Jó
33 “Má gósi Jó, favor, obi nhas palavra,
Obi tudu kel ki N tene pa N fla.
2 Presta atenson! N sta ben abri nha bóka.
Nha língua* sta ben pâpia.
3 Nhas palavra ta mostra ma nha korason é sinseru,
N ta ben pâpia verdadi sobri kel ki N sabe.
4 É spritu di Deus ki faze-m,
É folgu di Deus Tudu-Poderozu ki da-m vida.
5 Responde-m si bu ta pode,
Aprizenta bus argumentu nha dianti, pripara pa bu difende bu kazu.
6 Pa Deus verdaderu, ami é sima bo.
Ami tanbê N fazedu di baru.
7 Pur isu, bu ka debe fika dizorientadu nen ku medu di mi.
I N ka ta ben poi txeu preson riba di bo.
8 Má N obi-u ta fla,
N obi kes palavra li un monti bês:
9 ‘Ami é puru, N ka faze nada mariadu.
N sta linpu, N ka da ninhun fadja.
10 Má, Deus ta atxa motivu pa fika kóntra mi.
El ta atxa ma mi é se inimigu.
11 El ta poi nha pé na tronku,
El ta izamina tudu nhas kaminhu.’
12 Má bu ka ten razon pa fla kel-li. Pur isu, é kel-li ki N ten pa N fla-u:
Deus é mutu más grandi di ki kalker ómi.
13 Pamodi ki bu sta kexa kóntra El?
É pamodi el ka responde ninhun di bus palavra?
14 Deus ta pâpia un bês i dôs bês,
Má ningen ka ta presta atenson.
15 Deus ta pâpia ku algen na un sonhu, na un vizon di noti,
Óras ki es sta na un sónu pizadu
Timenti es sta ta durmi na ses kama.
16 El ta distapa obidu di pesoas
I el ta grava* ses instruson na es,
17 Pa afasta-s di kuzas mariadu
I pa proteje-s di orgulhu.
19 Dór tanbê ta koriji un algen na se kama
I óras ki se osu sta ta duê-l tudu óra.
20 Un algen na kel situason li* ta xinti ódiu di pon,
El ta nega ti un bon kumida.
21 Se karni ta kaba na nada,
Pesoas ta pode odja tudu ses osu.
22 Se vida ta txiga pértu di sipultura,
El ta txiga pértu di kes ki ta mata algen.
23 Si ten un mensajeru* pa djuda-l,
Un algen entri mil algen pa difende-l,
Pa inxina-l kuzê ki é justu,
24 Deus ta ben ten péna di el i el ta ben fla:
‘Libra-l pa el ka dixi pa sipultura!
N atxa un resgati pa el!
25 Pa se korpu bira más novu* di ki un jóven,
Pa el torna ten kel forsa ki el tinha na juventudi.’
26 El ta ben faze orason pa Deus i Deus ta seta se orason,
El ta ben grita di alegria óras ki el odja róstu di Deus
I Deus ta torna trata-l sima un algen justu.
27 Kel algen ta ben fla* pa otus algen:
‘N peka i N distorse kel ki é dretu,
Má N ka resebe kel ki N merese.*
28 El libra-m di bai pa sipultura,
I N ta ben kontinua ta odja lus.’
29 Na verdadi, Deus ta faze tudu kes kuza li,
El ta faze-s dôs, ti mésmu três bês, pa un algen,
30 Pa traze-l di sipultura otu bês,
Asi pa lus di vida limia-l.
31 Presta atenson Jó! Obi-m!
Fika kaladu i N ta kontinua ta pâpia.
32 Si bu tene algun kuza pa fla, responde-m.
Pâpia, pamodi N krê prova ma bu ten razon.
33 Si bu ka tene más nada pa fla, obi-m.
Fika kaladu i N ta ben inxina-u sabedoria.”