Jó
27 Jó kontinua ta faze se diskursu.* El fla:
2 “N ta jura pa kel Deus bibu, ki nega-m justisa,
Pa kel Tudu-Poderozu, ki dexa-m disgostadu,*
3 Ma timenti N sta ku folgu
I kel spritu ki ta ben di Deus sta na nha narís,
4 Nha bóka ka ta ben pâpia injustisa,
Nen nha língua ka ta ben pâpia mintira!
5 Nunka N ka ta flaba ma nhos é justu!
Ti N móre, N ta mante* nha lialdadi!
6 N ta kontinua ta ser un ómi rétu i N ta kontinua ta faze kel ki é dretu.
Timenti N sta bibu, nha korason ka ta ben kondena-m.*
7 Pa nha inimigu kastigadu sima kes algen mau,
I pa kes ki ta ataka-m kastigadu sima kes algen injustu.
8 Ki speransa ten pa algen mau óras ki el distruídu?
Ki speransa ten pa el óras ki Deus tra-l se vida?
9 Deus ta ben obi se pididu di ajuda
Óras ki frónta txiga na el?
10 El ta atxa ma Tudu-Poderozu é se fonti di alegria?
El ta faze orason pa Deus tudu óra?
11 N ta ben inxina nhos sobri puder* di Deus.
N ka ta ben sukundi nada sobri Tudu-Poderozu.
12 Si nhos tudu tevi vizon,
Pamodi ki nhos sta ta pâpia kuzas sen sentidu?
13 É kel-li ki Deus tene guardadu pa kes algen mau,
Kel eransa ki Tudu-Poderozu ta ben da-s:
14 Si ses fidju bira txeu, spada ta ben mata-s,
I ses disendenti ka ta ben ten kumida ki ta txiga.
15 Kes ki skapa ta ben interadu pamodi praga,
I ses viúva ka ta ben txora-s.
16 Sikrê el djunta prata sima téra
I el djunta ropa finu sima baru,
17 Sikrê el djunta-s,
É algen justu ki ta ben uza-s,
I é algen inosenti ki ta ben dividi se prata.
18 Kaza ki el ta faze é frájil sima kaza di un bitxu,
Sima un baraka ki un guarda faze pa el guarda kanpu.
19 El ta ba deta riku, má óras ki el labanta, ka ta ten nada.*
Ka ta ten nada pa kodje na se kanpu.
20 Medu ta panha-l sima un txeia.
Di noti, un tenporal ta leba-l.
21 Béntu lésti ta ben leba-l pa lonji i el ta dizaparse.
El ta ben rinka-l di se lugar.
22 El ta ben riba di el sen konpaxon,
Timenti el ta tenta dizusperadu skapa di se forsa.
23 El ta da palmu kóntra el,
I la di undi ki el sta, el ta zibia-l.*