Salmu
Pa diretor di múzika. Na ton di Jedutun.* Salmu di Davidi.
62 É sô na Deus ki N ta spera* kaladu.
Nha salvason ta ben di el.
2 Sô el ki é nha rótxa i nha salvason, nha proteson suguru.*
Nunka el ka ta dexa-m tropesa i kai.
3 Ti ki ténpu nhos ta kontinua ta ataka un ómi pa mata-l?
Nhos tudu é prigozu sima un paredi ki sta ta kai, sima un paredi di pédra ki sta kuazi ta ronba.*
4 Es ta faze planu pa tra-l di se puzison altu* i bota-l na txon.
Es gosta di konta mintira.
Es ta abênsua ku ses bóka, má es ta maldísua na ses korason. (Selá)
5 É sô na Deus ki N ta spera kaladu
Pamodi nha speransa ta ben di el.
6 Sô el ki é nha rótxa i nha salvason, nha proteson suguru.
Nunka el ka ta dexa-m kai.
7 Nha salvason i nha glória ta dipende di Deus.
Deus é nha rótxa fórti, el é nha proteson.
8 Ó nha povu, nhos kunfia sénpri na el.
Nhos konta-l tudu kel ki sta na nhos korason.
Deus é un proteson pa nos. (Selá)
9 Kes fidju di ómi é sô un folgu,
Kes fidju di ómi é sô iluzon.
Óras ki es podu djuntu na balansa, es é más lébi di ki un folgu.
10 Ka nhos kunfia na kes ki ta toma kuzas di algen aforsa
Nen ka nhos pensa na furta pa ganha algun kuza.
Si nhos rikéza bira txeu, ka nhos poi nhos korason na el.
11 Deus pâpia un bês, i dôs bês N obi-l ta fla:
Forsa é di Deus.
12 Amor lial tanbê é di bo, ó Jeová,
Pamodi bu ta paga kada algen di akordu ku kel ki el merese.