Salmu
Orason di Davidi.
86 Ó Jeová, inbaxa bu obidu* i responde-m,
Pamodi N sta sufri i mi é póbri.
2 Proteje nha vida* pamodi mi é lial.
Salva bu sérvu ki ta kunfia na bo,
Pamodi bo é nha Deus.
3 Ó Jeová, ten péna di mi,
Pamodi N ta pasa dia interu ta txoma-u.
4 Ó Jeová, poi bu sérvu ta fika kontenti,
Pamodi é na bo ki N ta pidi ajuda.
5 Ó Jeová, bo é bon i bu sta sénpri prontu pa púrdua.
Bu ten txeu amor lial pa tudu kes ki ta faze orason pa bo.*
6 Ó Jeová, obi nha orason
I presta atenson óras ki N ta pidi-u ajuda.
7 N ta txoma-u na dia di nha frónta,
Pamodi bu ta ben responde-m.
8 Ó Jeová, ka ten ningen sima bo na meiu di kes deus,
Ka ten ningen ki faze kel ki bu faze.
9 Ó Jeová, tudu kes nason ki bu faze
Ta ben i es ta inbaxa bu dianti,
I es ta da bu nómi glória.
10 Pamodi bo é grandi i bu ta faze kuzas spetakular.
Sô bo ki é Deus.
11 Ó Jeová, inxina-m bu kaminhu.
N ta ben anda na bu verdadi.
Da-m un korason konplétu* pa N pode ten grandi ruspetu pa bo.
12 Ó Jeová, nha Deus, N ta lova-u di tudu nha korason,
N ta ben da bu nómi glória pa tudu ténpu.
13 Pamodi amor lial ki bu ten pa mi é grandi,
I bu salva nha vida di fundu di Sipultura.*
14 Ó Deus, kes ómi orgulhozu dja labanta kóntra mi.
Un grupu di ómis mau krê mata-m
I es ka ten ninhun ruspetu pa bo.*
15 Má abo, ó Jeová, abo é un Deus ki ten mizerikórdia i konpaxon,
16 Volta pa mi i ten péna di mi.
Da-m forsa i salva-m,
Pamodi N sirbi-u sima nha mai sirbi-u.
17 Da-m un sinal* di bu bondadi,
Asi pa kes ki ta odia-m odja-l i pa es podu na vergónha.
Pamodi abo, ó Jeová, é kel ki ta djuda-m i ki ta konsola-m.