Jó
6 Nton, Jó responde:
2 “N ta gostaba pa tudu nha disgostu pezadu,
I pa el podu na balansa djuntu ku nha disgrasa!
3 Pamodi gósi, el é más pizadu di ki areia di mar.
É pur isu ki N sta ta pâpia sen pensa.*
4 Pamodi Deus Tudu-Poderozu dja da-m ku flexa,
I nha spritu sta ta bebe se venénu.
Deus sta ta ataka-m, i N sta xeiu di medu.
5 Buru brabu ta zura óras ki el tene padja?
Ô toru ta inbera* óras ki el tene padja?
6 Un kumida ki ka ten gostu ta kumedu sen sal?
Ô é sábi kume seiva di un planta* ki ka ten gostu?
7 N* nega toka na kes kuza li.
Es é sima kumida stragadu.
8 N ta gostaba pa N fazedu kel ki N pidi
I pa Deus daba mi kel ki N kreba!
9 Pa Deus staba dispostu na pilaba mi,
I pa el stendeba se mô i kababa ku mi!
10 Pamodi ti kel-la ta konsolaba mi.
N ta saltaba di alegria sikrê ku dór ki ka ta kaba,
Pamodi N ka nega kes palavra di Kel ki é santu.
11 N tene forsa pa N kontinua ta spera?
Kuzê ki sta ta spera-m na futuru pa N kontinua ta vive?
12 Ami é fórti sima un rótxa?
Nha karni é di kóbri?
13 Ten algun manera pa N djuda nha kabésa,
Dja ki N ka tene ningen pa djuda-m?
14 Ken ki nega amor lial pa se prósimu
Ta bandona kel grandi ruspetu pa Tudu-Poderozu.
15 Nhas própi irmon ka sta di kunfiansa,
Sima un riu di névi ki derete, ki dipôs ta seka.
16 Es ta fika sukuru pamodi jélu,
I kel névi ki derete ta sukundi na es.
17 Má na se ténpu, es ta fika sen agu i es ta dizaparse.
Óras ki kalor ben, es ta seka.
18 Ses kaminhu ta disviadu,
Es ta txiga na dizértu i es ta dizaparse.
20 Es ta fika ku vergónha pamodi ses kunfiansa foi atoa.
Es ta txiga la sô pa es fika diziludidu.
21 Pamodi é si ki nhos bira pa mi.
Nhos odja ma nha disgrasa é orível i nhos fika ku medu.
22 Pur akazu N fla: ‘Nhos da-m algun kuza’,
Ô N pidi pa nhos da-m un prezenti di nhos rikéza?
23 N pidi pa N resgatadu di mô di un inimigu
Ô pa N salvadu* di kes algen ki ta maltrata-m?
24 Nhos fla-m kuzê ki N faze i N ta fika kaladu.
Nhos djuda-m intende nha éru.
25 Palavras sinseru ka ta traze dór!
Má pa kuzê ki nhos koreson ta sirbi?
26 Nhos sta ta djunta kabésa kóntra mi pa koriji nhas palavra?
Nhos sta ta koriji palavras di un ómi dizusperadu ki béntu ta leba?
27 Anhos tanbê, nhos ta botaba sórti riba di un órfon
I nhos ta bendeba* nhos própi amigu!
28 Nton gósi, nhos volta i nhos djobe pa mi,
Pamodi N ka ta konta mintira na nhos róstu.
29 Nhos torna pensa favor, ka nhos julga-m mariadu.
Nhos torna pensa, pamodi nha justisa inda sta dretu.
30 Ten algun injustisa na nha língua?
N ka ta pode xinti si algun kuza sta mariadu?