Jó
34 Nton, Eliú kontinua ta fla:
2 “Nhos ki sabe txeu kuza, nhos obi nhas palavra.
Nhos ki ten txeu intendimentu, nhos obi-m.
3 Pamodi obidu ta prova palavra,
Sima língua* ta sprimenta gostu di kumida.
4 Nu ben analiza pa nos mê kuzê ki é justu.
Nu ben disidi djuntu kuzê ki é bon na kel kazu li.
5 Pamodi Jó fla: ‘N ten razon,
Má Deus ka faze-m justisa.
6 Pur akazu, N debe konta mintira i fla ma mi é kulpadu?
Nha frida ka ten kura, enbóra N ka peka.’
7 Ki ómi ki é sima Jó,
Ki ta bebe insultu sima agu?
8 Si Jó kontinua ta pâpia di kel manera li, el sta djunta ku kes algen ki ta faze kuzas mariadu.
É sima si el sta ta anda ku kes algen mau.
9 Pamodi el fla: ‘Kes algen ki sta tenta agrada Deus,
Ka ta ganha nada ku kel-li.’
10 Pur isu, ómis ki ten intendimentu,* nhos obi-m:
Deus verdaderu nunka ka ta faze maldadi,
Deus Tudu-Poderozu nunka ka ta faze kuzas mariadu!
11 Pamodi el ta rekonpensa un ómi di akordu ku kel ki el ta faze,
I el ta da-l kel ki el merese.
12 Na verdadi, Deus ka ta faze maldadi,
Deus Tudu-Poderozu sénpri ta faze kel ki é justu.
13 Ken ki poi Deus enkaregadu di téra?
Ken ki da-l autoridadi riba mundu interu?*
14 Si el konsentra se atenson* na es,
I el tra-s se spritu i ses folgu,
15 Tudu algen* ta moreba djuntu
I tudu algen ta voltaba pa téra.
16 Nton, si bu ten intendimentu, presta atenson na kel-li.
Obi ku atenson kuzê ki N sta fla.
17 Un algen ki ta ôdia justisa pode governa?
Bu ta kondenaba un algen poderozu ki é justu?
18 Bu ta flaba un rei: ‘Bu ka ta sirbi pa nada’,
Ô kes algen inportanti: ‘Nhos é mau’?
19 Deus ka ta toma ladu di kes prínsipi
Nen el ka ta djuda kes riku más di ki kes póbri,*
Pamodi tudu es é trabadju di se mô.
20 Es pode móre na meiu di noti, dirapenti.
Es ta treme ku forsa i es ta móre.
Ti kes algen poderozu ta tradu di ses puzison, má é ka ómi ki ta tra-s.
21 Pamodi Deus ta odja tudu kuza ki algen ta faze,
El ta odja kada pasu ki algen ta da.
22 Ka ten ninhun lugar sukuru
I nen lugar fundu ki kes algen mau ta pode sukundi.
23 Pamodi Deus ka marka un ténpu pa algen
Parse se dianti pa julgamentu.
24 El ta distrui kes algen poderozu sen meste faze invistigason
I el ta poi otus na ses lugar.
25 Pamodi el sabe kuzê ki es sta ta faze.
Duránti noti, el ta bota-s na txon i es ta piladu.
26 El ta kastiga-s pamodi ses maldadi,
Na un lugar undi ki tudu algen ta pode odja,
27 Pamodi es dexa di sigi Deus
I es ka ta kunpri ses mandamentu.
28 Es ta poi póbri ta grita ta pidi se ajuda,
Asi, el ta obi pididu di ajuda di kes algen dizanparadu.
29 Óras ki Deus ta fika kaladu, ken ki pode kondena-l?
Óras ki el ta sukundi se róstu, ken ki pode odja-l?
Si Deus disidi sukundi di un algen ô di un povu, rezultadu é kel mê.
30 El ka ta dexa algen ki ka ten ruspetu pa el* governa,
Nen el ka ta dexa algen pripara armadilha pa povu.
31 Bu sta fla Deus:
‘N kastigadu, enbóra N ka faze nada mariadu.
32 Mostra-m kuzê ki N ka sta konsigi odja.
Si N faze algun kuza mariadu, N ka ta faze-l más’?
33 Pur akazu, Deus debe rekonpensa-u sima bu krê pamodi bu ka seta se julgamentu?
É ka mi, é bo ki debe disidi.
Nton, fla-m kuzê ki bu sabe.
34 Kes ómi ki ten intendimentu i sabedoria, ki ta obi-m,
Ta ben fla-m:
35 ‘Jó ta pâpia sen konhisimentu,
I ses palavra ta mostra ma el ka ten intendimentu.’
36 Dexa Jó podu na próva* ti se limiti
Pamodi se respósta é sima di kes algen mau!
37 Alén di pekador,
El é un ómi rebéldi ki ta da palmu ku disprézu nos dianti,
El ta kontinua ta akuza Deus verdaderu!”