Primera di Juan

4 Nhas irmon ki N krê txeu, ka nhos kridita na tudu mensajen,* má nhos sta disididu na djobe si kes mensajen* ben di Deus, pamodi dja parse txeu proféta falsu na mundu.

2 É di kel manera li ki nhos pode sabe si kel mensajen é di Deus: tudu mensajen ki ta rekonhese ma Jizus Kristu ben na karni, ta ben di Deus. 3 Má tudu mensajen ki ka ta rekonhese Jizus ka ta ben di Deus. Tanbê, kel-li é kel mensajen di antikristu* ki nhos obi ma ta binha i ki gósi dja sta na mundu.

4 Nhas fidju, nhos ben di Deus i nhos vense kes proféta falsu, pamodi kel ki sta unidu ku nhos é más grandi di ki kel ki sta unidu ku mundu. 5 Es ben di mundu. É pur isu ki es ta pâpia di kes kuza ki ben di mundu i mundu ta obi-s. 6 Nu ben di Deus. Ken ki konxe Deus ta obi-nu. Ken ki ka ben di Deus ka ta obi-nu. Di kel manera li nu ta sabe kal ki é mensajen di verdadi i kal ki é mensajen di mintira.

7 Nhas irmon ki N krê txeu, nu kontinua ta ama kunpanheru, pamodi amor ben di Deus, i tudu kenha ki ta ama nase di Deus i el konxe Deus. 8 Ken ki ka ta ama ka konxe Deus, pamodi Deus é amor. 9 Através di kel-li Deus mostra se amor pa nos: Deus manda se úniku Fidju* pa mundu pa nu pode ganha vida através di el. 10 Amor é kel-li: é ka pamodi nu ama Deus, má é el ki ama-nu i el manda se Fidju pa ser un sakrifisiu pa nu faze pas ku el pamodi nos pekadu.*

11 Nhas irmon ki N krê txeu, nton si é si ki Deus ama-nu, nos tanbê nu ten obrigason di ama kunpanheru. 12 Ningen nunka ka odja Deus. Si nu kontinua ta ama kunpanheru, Deus ta kontinua ku nos i se amor ta bira perfeitu na nos. 13 Através di kel-li nu ta sabe ma nu ta kontinua unidu ku el i el unidu ku nos, pamodi el da-nu se spritu. 14 Alén di kel-li, nos mê nu odja i nu sta ta da tistimunhu ma nos Pai manda se Fidju pa ser salvador di mundu. 15 Ken ki ta rekonhese ma Jizus é Fidju di Deus, Deus ta kontinua unidu ku el i el unidu ku Deus. 16 I nu konxe amor ki Deus ten pa nos i nu ta kridita na es amor.

Deus é amor, i ken ki ta kontinua na amor ta kontinua unidu ku Deus i Deus ta kontinua unidu ku el. 17 Di kel manera li amor bira perfeitu na nos, asi pa nu pode pâpia ku kunfiansa* na dia di julgamentu, pamodi sima el* é, é si tanbê ki nos é na es mundu. 18 Na amor ka ten medu, má amor perfeitu ta kóre ku medu,* pamodi medu ta limita-nu. Na verdadi, ken ki ten medu se amor é ka perfeitu. 19 Nu ta ama, pamodi el ama-nu primeru.

20 Si un algen fla: “N ta ama Deus”, má simé el ta ôdia se irmon, el é un mintirozu. Pamodi ken ki ka ta ama se irmon ki el ta odja, ka ta pode ama Deus ki el ka ta odja. 21 I nu resebe kel mandamentu li di el: kel ki ta ama Deus tanbê debe ama se irmon.