Jó

2 Dipôs di kel-li, txiga kel dia ki kes fidju di Deus verdaderu* entra pa fika dianti di Jeová, i Satanás tanbê entra djuntu ku es pa aprizenta dianti di Jeová.

2 Nton, Jeová pergunta Satanás: “Di undi ki bu ben?” Satanás responde Jeová: “N staba ta da vólta na téra i ta anda na el.” 3 I Jeová fla Satanás: “Bu sta ku odju* na nha sérvu Jó? Ka ten ningen na téra ki é sima el. El é un ómi rétu i justu, ki ten grandi ruspetu pa Deus i el ka ta faze kuzas mariadu. Inda el sta kontinua lial, enbóra bu sta tenta pô-m kóntra el pa N distrui-l* sen ninhun motivu.” 4 Má Satanás fla Jeová: “Péli pa péli. Un ómi ta da tudu kuza ki el ten pa se vida.* 5 Má gósi, labanta bu mô i mexe na se osu i na se karni, i di serteza el ta maldisua-u na bu própi róstu.”

6 Nton, Jeová fla Satanás: “Odja! El sta na bu mô!* Má sô ka bu tra-l se vida!” 7 Nton, Satanás sai di dianti* di Jeová i el ataka Jó ku frunku ki ta da txeu dór,* di sóla di se pé ti riba di se kabésa. 8 I Jó panha un padás di vazu di baru kebradu pa raspa ku el, i el fika xintadu na meiu di sinza.

9 Dipôs, se mudjer fla-l: “Inda bu sta ta mante bu lialdadi? Maldísua Deus i móre!” 10 Má el responde-l: “Bu sta ta pâpia sima un mudjer ki ka ten juís. Nu debe seta sô kes kuza dretu ki Deus verdaderu ta da-nu i ka seta tanbê kes kuza mariadu?” Sikrê tudu kel-li kontise, Jó ka peka ku se bóka.

11 Kantu kes três amigu di Jó, Elifás, kel temanita, Bildade, kel suíta, i Zofar, kel namatita, fika ta sabe di tudu kes disgrasa ki kontise ku el, es konbina pa bai inkontra ku kunpanheru. Pur isu, es sai di ses lugar i es bai konsola Jó i mostra-l ma es ta preokupaba ku el. 12 Kantu es odja-l di lonji, es ka rekonhese-l. Es kumesa ta txora ku vós altu, ta ratxa ses ropa i ta bota téra pa altura i riba di ses kabésa. 13 Nton, es xinta ku el na txon duránti 7 dia i 7 noti. Ninhun di es ka fla ninhun palavra, pamodi es odja ma se dór éra grandi dimás.