Salmu
Salmu di Davidi. Maskil.*
32 Filís é kel algen ki ta purduadu se fadja, kel ki ta kubridu* se pekadu.
2 Filís é kel ómi ki Jeová ka ta fla-l ma el é kulpadu,
Kel ki ka ta ingana algen.
3 Timenti N staba kaladu, nhas osu fika fraku pamodi N staba ta jeme dia interu.
4 Pamodi dia ku noti bu mô staba pizadu riba mi.
Nhas forsa ivapora sima agu ta ivapora na ténpu di kalor. (Selá)
5 Má N kaba pa konfesa-u nha pekadu.
N ka sukundi nha éru.
N fla: “N sta bai konfesa Jeová nhas pekadu.”
I bu purdua-m nha éru i nhas pekadu. (Selá)
6 É pamodi kel-li ki tudu kes ki é lial ta ora pa bo
Timenti es ta pode atxa-u.
Asi, nen kes agu ki ta kóre ku forsa ka ta panha-l.
7 Bo é un lugar pa N sukundi.
Bu ta ben proteje-m di frónta.
Bu ta ben poi pesoas ta grita di alegria na nha vólta pamodi bu ta salva-m. (Selá)
8 “N ta ben da-u sabedoria i N ta ben inxina-u na ki kaminhu ki bu debe anda.
N ta ben da-u konsedju ku nhas odju fíksu na bo.
9 Ka nhos ser sima un kabalu ô mula, ki ka ten intendimentu,
Ki algen meste kontrola-l ku freiu i rédia
Pa el pode obi ku el.”*
10 Dór di kes algen mau é txeu,
Má kel ki ta kunfia na Jeová sta rodiadu di Se amor lial.
11 Nhos ki é justu, nhos fika kontenti pamodi Jeová i nhos xinti txeu alegria.
Nhos tudu ki ten korason sinseru, nhos grita di alegria.