka konsigi ranja un mudjer pa kada un di es na géra i tanbê nhos ka ta pode daba es un mudjer pamodi nhos ta biraba kulpadu.’”
23 Nton, kes ómi di Benjamin faze si, i kada un di es leba un di kes mudjer ki staba ta badja pa es kaza ku el. Dipôs, es volta pa kel téra ki es erda. Es torna faze ses sidadi i es mora na es.
24 I kes israelita ba ses kaminhu, kada un pa se tribu i pa se família. Es sai di la i kada un di es bai pa kel téra ki es erda.
25 Na kel ténpu, ka tinha rei na Israel. Kada un ta fazeba kel ki el ta atxaba ma éra dretu.