Jó
21 Jó responde:
2 “Nhos obi dretu kuzê ki N sta fla,
Pa kel-li ser konsolu ki nhos ta da-m.
3 Nhos ten paxénxa ku mi timenti N ta pâpia.
Dipôs ki N pâpia, nhos pode faze-m trósa.
4 Pur akazu N sta ta kexa kóntra un ómi?
Si N staba ta faze kel-li, N* ka ta perdeba paxénxa?
5 Nhos odja pa mi i nhos fika spantadu.
Nhos poi mô riba di nhos bóka.
6 Óras ki N ta pensa na kel-li, N ta fika perturbadu,
I nha korpu interu ta treme.
7 Pamodi ki kes algen mau ta kontinua ta vive,
Ta bira bédju i ta fika riku?*
8 Ses fidju ta sta sénpri djuntu ku es,
I es ta txiga di odja ses disendenti.
9 Ses kaza sta suguru, es ka ta xinti medu.
Deus ka ta kastiga-s ku se vara.
10 Ses toru ta ten txeu fidju,
Pamodi ses vaka ta pari i ninhun di ses fidju ka ta móre.
11 Ses mininu ta kóre la na rua sima un ribanhu,
I ses fidju ta salta di alegria.
14 Má es ta fla Deus verdaderu: ‘Dexa-nu en pas!
Nu ka krê konxe bus kaminhu.
15 Ken ki é Deus Tudu-Poderozu pa nu sirbi-l?
Kuzê ki nu ta ganha si nu konxe-l?’
16 Má N sabe ma es ka ten puder di poi kuzas ta kóre dretu ku es.
Pensamentu* di algen mau sta lonji di mi.
17 Kantu bês ki lánpida di kes algen mau ta pagadu?
Kantu bês ki disgrasa ta ben riba di es?
Kantu bês ki Deus ta distrui-s pamodi se raiba?
18 Pur akazu, es ta bira sima padja dianti di béntu?
I sima padja ki tenporal ta leba?
19 Deus ta ben guarda kastigu di algen mau pa ses fidju.
Má Deus tanbê ta da kes algen mau kel ki es merese, asi pa es pode xinti kuzê ki es faze.
20 Pa ses própi odju odja ses disgrasa,
I pa es xinti* kel raiba di Deus Tudu-Poderozu.
21 Pamodi ki el ta preokupa ku kuzê ki ta ben kontise ku ses fidju dipôs ki el móre,
Si se vida ta ben ser kurtu?*
22 Pur akazu, algen pode inxina Deus algun kuza,
Ki é kel ki ta julga ti mésmu kes ki sta na puzison más altu?
23 Ten algen ki ta móre xeiu di forsa,
Na pas i sen ninhun preokupason,
24 Ku bon saúdi*
I ku osu fórti.*
25 Má ten otus algen ki ta móre xeiu di disgostu,*
Sen nunka sprimenta kuzas dretu.
26 Na fin, es tudu ta bira téra,
I bitxu ta ben kume tudu es.
27 N sabe dretu kuzê ki nhos sta ta pensa
I ki planu ki nhos sta ta faze pa prujudika-m.*
28 Nhos ta fla: ‘Undi ki sta kaza di kel ómi inportanti?
I undi ki sta ténda ki kes algen mau ta moraba na el?’
29 Nhos ka pergunta kes algen ki ta viaja?
Nhos ka ta kridita na kuzê ki es fla?*
30 Es ta fla ma algen mau ka ta ben sufri óras ki kontise disgrasa
I ma el ta salvadu óras ki Deus sta xatiadu.
31 Ken ki pode koriji algen mau pa se konportamentu mariadu?
Ken ki pode poi algen mau ta paga pa kuza ki el faze?
32 Óras ki el lebadu pa simitériu,
Es ta poi guarda na se sipultura.
33 El ta ba diskansa en pas na se sipultura,*
I tudu algen ta bai dipôs di el,*
Sima dja kontise ku un monti di algen antis di el.
34 Nton, pamodi ki nhos sta ta konsola-m ku palavras vaziu?
Nada ki nhos sta ta fla é ka verdadi!”