Salmu

37 Ka bu fika xatiadu* pamodi kes algen mau

Nen ka bu fika ku invéja di kes algen ki ta faze kuzas mariadu.

 2 Es ta ben seka faxi sima padja

I es ta ben seka sima padja ki inda sta verdi.

 3 Kunfia na Jeová i faze kel ki é dretu.

Mora na téra i ser un algen fiel.

 4 Atxa kel alegria más grandi ki ten na Jeová,

I el ta da-u kes kuza ki bu korason ta dizeja.

 5 Dexa Jeová mostra-u kaminhu,*

Kunfia na el i el ta faze algun kuza pa djuda-u.

 6 El ta ben poi bu justisa ta brilha sima lus di palmanhan,

I bu justisa ta ben brilha sima sol di meiu-dia.

 7 Fika kaladu dianti di Jeová

I spera pa el ku gana di resebe se ajuda.

Ka bu fika xatiadu pamodi kel ómi

Ki ta konsigi kunpri se planu pa faze maldadi.

 8 Dexa raiba pa la i ka bu fika xatiadu.

Ka bu xatia i ka bu volta pa faze maldadi.*

 9 Pamodi kes algen mau ta ben distruídu,

Má kes ki ta poi ses speransa na Jeová ta ben toma kónta di téra.

10 Sô más un bokadinhu, kes algen mau ta ben dexa di izisti.

Bu ta ben djobe pa lugar ki es staba,

I es ka ta ben sta la más.

11 Má kes algen mansu ta ben toma kónta di téra,

I es ta ben ten txeu alegria pamodi ta ben ten txeu pas.

12 Kes algen mau ta faze planu kóntra kes algen justu.

Es ta rintxa* denti óras ki es ta odja-s.

13 Má Jeová ta ben ri di kes algen mau,

Pamodi El sabe ma ses dia sta ta txiga.

14 Kes algen mau ta puxa ses spada i es ta arma* ses arku*

Pa es da kes algen ki sta ta sufri i kes algen póbri na txon,

Pa es mata kes ki sta anda na kaminhu rétu.

15 Má ses spada ta ben entra na ses própi korason

I ses arku ta ben kebradu.

16 Kel poku ki algen justu ten é midjór

Di ki fartura ki txeu algen mau ten.

17 Pamodi brasu di kes algen mau ta ben kebradu,

Má Jeová ta ben apoia kes algen justu.

18 Jeová sabe kuzê ki kes algen lial ta pasa pa el,*

I ses eransa ta dura pa tudu ténpu.

19 Es ka ta ben pasa vergónha na ténpu di dizastri.

Na ténpu di fómi, es ta ben ten kumida avontádi.

20 Má kes algen mau ta ben móre.

Kes inimigu di Jeová ta ben dizaparse sima bunitéza di un kanpu verdi.

Es ta ben dizaparse sima fumu.

21 Algen mau ta inprista i el ka ta paga,

Má kes algen justu ta da avontádi.*

22 Kes algen ki Deus ta abênsua ta ben toma kónta di téra,

Má kes ki El ta maldísua ta ben kabadu ku es.

23 Óras ki Jeová sta kontenti ku kaminhu ki un ómi ta sigi

El ta gia-l ses pasu.*

24 Sikrê el kai, el ka ta fika na txon,

Pamodi Jeová ta pega-l na mô.*

25 Ami éra jóven i gósi N sta bédju,

Má nunka N ka odja un algen justu bandonadu,

Nen ses fidju ta djobe pon.*

26 El sta sénpri prontu pa inprista kes kuza ki el ten,

I Deus ta ben abênsua ses fidju.

27 Fika lonji di kes kuza mariadu i faze kel ki é dretu,

I bu ta kontinua ta vive pa tudu ténpu.

28 Pamodi Jeová ta ama justisa,

I el ka ta bandona kes algen ki é lial pa el.

Sénpri es ta ser protejedu,

Má kes fidju di kes algen mau ta ben ser distruídu.

29 Téra ta ben ser di kes algen justu,

I es ta ben vive na el pa tudu ténpu.

30 Di bóka di un algen justu ta sai sabedoria,*

I se língua ta pâpia di kes kuza ki é justu.

31 Lei di se Deus sta na se korason

I se pé ka ta skorega.

32 Algen mau sta ku odju na algen justu,

I el ta djobe oportunidadi pa mata-l.

33 Má Jeová ka ta intrega-l na mô di kes algen mau

Nen el ka ta fla ma el é kulpadu óras ki el ta julgadu.

34 Poi bu speransa na Jeová i sigi se kaminhu,

I el ta ben da-u ónra di toma kónta di téra.

35 N odja un algen mau i runhu ta kria,

Sima un arvi ku txeu folha verdi na un bon txon.

36 Má dirapenti el dizaparse i el dexa di izisti.

N fika ta djobe-l, má N ka konsigi atxa-l.

37 Repara kel ómi ki ka ten kulpa,

Presta atenson na kel ómi ki é rétu,

Pamodi el ta ten un futuru di pas.

38 Má tudu kes ki ta faze kuzas mariadu ta ben distruídu.

Kes algen mau ka ta ten futuru.

39 Jeová ta salva kes algen justu.

El é ses proteson na ténpu di frónta.

El ta ben libra-s di kes algen mau i el ta ben salva-s,

Pamodi es ta djobe proteson na el.