Salmu
104 N* ta lova Jeová.
Ó Jeová, nha Deus, abo é grandi dimás.
Bu sta bistidu di glória* i beléza.
2 Bu sta bistidu di lus sima un ropa.
Bu ta stende séu sima panu di un ténda.
4 El ta poi ses anju ta bira poderozu,*
El ta poi ses sérvu* ta bira un lumi ki ta kaba ku tudu kuza.
5 El poi téra riba di ses alisérsi,
I nunka el ka ta ben tradu di se lugar.
6 Bu kubri-l di agu fundu, sima ki é ku un panu.
Kes agu staba pa riba di montanha.
7 Kantu bu labanta bu vós kes agu fuji.
Dianti di barudju di bu strubada, es kóre dizorientadu.
8 Kes montanha subi i kes vali dixi
Pa kel lugar ki bu pô-s.
9 Bu pô-s un limiti ki es ka pode pasaba,
Pa nunka más es ka torna kubri téra.
10 El ta manda agu di montanha pa kes vali,*
Ses agu ta kóre na meiu di kes monti.
11 Tudu kes animal selvajen ta bebe agu di kes vali,
Ki ta mata sedi di kes buru brabu.
12 Kes pasu di séu ta xinta na kes arvi na bera di kes lugar ki agu ta kóre.
Es ta kanta na meiu di kes txeu folha.
13 La di se kaza na séu, el ta rega kes montanha.
Téra ta fika xeiu di frutu di bu trabadju.
14 El ta poi padja ta kria pa animal
I plantas pa tudu algen na mundu uza,
Asi pa téra pode da kumida:
15 Vinhu, ki ta poi korason di ómi kontenti,
Azeti, ki ta poi róstu di ómi ta brilha,
I pon, ki ta anima korason di ómi.
16 Kes arvi di Jeová sta ku txeu agu,
Kes sédru ki el planta na Líbanu,
17 Kes pasu ta faze ninhu na es.
Kaza di sigónha ta fika na kes pé di juníperu.
18 Kes monti altu é di kes kabra di monti,
Kes prokávia* ta sukundi na rótxa.
19 El faze lua pa marka ténpu sértu di anu,
I sol sabe dretu ki óra ki el debe kanba.
20 Bu ta traze sukuru i ta fika noti,
Óras ki tudu animal di florésta ta sai.
21 Kes lion novu ta ruji timenti es ta djobe animal pa es kasa
I es ta pidi Deus ses kumida.
22 Óras ki sol ta sai,
Es ta volta pa ses lugar i es ta durmi.
23 Ómi ta sai pa se trabadju,
I el ta trabadja ti noti.
24 Ó Jeová, bu faze txeu trabadju!
Bu faze tudu es ku sabedoria.
Téra sta xeiu di kuzas ki bu faze.
25 Odja mar la, grandi dimás i largu,
Xeiu di kuzas bibu ki ka ta da pa konta, pikinoti ku grandi.
26 Barku ta pasa na el,
I tanbê Leviatan,* ki bu faze pa brinka la.
27 Es tudu ta spera
Pa bu da-s kumida na ténpu sértu.
28 Es ta panha kel ki bu ta da-s.
Óras ki bu ta abri bu mô, es ta resebe txeu kuza bon.
29 Óras ki bu ta sukundi bu róstu, es ta fika fadigadu.
Si bu tra-s folgu,* es ta móre i es ta bira téra otu bês.
30 Si bu manda bu spritu, tudu kuza ta bira ta izisti,
I bu ta faze tudu kuza novu na téra.
31 Glória di Jeová ta ben dura pa tudu ténpu.
Jeová ta ben fika kontenti ku ses trabadju.
32 El ta odja pa téra i téra ta treme,
El ta toka na kes monti i es ta bota fumu.
33 N ta ben kanta pa Jeová pa tudu ténpu di nha vida.
N ta ben kanta lovor* pa nha Deus timenti N sta bibu.
34 Pa nhas pensamentu agrada Deus.*
N ta ben fika kontenti pamodi Jeová.
35 Kes algen pekador ta ben dizaparse di téra,
I kes mau ta ben dexa di izisti.
N ta lova Jeová. Nhos lova Jeová!