Salmu
Pa diretor di múzika. Salmu di Davidi, sérvu di Jeová. El kanta kel kántiku li pa Jeová, na dia ki Jeová libra-l di mô di tudu ses inimigu i di mô di Saul. El fla:
18 Ó Jeová, N ta ama-u, abo é nha forsa.
2 Jeová é nha rótxa i nha proteson. El é nha salvador.
Nha Deus é nha rótxa, na undi ki N ta djobe proteson.
El é nha skudu i nha salvador* poderozu. El é nha proteson suguru.*
3 N ta txoma Jeová, ki merese lovor,
I N ta salvadu di nhas inimigu.
4 Kes kórda di mórti serka-m.
Medu toma kónta di mi pamodi un monti ómi mau serka-m sima txeia.
5 Kes kórda di Sipultura* inrola na mi,
Mórti poi un armadilha na nha frenti.
6 Na nha sufrimentu, N txoma Jeová,
N kontinua ta grita pa nha Deus djuda-m.
La di se ténplu el obi nha vós,
I nha gritu di ajuda txiga na se obidu.
7 Nton, téra kumesa ta sakudi i ta treme.
Kes alisérsi di monti fika ta balansa
I es sakudi pamodi el fika xatiadu.
8 Fumu staba ta sai di se narís
I un lumi fórti staba ta sai di se bóka.
El staba ta kuspi braza kenti.
9 El poi séu ta inbaxa i el dixi,
I staba núven sukuru dibaxu di se pé.
10 El ben ta bua, montadu na un kerubin.
El ben faxi na aza di un spritu.*
11 Nton, el kubri ku sukuru.
Na tudu se vólta tinha agu sukuru,
I núven xeiu di agu sima un ténda.
12 Di kel lus ki staba se dianti,
Kai granizu i braza kenti di núven.
13 Nton, Jeová kumesa ta pâpia la di séu sima strubada.
Kel Más Grandi poi se vós ta obidu
I pédra di granizu ku braza kenti kai di séu.
14 El da ku se flexa i el spadja-s,
El manda se relánpagu i es fika dizorientadu.
15 Fundu di riu* fika ta parse klaru.
Ó Jeová, kes alisérsi di téra fika ta parse kantu bu mostra bu raiba,
Pamodi béntu fórti sai di bu narís.
16 La di altu el longa mô,
El pega-m i el tra-m di kes agu na lugar fundu.
17 El salva-m di nha inimigu ki é fórti,
Di kes ki ta odiaba mi i ki éra más fórti di ki mi.
18 Es ataka-m na dia di nha disgrasa,
Má Jeová djuda-m.
19 El leba-m pa un lugar suguru,*
El libra-m pamodi el staba kontenti ku mi.
20 Jeová ta rekonpensa-m di akordu ku nha justisa;
El ta paga-m di akordu ku inosensia* di nha mô.
21 Pamodi sénpri N sigi kaminhus di Jeová,
I N ka faze pekadu di bandona nha Deus.
22 N ta pensa sénpri na tudu ses mandamentu,
N ka ta iginora ses lei.
23 N sta disididu na mante sen kulpa se dianti,
I N ta toma kuidadu pa N ka faze ninhun éru.
24 Pa Jeová paga-m di akordu ku nha justisa,
Di akordu ku inosensia di nha mô se dianti.
25 Kel algen ki é lial, bu ta trata-l ku lialdadi.
Kel ómi sen kulpa, bu ta trata-l di manera ki bu ta fika sen kulpa tanbê.
26 Bo é puru ku kel algen ki é puru,
Má bu ta ingana kes algen ki ta faze kuzas mariadu.
28 Pamodi é bo ki ta sende nha lánpida, ó Jeová,
Nha Deus ki ta límia nha sukuru.
29 Ku bu ajuda, N ta pode ataka un grupu di bandidu.
Ku forsa di Deus N ta pode subi un muralha.
30 Kaminhu di kel Deus verdaderu é perfeitu,
Palavra di Jeová é puru.*
El é un skudu pa tudu kes ki ta djobe proteson na el.
31 Pamodi ken ki é Deus alén di Jeová?
I ken ki é rótxa si é ka nos Deus?
32 Kel Deus verdaderu é kel ki ta da-m forsa,
El ta bira nha kaminhu perfeitu.
33 El ta poi nha pé ta bira sima di un viadu,
I el ta pô-m ta fika di pé na kes lugar altu.
34 El ta trena nha mô pa géra,
Nhas brasu pode dobra un arku* di kóbri.
36 Bu ta bira nha kaminhu más largu pa N anda na el.
Nha pé* ka ta skorega.
37 N ta pirsigi nhas inimigu i N ta pega-s.
N ka ta volta timenti N ka kaba ku es.
38 N ta kaba ku es, asi es ka ta pode labanta más.
Es ta kai i N ta poi nha pé riba di es.
39 Bu ta da-m forsa pa géra.
Bu ta poi nhas inimigu ta kai nha dianti.
40 Bu ta poi nhas inimigu ta fuji di mi*
I N ta kaba ku kes ki ta odia-m.
41 Es ta grita pa ajuda, má ka ta ten algen pa salva-s.
Ti mésmu es ta pidi Jeová pa djuda-s, má el ka ta responde-s.
42 N ta ben mui-s ti ki es fika finu sima puera ki ta bai na béntu,
N ta ben bota-s fóra sima lama na rua.
43 Bu ta salva-m di kes krítika di povu.
Bu ta skodje-m pa N ser xéfi di nasons,
I un povu ki N ka konxe ta ben sirbi-m.
44 Sô di obi ta papiadu di mi, es ta obi ku mi;
Kes stranjeru ta ben inbaxa nha dianti xeiu di medu.
45 Kes stranjeru ta perde koraji*
I es ta sai ta treme di ses lugar di proteson.
46 Jeová é un Deus bibu! Pa nha Rótxa lovadu!
Pa Deus di nha salvason dadu glória.
47 Kel Deus verdaderu ta vinga pa mi.
El ta poi povus dibaxu di nha autoridadi.
48 El ta salva-m di nhas inimigu ki sta ku raiba.
Bu ta pô-m la na altura, lonji di kes ki ta ataka-m.
Bu ta salva-m di ómi violéntu.
49 Ó Jeová, é pur isu ki N ta ben da-u glória djuntu ku pesoas di nason,
I N ta ben kanta lovor* pa bu nómi.