Jó

 2 “Kel ki bu fla sta ta dexa-m preokupadu. Ami é obrigadu responde.

N ka pode fika kétu.

 3 Kel koreson ki N obi é un insultu pa mi,

I nha intendimentu* ta obriga-m responde.

 4 N ten serteza ma sénpri bu sabia di kel-li,

Pamodi é si désdi ki ómi podu* na téra,

 5 Ma gritu di alegria di ken ki é mau ka ta dura txeu

I alegria di ken ki ka ten ruspetu pa Deus* ta dura sô un bokadinhu.

 6 Enbóra se altura ta txiga séu,

I se kabésa ta txiga na núven,

 7 El ta ben dizaparse pa tudu ténpu sima se própi pupú.

Kes ki ta kustuma odjaba el ta ben pergunta: ‘Undi ki el sta?’

 8 El ta ben bua sima sonhu, i es ka ta ben atxa-l.

El ta ben dizaparse sima un vizon di noti.

 9 Kes odju ki odja-l ka ta ben odja-l otu bês,

I kes algen di se kaza ka ta ben odja-l más.

10 Ses fidju ta ben pidi ajuda na kes algen póbri,

Se própi mô ta ben divolve rikéza ki el toma di otus algen.

11 Se osu staba xeiu di forsa di juventudi,

Má se forsa, ta ben dixi ku el pa sipultura.*

12 Si maldadi é dósi na se bóka,

Si el sukundi-l baxu di língua,

13 Si el fika ku el na bóka,

El xinti se gostu i el ka tra-l,

14 Se kumida ta ben azeda déntu di el,

El ta ben bira sima venénu* di kóbra na se korpu.

15 El inguli rikéza, má el ta ben vumita-l.

Deus ta ben tra-l di se bariga.

16 El ta ben inguli venénu di kóbra.

Kóbra venenozu ta ben morde-l i ta mata-l.

17 Nunka el ka ta ben odja txeu mel,

I nen mantega ta kóre sima riu.

18 El ta ben divolve ses kuza di valor sen uza-s.*

El ka ta ben goza di kes rikéza ki ta ben di se nogósiu.

19 Pamodi el pila algen póbri i el bandona-l.

El toma un kaza ki el ka faze.

20 Má el ka ta ben ten pas déntu di el.

Se rikéza ka ta ben djuda-l skapa.

21 Ka fika nada pa el divora.

É pur isu ki se susésu ka ta ben dura.

22 Óras ki el fika ku txeu rikéza, preokupason ta ben toma kónta di el.

Disgrasa ta ben kóntra el ku tudu forsa.

23 Óras ki el intxi bariga,

Deus* ta ben manda se raiba kóntra el,

El ta ben poi se raiba ta txobe riba di el ti txiga na se tripa.

24 Óras ki el fuji di kes arma di féru,

Flexa di un arku* di kóbri ta ben entra na el.

25 El ta rinka un flexa di kósta,

El ta tra un flexa brilhanti di fígadu,

I se korason ta fika ku txeu medu.

26 El ta ben perde tudu se rikéza.

Un lumi ki ningen ka poi ta ben kaba ku el.

Kes algen ki fika na se ténda ta ben sufri disgrasa.

27 Séu ta ben mostra se éru.

Téra ta ben labanta kóntra el.

28 Txeia ta ben leba se kaza.

Un txuba fórti ta ben kai na dia di raiba di Deus.*

29 É kel-li ki Deus tene guardadu pa algen mau,

Kel-li ki é kel eransa ki Deus disidi pa el.”