Salmu
Un múzika di Davidi.
141 Ó Jeová, é bo ki N ta txoma.
Ben djuda-m faxi.
Presta atenson óras ki N ta txoma-u.
2 Pa nha orason ser sima insénsu priparadu na bu frenti.
Pa nha mô ki sta labantadu ser sima kes oférta di serial ki ta fazedu di noti.
3 Ó Jeová, poi un guarda na nha bóka,
Poi un guarda na pórta di nha bóka.
4 Ka bu dexa nha korason dizeja kuzas mariadu,
I faze maldadi djuntu ku kes algen mau.
Nunka N ka krê kume ses kumida sábi.
5 Si un algen justu kastiga-m, ta sérba un próva di amor lial.
Si el koriji-m, ta sérba sima óliu riba di nha kabésa,
I nha kabésa nunka ka ta negaba el.
N ta kontinua ta ora pa el sikrê el sta na disgrasa.
6 Mésmu si ses juís botadu di rótxa,
Povu ta ben presta atenson na nhas palavra, pamodi nhas palavra é sábi.
7 Nos osu spadjadu na bóka di Sipultura,*
Sima óras ki un algen ta trabadja txon ku aradu.
8 Ó Jeová, kel Sinhor Más Grandi, nhas odju sta fíksu na bo.
N djobe proteson na bo.
Ka bu dexa-m móre.*
9 Proteje-m di armadilha ki es pripara pa mi,
Di armadilha di kes algen mau.
10 Tudu kes algen mau ta ben kai na ses própi armadilha.
Má ami N ta ben skapa, san i salvu.