Salmu
106 Nhos lova Jeová!*
Nhos agradese Jeová pamodi el é bon.
Se amor lial ta dura pa tudu ténpu.
2 Ken ki pode pâpia di tudu kes óbra poderozu di Jeová
Ô pâpia di tudu kes kuza ki el faze ki merese lovor?
3 Filís é kes ki ta aji ku justisa,
Ki sénpri ta faze kel ki é dretu.
4 Ó Jeová, lenbra di mi óras ki bu mostra bondadi* pa bu povu.
Kuida di mi i salva-m,
5 Asi pa N sprimenta kel bondadi ki bu ta mostra pa kes ki bu skodje,
Pa N fika kontenti ku bu nason,
Pa N lova-u ku orgulhu djuntu ku bu eransa.
6 Nu peka sima nos gentis grandi.
Nu era, nu faze kel ki é mariadu.
7 Nos gentis grandi na Ijitu ka da valor pa* kes kuza grandi ki bu faze.
Es ka lenbra di bu grandi amor lial,
Má es rabela kantu es staba pértu di mar, na mar Brumedju.
8 Má simé, el salva-s pa se nómi dadu glória
I pa el mostra se puder.
9 El da órdi i mar Brumedju seka.
El gia se povu na fundu di mar sima si es staba ta pasa na dizértu.
10 El salva-s di mô di kes algen ki ta odiaba es
I el resgata-s di mô di ses inimigu.
11 Kes agu kubri ses inimigu,
Ninhun di es ka skapa.*
12 Nton, es poi fé na se promésa,
Es kumesa ta kanta-l lovor.
13 Má es skese faxi di kuzê ki el fazeba,
Es ka spera pa se orientason.
14 Es dexa ses dizeju iguísta domina-s na un téra séku.
Es poi Deus na próva na dizértu.
15 El da-s kuzê ki es pidi,
Má dipôs el ataka-s ku un duénsa ki kaba ku es.*
16 Kes algen na kanpamentu fika ku invéja di Muizés
I di Aron, kel santu di Jeová.
17 Nton, téra abri i el inguli Datan
I el kubri kes ki staba djuntu ku Abiron.
18 Sende un lumi na meiu di ses grupu,
Lumi kaba ku kes algen mau.
19 Es faze un bizeru na Orebe
I es inbaxa dianti di un státua di metal.
20 Envês di es da-m kel glória ki N merese
Es kumesa ta adora un imajen di un boi ki ta kume padja.
21 Es skese di Deus, ses Salvador,
Kel ki faze kuzas grandi na Ijitu,
22 Kes kuza grandi ki el faze na téra di Kan,
I kes kuza spetakular ki el faze na mar Brumedju.
23 Deus staba kuazi ta manda pa kaba ku es,
Má Muizés, kel ki el skodje, pidi-l
Pa el branda se raiba i pa el ka distrui-s.
24 Dipôs, es dispreza kel téra bunitu,
Es ka poi fé na se promésa.
25 Es fika ta rasmunga na ses ténda,
Es ka obi ku vós di Jeová.
26 Pur isu, el labanta se mô i el jura
Ma el ta poba es ta móre na dizértu,
27 Ma el ta spadjaba ses fidju na meiu di kes nason,
I ma el ta dexaba es móre na otus país.
28 Dipôs, es kumesa ta adora* Baal di Peor,
I es kume kes sakrifisiu ki oferesedu pa kes algen mortu.*
29 Es provoka Deus ku kes kuza ki es faze,
Pur isu, el kastiga-s ku duénsa.
30 Má kantu Fineias labanta i el aji,
Kel duénsa para.
31 I Deus fla ma el é justu
Pa tudu jerason, pa tudu ténpu.
33 Es pô-l ku spritu disgostadu,
I el pâpia sen pensa.
34 Es ka kaba ku kes povu
Sima Jeová mandaba es.
36 Es ta sirbiba ses imajen,
I kes imajen bira un armadilha pa es.
37 Es ta sakrifikaba ses fidju matxu
I ses fidju-fémia pa dimónis.
38 Es ta mataba kes algen inosenti,
Ses própi fidju matxu i ses fidju-fémia,
Ki es ta sakrifikaba pa kes imajen di Kanan.
I téra fika kontaminadu ku sangi di kes algen inosenti.
39 Es bira inpuru pamodi kes kuza ki es faze.
Es bira infiel pa Deus* pamodi ses konportamentu.
40 Jeová fika xatiadu ku se povu
I el pasa ta ôdia se eransa.
41 El intrega-s txeu bês na mô di kes nason,
Asi pa kes ki ta odiaba es governa-s.
42 Ses inimigu maltrata-s,
I es fika na puder* di ses inimigu.
43 Txeu bês Deus libra-s,
Má es ta rabelaba i es ka ta obiba ku Deus,
I es umilhadu pamodi ses éru.
44 Má el ta odjaba ses frónta
I el ta obiba ses pididu di ajuda.
45 Pamodi es, el ta lenbraba di se kontratu,
46 Deus ta poba tudu kes nason ki tinha es prézu
Ta xintiba péna di es.
47 Ó Jeová, nos Deus, salva-nu.
Tra-nu di kes nason i djunta-nu otu bês
Pa nu pode lova bu nómi santu
I pa nu xinti grandi alegria na lova-u.*
48 Pa Jeová, kel Deus di Israel, lovadu
Pa tudu ténpu.*
I pa tudu povu fla: “Amén!”*
Nhos lova Jeová!