Primeru livru di Samuel
15 Dipôs, Samuel fla Saul: “Jeová manda-m pa N skodje-u pa bu ser rei di se povu Israel. Gósi, obi kuzê ki Jeová ten pa fla-u. 2 É kel-li ki Jeová di izérsitu fla: ‘N ta ben justa kónta ku kes amalekita pamodi kuzê ki es faze kóntra Israel. Es ataka Israel na kaminhu dipôs ki es sai di Ijitu. 3 Pur isu, ba luta kóntra kes amalekita, kaba ku es i ku tudu kuza ki es ten. Ka bu ten péna di ningen. Mata ómi ku mudjer, mininu ku bebé, boi ku ovelha i kamelu ku buru.’” 4 Nton, Saul djunta kes trópa ki staba ku el na Telain i el konta-s: staba la 200 mil trópa* di kes otu tribu di Israel i 10 mil ómi di Judá.
5 Saul bai ti sidadi di Amaleki i el dexa se trópas sukundi na vali pa ataka kes amalekita. 6 Nton, Saul fla kes kineu: “Nhos sai di meiu di kes amalekita, pa N ka mata nhos djuntu ku es, pamodi nhos mostra amor lial pa tudu povu di Israel kantu es sai di Ijitu.” Pur isu, kes kineu sai di meiu di kes amalekita. 7 Dipôs, Saul mata kes amalekita désdi Avilá ti Sur, ki ta fika pértu di Ijitu. 8 El mata tudu povu ku spada, má el dexa Agagi rei di Amaleki bibu. 9 Saul i kes trópa tevi péna di Agagi i es ka mata kes midjór ovelha ku vaka, kes animal más gordu i tanbê kes karneru i es ka distrui tudu kuza di valor. Es ka krê kababa ku es. Má tudu kes otu kuza ki ka tinha valor i ki es ka kreba, es distrui-s.
10 Dipôs, Jeová fla Samuel: 11 “N sta tristi* pamodi N skodje Saul pa ser rei. El dexa di sigi-m i el ka sta obi ku mi.” Samuel fika txeu tristi i el pasa noti interu ta faze súplika pa Jeová. 12 Kantu Samuel labanta sédu palmanhan pa ba atxa Saul, es fla-l: “Saul dja ba pa karmelu, i el poi un pédra grandi di pé pa es lenbra di el. Dipôs, el dixi pa Jilgal.” 13 Kantu Samuel txiga na Saul, Saul fla-l: “Pa Jeová abensua-u. N faze tudu kel ki Jeová manda-m.” 14 Má Samuel fla-l: “Nton pamodi ki N sta ta obi barudju di ovelhas ku vaka?” 15 Saul responde: “Es éra di kes amalekita. Povu ka mata* kes midjór ovelha ku vaka pa es pode sakrifika-s pa Jeová, bu Deus. Má kes ki resta nu distrui-s.” 16 Nton, Samuel fla Saul: “Dja sta bon! Dexa-m fla-u kuzê ki Jeová fla-m onti di noti.” Saul fla: “Bu pode fla!”
17 Samuel fla-l: “Kantu Jeová skodje-u pa bu ser xéfi di kes tribu di Israel i pa bu ser rei di Israel, bu ka ta atxaba ma bu ka éra ningen? 18 Dipôs, Jeová da-u un trabadju pa bu faze i el fla-u: ‘Kaba ku kes amalekita pekador. Luta kóntra es ti ki bu kaba ku tudu es.’ 19 Nton, pamodi ki bu ka obi ku vós di Jeová? Envês di kel-li, bu mostra ganánsia i bu toma tudu kes kuza di bus inimigu. Bu faze un kuza ki Jeová ta atxa ma é mariadu!”
20 Má, Saul fla Samuel: “Má N obi ku vós di Jeová! N ba faze kel trabadju ki Jeová manda-m, N traze Agagi, rei di Amaleki, i N mata kes amalekita. 21 Má kes trópa toma kes midjór ovelha i vaka ki éra pa distrui i es ben ku es pa oferese sakrifisiu pa Jeová, bu Deus, na Jilgal.”
22 Nton, Samuel fla: “Kuzê ki ta dexa Jeová más kontenti? Oférta kemadu ku sakrifisiu ô pa algen obi ku vós di Jeová? Odja! Obidese é midjór di ki faze sakrifisiu i sigi se orientason é midjór ki oferese gordura di karneru, 23 pamodi rabela é gravi sima pekadu di dibinhason, i aji ku trivimentu* é sima uza puder di majia i faze idolatria.* Dja ki bu ka obi ku Jeová, el ka krê pa bu ser rei más.”
24 Saul fla Samuel: “N peka, N ka obi ku órdi di Jeová i N ka sigi kes orientason ki nho da-m, pamodi N fika ku medu di povu i N faze kuzê ki es fla. 25 Má favor, púrdua nha pekadu, i bai ku mi pa N pode inbaxa dianti di Jeová.” 26 Má Samuel fla Saul: “N ka sta bai ku bo pamodi bu ka obi ku palavra di Jeová, i Jeová ka krê pa bu kontinua ta ser rei di Israel.” 27 Kantu Samuel vira pa el bai, Saul pega Samuel na pónta di se ropa sen manga i el ratxa. 28 Pur isu, Samuel fla: “Sima es ropa dja ratxa, oji Jeová dja tra reinu di Israel di bu mô i el ta ben da-l pa un algen midjór di ki bo. 29 Tanbê, kel Deus Más Grandi ki ten, ki é Deus di Israel, ka ta dexa di kunpri se palavra nen el ka ta muda di ideia,* pamodi el é ka un ómi pa muda di ideia.”
30 Saul fla: “N peka. Má favor, ka bu pô-m ta pasa vergónha dianti di ansions di nha povu i dianti di Israel. Bai ku mi i N ta inbaxa dianti di Jeová, bu Deus.” 31 Nton, Samuel bai ku Saul, i Saul inbaxa dianti di Jeová. 32 I Samuel fla: “Nhos traze Agagi rei di Amaleki.” Má Agagi bai na el ku reseiu* pamodi el staba ta pensa: ‘Di serteza N ka sta kóre risku di* móre más.’ 33 Má, Samuel fla-l: “Sima bu spada dexa txeu mudjer sen fidju, bu mai tanbê ta ben fika sen fidju.” Dipôs, Samuel korta Agagi padás-padás dianti di Jeová na Jilgal.
34 Dipôs Samuel bai pa Ramá, i Saul subi pa se kaza na Jibeá di Saul. 35 Samuel staba txeu tristi pamodi Saul, pur isu el ka odja-l más ti dia ki el móre. I Jeová fika tristi pamodi el skodje Saul pa ser rei di Israel.