Atus

5 Nton, un ómi ki txomaba Ananias, djuntu ku se mudjer, Safira, bende un txon. 2 Má sukundidu, el tra párti di kel dinheru i se mudjer sabia di kel-la. Dipôs el panha kel otu párti i el pô-l na pé di apóstlus. 3 Má, Pedru fla: “Ananias, pamodi ki bu dexa Satanás pô-u ta konta mintira pa spritu santu i sukundidu bu fika ku párti di dinheru di kel txon? 4 Kel txon ka éra di bo antis di bu bende-l? I dipôs ki bu bende-l, bu ka podia uzaba kel dinheru sima bu krê? Nton, pamodi ki bu pensa na bu korason faze un kuza di kel-li? Bu ka konta mintira pa ómis, má pa Deus.” 5 Kantu Ananias obi kes palavra li, el kai i el móre. I tudu kes algen ki obi kel-li fika ku txeu medu. 6 Nton, alguns jóven labanta, es rola-l na panu, es leba-l i es intera-l.

7 Uns três óra dipôs se mudjer txiga. El ka sabia kuzê ki kontiseba. 8 Pedru fla-l: “Fla-m li, é pa kel présu li ki nhos dôs bende kel txon?” El fla: “Sin, é pa kel présu li.” 9 Nton, Pedru fla-l: “Pamodi ki nhos dôs konkorda na poi spritu di Jeová* na próva? Odja, pé di kes ki intera bu maridu sta na pórta, i es ta leba-u pa fóra.” 10 Kel óra el kai na pé di Pedru i el móre. Kantu kes jóven entra, es atxa-l mortu. Es leba-l i es intera-l na ladu di se maridu. 11 Nton, kongregason interu i tudu kes algen ki obi kel-li fika ku txeu medu.

12 Tanbê, kes apóstlu kontinua ta faze txeu sinal i milagri na meiu di povu. I tudu es ta djuntaba na un koredor kubértu ki txomaba Pórtiku di Salumon.* 13 Na verdadi, ningen más ka tinha koraji di djunta ku es, má povu ta papiaba ben di es. 14 Alén di kel-li, txeu ómi ku mudjer bira ta kridita na Sinhor i es ba ta djunta ku es. 15 Ti mésmu es ta lebaba kes algen duenti pa fóra, pa kes rua prinsipal, i es ta detaba es na kes kama pikinoti i na stera, asi pa óras ki Pedru ta pasaba, peloménus se sónbra tokaba na alguns di es. 16 Tanbê, txeu algen ta baba di kes sidadi pértu di Jiruzalen, i es ta lebaba kes algen duenti i kes ki ta sufreba pamodi spritu mau,* i tudu es ta sérba kuradu.

17 Má, kel saserdóti prinsipal i tudu kes ki staba ku el, ki éra di seita* di saduseus, labanta xeiu di siumis. 18 Nton, es pega* kes apóstlu i es pô-s na kadia públiku. 19 Má, duránti noti, anju di Jeová* abri pórta di kadia, el leba-s pa fóra i el fla-s: 20 “Nhos bai pa ténplu, i nhos kontinua ta pâpia ku pesoas sobri tudu kel mensajen di vida.” 21 Dipôs ki es obi kel-li, es entra na ténplu kantu staba kuazi ta manxe i es kumesa ta inxina.

Kantu kel saserdóti prinsipal i tudu kes ki staba djuntu ku el txiga, es djunta kes algen di Sinédriu* i tudu kes ki ta fazeba párti di ansions di povu di Israel, i es manda pa traze kes apóstlu di kadia. 22 Má kantu kes guarda txiga na kadia, es ka atxa-s la. Nton, es volta i es fla-s: 23 “Nu atxa kadia trankadu ku tudu suguransa i kes guarda staba paradu na kes pórta, má kantu nu abri-s, nu ka atxa ningen la déntu.” 24 Kantu xéfi di guardas di ténplu i kes xéfi di saserdótis obi kel-li, es fika konfuzu sobri kuzê ki ta ba kontiseba. 25 Má txiga un algen i el fla-s: “Nhos odja! Kes ómi ki nhos poi na kadia sta na ténplu i es sta ta inxina povu.” 26 Nton, kel xéfi di guardas bai ku se guardas pa bai buska-s, má sen violénsia, pamodi es tinha medu pa povu ka daba es ku pédra.

27 Nton, es leba-s i es pô-s dianti di Sinédriu i kel saserdóti prinsipal pergunta-s: 28 “Nu ka daba nhos órdi pa nhos ka inxina na nómi di es ómi? Má nhos odja! Dja nhos intxi Jiruzalen ku nhos ensinu i nhos krê kulpa-nu pa mórti di es ómi.” 29 Pedru i kes otu apóstlu responde: “Deus é kel governanti ki nu debe obi ku el envês di ómis. 30 Deus di nos gentis grandi resusita Jizus, kel ki nhos mata i ki nhos prega na un staka.* 31 Deus pô-l la di riba na se direita pa el ser Líder Prinsipal i Salvador, asi pa Israel pode rapendeba i resebeba perdon di ses pekadu. 32 Nos é tistimunhas di kes kuza li i tanbê spritu santu, ki Deus da pa tudu kes ki ta seta pa el ser ses governanti.”

33 Kantu es obi kel-li, es fika ku txeu raiba* i es kria mataba kes apóstlu. 34 Má un farizeu, ki txomaba Gamaliel, labanta na Sinédriu. El éra un instrutor di Lei ki povu kreba txeu i el da órdi pa poi kes apóstlu na rua pa poku ténpu. 35 Nton el fla-s: “Ómis di Israel, nhos toma kuidadu ku kuzê ki nhos krê faze ku kes ómi li. 36 Pur izénplu, dja ten algun ténpu ki parse Teudas, ta fla ma el éra algen inportanti, i uns 400 ómi djunta ku el. Má el matadu i tudu kes ki ta sigiba el spadjadu, i tudu kuza kaba. 37 Dipôs di el, na ténpu di resensiamentu, parse Judas di Galilea i el konvense povu pa sigi-l. Kel ómi li tanbê móre i tudu kes ki ta sigiba el spadja. 38 Pur isu, dianti di kel situason li, N ta fla nhos pa nhos ka mete ku kes ómi li, má pa nhos dexa-s en pas. Pamodi si kel planu li ô si es óbra é di ómi, el ta kabadu ku el. 39 Má si é di Deus, nhos ka ta pode kaba ku es. Nhos toma kuidadu pamodi nhos pode sta ta luta ti mésmu kóntra Deus.” 40 Nton, es seta se konsedju, es txoma apóstlus, es sota-s i es da-s órdi pa es ka pâpia más na nómi di Jizus, i es liberta-s.

41 Nton, es sai di Sinédriu kontenti, pamodi Deus dexa-s sufri pamodi nómi di Jizus. 42 I tudu dia, na ténplu i di kaza en kaza, es kontinua sen para ta inxina i ta pâpia di notísias sábi sobri Kristu, Jizus.