Salmu
Pa diretor di múzika. Na stilu di jedutun.* Salmu di Azafe.
77 Ku nha vós, N ta ben grita pa Deus djuda-m.
N ta ben txoma Deus i el ta obi-m.
2 Na dia di nha frónta N ta djobe Jeová.
Noti interu N ta faze orason pa el ku nha mô labantadu.*
Nada ka ta konsola-m.*
3 Óras ki N ta lenbra di Deus, N ta xinti tristi.
N ta fika perturbadu i N ta perde forsa.* (Selá)
4 Bu ka ta dexa nhas odju fitxa.
N ta fika preokupadu i N ka ta konsigi pâpia.
5 N ta pensa na kes kuza di ténpu antigu,
Kes anu ki dja ten txeu ténpu ki pasa.
6 Duránti noti N ta lenbra di nha kántiku.*
N ta pensa na nha korason.
N ta faze* txeu piskiza pa N atxa respósta pa kes pergunta li:
7 Jeová ta nega-nu pa tudu ténpu?
Nunka más nu ka ta pode agrada-l?
8 Se amor lial kaba pa tudu ténpu?
Ninhun jerason ka ta ben odja se promésa ta kunpri?
9 Deus dja skese di mostra-nu se bondadi,
Ô é se mizerikórdia ki dja kaba pamodi se raiba? (Selá)
10 N ta kontinua ta fla: “É kel-li ki tene-m angustiadu:
Kel Deus Más Grandi ka sta djuda-nu más”?*
11 N ta ben lenbra di kes óbra di Jeová.*
N ta ben lenbra di kes kuza grandi ki bu faze désdi ténpu antigu.
12 N ta ben midita na tudu kuza ki bu ta faze
I N ta ben pensa na manera ki bu ta faze kuzas.
13 Ó Deus, bus kaminhu é santu.
Ki deus ki é grandi sima bo, ó Deus?
14 Abo é Deus verdaderu ki ta faze kuzas grandi.
Bu mostra kes povu bu forsa.
16 Ó Deus, kes agu odja-u.
Kes agu odja-u i es kumesa ta mexe.
I kes agu fundu fika ajitadu.
17 Kes núven baza agu.
Séu sukuru faze barudju di strubada,
I bus relánpagu spadja pa tudu ladu sima flexa.
18 Barudju di bu strubada éra sima di róda di karu di géra.
Relánpagu límia na téra interu,
Téra* treme i sakudi.
19 Bu abri kaminhu na mar,
Bu abri kaminhu na agu fundu,
Má ningen ka konsigi odja marka di bu pé.
20 Bu gia bu povu sima un ribanhu,
Bu uza Muizés i Aron pa kuida di es.