Jó
3 É dipôs di kel-li ki Jó kumesa ta pâpia i ta maldísua kel dia ki el nase.* 2 Jó fla:
3 “Pa kel dia ki N nase dizaparse,
I pa dizaparse tanbê kel noti ki un algen fla: ‘Un mininu dja nase!’
4 Pa kel dia bira sukuru.
Pa Deus ki sta la di riba ka leba en kónta kel dia.
Pa ninhun lus ka límia riba di el.
5 Pa kel sukuru más fundu toma-l.
Pa un núven di txuba para riba di el.
Pa kel ki ta bira dia sukuru, pô-l ta fika ku txeu medu.
6 Pa kel noti, fika sukuru dimás.
Pa el ka fika kontenti na kes dia di anu,
I pa el ka podu na ninhun di kes mês.
7 Sin, pa kel noti bira vaziu,
I pa ka obidu ninhun gritu di alegria na el.
8 Pa kes ki ta maldísua dia maldisua-l,
Kes ki ta pode korda Leviatan.*
9 Pa kes stréla di se madrugada bira sukuru.
Pa el spera atoa pa lus di dia,
I pa kel noti ka odja kel lus di sol óras ki ta manxe.
10 Pamodi kel noti ka fitxa pórta di bariga di nha mai,
Nen el ka sukundi disgrasa di nhas odju.
11 Pamodi ki N ka móre kantu N nase?
Pamodi ki N ka móre kantu N sai di bariga di nha mai?
12 Pamodi ki tevi brasu pa resebe-m
I petu pa da-m mama?
13 Pamodi gósi N ta staba detadu trankuilu,
N ta staba ta durmi i ta diskansa
14 Djuntu ku kes rei di téra i ses konsedjeru,
Ki faze pa es kes lugar ki gósi sta distruídu,*
15 Ô djuntu ku kes prínsipi ki tinha oru,
I ki ses kaza staba xeiu di prata.
16 Pamodi ki nha mai ka tevi abortu,
Sima kes mininu ki nunka ka odja lus?
17 Na mórti, ti kes algen mau ta xinti pas.
La, kes ki sta kansadu dimás ta diskansa.
18 La, kes prizioneru ta sta djuntu na pas.
Es ka ta obi vós di kel ki ta obriga-s trabadja.
19 La, pikinoti ku grandi é kel mê,
I skravu sta livri di se dónu.
20 Pamodi ki Deus ta dexa kenha ki sta sufri kontinua bibu*
I el ta da vida pa kes ki sta disgostadu?*
21 Pamodi ki es ta dizeja móre, má mórti ka ta ben?
Es ta djobe-l más di ki kes tizoru ki sta sukundidu.
22 Es ta fika txeu kontenti,
Es ta fika filís óras ki es atxa sipultura.
23 Pamodi ki Deus ta dexa un algen ki sta sen rumu kontinua ta vive,
Kel ki Deus serka di tudu ladu?
24 Pamodi envês di N kume, N ta suspira,
I nhas lágua sta ta baza sima agu.
25 Pamodi kel kuza ki N tinha txeu medu di el, dja ben pa riba di mi,
I kel ki N tinha medu di el, dja kontise ku mi.
26 N ka ten pas, nen soségu, nen diskansu.
Disgrasa ka sta para di ben.”