Salmu
Pa diretor di múzika. Salmu di Davidi, sérvu di Jeová.
36 Pekadu ta gia korason di algen mau.
El ka ten ruspetu pa Deus.
2 Pamodi el ta xinti ma el é txeu inportanti
Ki nen el ka ta konsigi odja i nen ôdia se pekadu.
3 Palavra di se bóka ta mágua i ta ingana algen.
El ka ta intende modi ki el ta faze kel ki é dretu.
4 Ti mésmu riba di se kama el ta faze planu pa faze maldadi.
El skodje un kaminhu ki é ka dretu,
I el ka ta nega faze kuzas mariadu.
5 Ó Jeová, bu amor lial ta txiga ti séu,
Bu lialdadi ta txiga na núvens.
6 Bu justisa é sima kes montanha grandi.*
Bus julgamentu é sima txeu agu na un lugar fundu.
Ó Jeová, bu ta proteje* ómi ku animal.
7 Ó Deus, bu amor lial ten txeu valor!
Fidjus di ómi ta djobe proteson na sónbra di bus aza.
8 Es ta bebe kes midjór kuza di bu kaza, ti ki es farta,
I bu ta dexa-s bebe na bu riu di bondadi.
9 Abo é fonti di vida.
Através di bu lus nu ta pode odja lus.
10 Kontinua ta mostra bu amor lial pa kes algen ki konxe-u,
I bu justisa pa kes algen ki ten un korason sinseru.
11 Ka bu dexa pé di kes algen orgulhozu piza-m
Nen mô di kes algen mau kóre ku mi.
12 Odja undi ki kes algen mau dja kai.
Es podu ta kai i es ka ta konsigi labanta más.