Jó

 2 Pamodi rankor ta ben mata ken ki é tolu,

I invéja ta ben poi ken ki é inosenti ta móre.

 3 N odja algen tolu ta kria raís,

Má dirapenti, kel lugar undi ki el ta mora maldisuadu.

 4 Ses fidju sta lonji di suguransa,

I es ta umilhadu* na porton di sidadi, sen ningen pa salva-s.

 5 Kes ki tene fómi ta kume kel ki kel tolu ta kodje,

Es ta tra-l ti mésmu di meiu di spinhu,

I ses kuza ta tomadu na un armadilha.

 6 Pamodi frónta ka ta ben di téra,

I disgrasa ka ta nase di txon.

 7 Pamodi ómi nase pa disgrasa,

Sima faíska ta bua pa riba.

 8 Má si éra mi, N ta pidiba Deus pa djuda-m,

I N ta aprizentaba nha kazu pa Deus,

 9 Pa kel ki faze kuzas grandi, ki ka ta da pa intende

I kuzas spetakular ki ka ta da pa konta.

10 El ta da téra txuba

I el ta manda agu pa kai riba di kes kanpu.

11 El ta labanta kes umildi

I el ta salva kes dizanimadu.

12 El ta straga planus di kes algen spértu,

Asi pa trabadju di ses mô ka da bons rezultadu.

13 El ta pega kes ki ten sabedoria na ses própi armadilha,

Asi el ta kaba ku planus di kes algen spértu.

14 Es ta inkontra ku sukuru duránti dia,

I es ta anda ta palpa na meiu-dia sima si é di noti.

15 Deus ta salva-s di kes algen ki tene spada na ses bóka,

I el ta salva póbri di mô di kes fórti.

16 Pur isu, ten speransa pa ken ki é umildi,

Má bóka di kes algen injustu ta kaladu.

17 Odja! Filís é kel ómi ki Deus ta koriji.

Pur isu, ka bu nega disiplina di Tudu-Poderozu!

18 Pamodi Deus ta poi algen ta ten dór, má el ta kura frida.

El ta kebra padás-padás, má el ta kura ku se própi mô.

19 El ta ben salva-u di 6 disgrasa,

Nen kel sétimu ka ta ben prujudika-u.

20 Na ténpu di fómi, el ta ben libra-u di mórti,

I na ténpu di géra, el ta ben libra-u di puder di spada.

21 Bu ta ben protejedu kóntra kel língua ki ta sota sima xikóti,

I bu ka ta ten medu óras ki distruison ben.

22 Bu ta ben ri di distruison i di fómi,

I bu ka ta ben ten medu di kes animal selvajen di téra.

23 Pamodi kes pédra di kanpu ka ta ben prujudika-u,*

I kes animal selvajen ta ben vive na pas ku bo.

24 Bu ta ben sabe ma bu ténda sta suguru,*

I nada ka ta ba falta óras ki bu bai djobe bu lugar di pastora animal.

25 Bu ta ben fika kontenti ku txeu fidju,

I bus disendenti ta ben ser txeu sima padja na téra.

26 Inda bu ta ben sta fórti óras ki bu bai pa sipultura,

Sima fexu di serial ki djuntadu na ténpu di kodjéta.