Salmu
Pa diretor di múzika. Un múzika di Davidi.
31 Ó Jeová, N djobe proteson na bo.
Nunka ka bu dexa-m pasa vergónha.
Libra-m pamodi abo é justu.
2 Inbaxa bu obidu i obi-m.*
Ben faxi i libra-m.
Bira pa mi un lugar di proteson na montanha,
Un lugar fórti pa proteje-m.
3 Pamodi abo é nha rótxa i nha lugar di proteson.
Pamodi bu nómi, bu ta gia-m i bu ta mostra-m kaminhu.
4 Bu ta libra-m di armadilha* ki es sukundi pa pega-m,
Pamodi abo é nha lugar di proteson.
5 N ta intrega nha spritu na bu mô.
Ó Jeová, kel Deus di verdadi,* bu salva-m.
6 N ta ôdia kes algen ki ta adora kes imajen ki ka ten valor, ki ka ta sirbi pa nada,
Má ami, N ta kunfia na Jeová.
7 Bu amor lial ta ben pô-m ta xinti txeu kontenti,
Pamodi bu ta odja nha sufrimentu.
Bu konxe kel tristéza grandi ki N ta xinti.*
8 Bu ka intrega-m na mô di nha inimigu,
Má bu pô-m na un lugar suguru.*
9 Ó Jeová, ten péna di mi pamodi N sta frontadu.
Preokupason dja frakise nhas odju i tanbê tudu nha korpu.*
10 Tristéza sta ta kaba ku nha vida,
N ta pasa nhas anu di vida ta jeme.
Nha forsa sta ta kaba pamodi nha éru.
Nhas osu sta ta fika fraku.
11 Tudu nhas inimigu ta faze-m trósa,
Prinsipalmenti nhas vizinhu.
I kes ki konxe-m sta ku txeu medu di mi.
Óras ki es ta odja-m na rua, es ta fuji.
12 Es tra-m di ses korason* i es skese di mi, sima si N staba mortu.
N sta sima un vazu kebradu.
13 N obi kes kuza mariadu ki txeu algen sta fla;
N sta ku medu pamodi N sta ta amiasadu di tudu ladu.
Óras ki es ta djunta kóntra mi,
Es ta faze planu pa mata-m.*
14 Má ami, N ta kunfia na bo, ó Jeová.
I N ta fla: “Abo é nha Deus.”
15 Nha vida sta na bu mô.
Salva-m di mô di nhas inimigu i di kes ki ta pirsigi-m.
16 Mostra ma bu sta kontenti ku* bu sérvu.
Mostra-m bu amor lial i salva-m.
17 Ó Jeová, ka bu dexa-m pasa vergónha óras ki N ta txoma-u.
Pa kes mau fika na vergónha;
Pa es kaladu bóka na Sipultura.*
18 Pa kes algen mintirozu fika mudu,
Kes ki ta pâpia ku arogánsia i ku disprézu kóntra algen justu.
19 Fórti bu bondadi é grandi!
Bu guarda-l pa kes ki ten grandi ruspetu pa bo,
I bu mostra-l dianti di tudu ómi, pa djuda kes ki ta buska proteson na bo.
20 Bu ta ben pô-s na un lugar sukundidu pértu di bo
Pa proteje-s di kes algen ki ta faze planu kóntra es.
Na bu ténda bu ta ben proteje-s
Di kes algen ki ta insulta-s.*
21 Pa Jeová lovadu,
Pamodi di un manera rei di bunitu, el mostra-m se amor lial kantu N staba na un sidadi serkadu pa nhas inimigu.
22 Má ami, N fika dizorientadu i N fla:
“N ta móre bu dianti.”
Má bu obi nhas pididu di ajuda kantu N txoma-u.
23 Nhos ama Jeová, tudu nhos ki é lial pa el!
Jeová ta proteje kes algen fiel,
Má el ta kastiga riju kel ki é orgulhozu.
24 Nhos ten koraji i pa nhos korason ser fórti,
Nhos tudu ki sta spera na Jeová.