Juízis
13 Más un bês, kes israelita faze kes kuza ki Jeová ta atxaba ma éra mariadu, i Jeová intrega-s na mô di kes filisteu duránti 40 anu.
2 Na kel ténpu, tinha un ómi di Zorá, di tribu di Dan, ki txomaba Manuá. Se mudjer ka ta pode tinha fidju. Pur isu, el ka tinha fidju. 3 Un dia, un anju di Jeová parse pa se mudjer i el fla-l: “Odja, bu ka ta pode ten fidju. Má bu ta ben fika grávida i bu ta ben ten un fidju. 4 Toma kuidadu pa bu ka bebe vinhu nen ninhun otu bebida alkólika, i ka bu kume nada ki é inpuru. 5 Bu ta ben fika grávida i bu ta ben ten un fidju. Nunka nhos ka debe korta-l se kabelu, pamodi Deus skodje kel mininu pa ser nazireu* désdi ki el nase.* I el ta ben salva Israel di mô di kes filisteu.”
6 Nton, kel mudjer bai i el fla se maridu: “Un ómi di Deus verdaderu ben pâpia ku mi. Se aparénsia ta dexa algen dimiradu, sima di un anju di Deus verdaderu. N ka pergunta-l di undi ki el ben i nen el ka fla-m se nómi. 7 Má el fla-m: ‘Bu ta ben fika grávida i bu ta ben ten un fidju. Bu ka debe bebe vinhu, nen otu bebida alkólika i bu ka debe kume nada inpuru, pamodi Deus skodje kel mininu pa ser nazireu, désdi dia ki el nase ti dia ki el móre.’”
8 Manuá inplora Jeová i el fla: “Diskulpa-m, Jeová. Favor, dexa kel ómi di Deus verdaderu, ki bu manda gósi li, pa torna ben i pa el pode splika-nu kuzê ki nu debe faze ku kel mininu ki sta pa nase.” 9 Deus verdaderu obi kuzê ki Manuá fla, i timenti se mudjer staba xintadu na kanpu, kel anju di Deus verdaderu parse pa el otu bês. Má Manuá ka staba djuntu ku el. 10 Kel mudjer kóre i el ba fla se maridu: “Odja! Kel ómi ki pâpia ku mi kel otu dia dja parse pa mi otu bês.”
11 Nton, Manuá labanta i el bai djuntu ku se mudjer. El txiga na kel ómi i el pergunta-l: “É bo ki é kel ómi ki pâpia ku nha mudjer?” El responde: “É mi.” 12 Nton Manuá fla: “Pa kel ki bu fla kunpri! Modi ki nu debe kria kel mininu? I kuzê ki el ta ben faze?” 13 Kel anju di Jeová fla Manuá: “Bu mudjer debe ivita tudu kuza ki N fla-l. 14 El ka debe kume nada ki pé di uva ta da, el ka debe bebe vinhu nen ninhun otu bebida alkólika, i el ka debe kume nada inpuru. El debe faze tudu kel ki N manda-l.”
15 Nton, Manuá fla kel anju di Jeová: “Favor, ka bu bai. Dexa-nu pripara-u un kabritu.” 16 Má, kel anju di Jeová fla Manuá: “Si N fika, N ka ta kume bu kumida. Má si bu krê oferese un oférta kemadu pa Jeová, bu pode oferese-l.” Manuá ka sabia ma el éra un anju di Jeová. 17 Nton, Manuá fla kel anju di Jeová: “Modi ki é bu nómi? Asi pa nu pode da-u ónra óras ki bu palavra kunpri.” 18 Má, kel anju di Jeová fla-l: “Pamodi ki bu sta pergunta-m nha nómi? Nha nómi é bunitu, pur isu N ka sta fla-u.”
19 Nton, Manuá panha kel kabritu i kel oférta di serial i el oferese Jeová es riba di un pédra. Timenti Manuá i se mudjer staba ta odja, Deus faze un kuza spetakular. 20 Kantu kel lumi di altar staba ta subi pa séu, Manuá i se mudjer odja kel anju di Jeová ta subi na meiu di kel lumi di altar. Kel óra, es inbaxa ku róstu pa txon. 21 Nton, Manuá da kónta ma el éra un anju di Jeová. Kel anju di Jeová ka parse pa es más. 22 I Manuá fla se mudjer: “Di serteza nu ta móre, pamodi nu odja Deus.” 23 Má se mudjer fla-l: “Si Jeová krê mataba nos, el ka ta setaba kel oférta kemadu i kel oférta di serial ki nu oferese-l. Tanbê el ka ta mostraba nos tudu kes kuza, i nen el ka ta flaba nos ninhun di kes kuza li.”
24 Un ténpu dipôs, kel mudjer tevi un fidju i el pô-l nómi di Sanson. Sima kel mininu ba ta kria, Jeová kontinua ta abensua-l. 25 Ku ténpu, spritu di Jeová kumesa ta aji na el kantu el staba na Mané-Dan, ki ta fika entri Zorá i Estaol.