Jó
31 “N faze un kontratu ku nhas odju.
Nton, modi ki N pode odjaba pa un vírjen ku intenson mariadu?
2 Si N fazeba kel-li, modi ki Deus ki sta na séu ta trataba mi?
Ki eransa ki N ta resebeba di Deus Tudu-Poderozu?
3 Dizastri ka sta ta spera kes algen ki ta faze kuzas mariadu?
I disgrasa ka sta ta spera kes algen ki ta faze maldadi?
4 Pur akazu Deus ka ta odja nha kaminhu
I el ka ta konta tudu pasu ki N ta da?
5 Dja N kustuma konta mintira?*
Dja N txiga di ingana algen?
6 Pa Deus peza-m ku un balansa izatu,
Asi, el ta odja ma mi é lial.
7 Si nha pé disvia di kaminhu,
Si nha korason sigi dizeju di nha odju,
Ô si nha mô fika inpuru,
8 Pa N símia i pa otu algen kume,
I pa kel ki N planta rinkadu.*
9 Si un mudjer seduzi nha korason
I N ba fika di guarda na pórta di nha prósimu,
10 Pa nha mudjer mui serial pa otu ómi,
I pa otus ómi faze relason seksual ku el.*
11 Pamodi N ta fazeba un kuza ki ta da vergónha,
Un éru ki ta mereseba pa juís kastiga-m.
12 Kel-li ta sérba sima un lumi ki ta distrui tudu kuza,
Un lumi ki ta kema tudu kel ki N ten.*
13 Si N inpidi nhas sérvu ô nhas sérva di fazedu justisa,
Kantu es tinha un kexa* kóntra mi,
14 Kuzê ki N pode faze óras ki Deus julga-m?*
Modi ki N ta responde-l óras ki el iziji pa N presta kónta?
15 Kel ki faze-m na bariga ka faze-s tanbê?
É ka kel mésmu algen ki faze-nu antis di nu nase?
16 Algun bês N nega da póbri kes kuza ki es dizeja?
N poi odju di viúva ta txora?*
17 N kume mi sô
Sen reparti ku kes órfon?
18 (Désdi nha juventudi N kria kes órfon* sima si mi éra ses pai,
19 Óras ki N ta odjaba algen ta móre di friu
Ô un póbri ki ka tinha nada pa kubri ku el,
20 N ta daba el lan di nhas ovelha pa el manteba kenti
I el ta agradeseba mi txeu.*
21 Pur akazu dja N labanta mô kóntra órfon
Kantu el mesteba di nha ajuda na porton di sidadi?*
22 Si N faze kes kuza li, pa nha brasu* kai di onbru,
I pa nha brasu kebradu na kutuvélu.*
23 Nunka N ka faze kes kuza li, pamodi N tinha medu di sufri un disgrasa na mô di Deus.
Modi ki N ta pode fikaba di pé dianti di se glória?
24 N poi nha kunfiansa na oru
Ô N fla oru puru: ‘Abo é nha suguransa!’?
25 N ta ingababa kantu N tinha txeu rikéza,
Pamodi tudu kes kuza di valor ki N tinha?
26 N odjaba sol* ta brilha
I lua ta límia bunitu.
27 Má nunka N ka dexa nha korason ingana-m na segredu,
I nha bóka ka da nha mô beju pa adora-s.
28 Si N fazeba kes kuza li, ta sérba un éru ki N ta mereseba pa juís kastiga-m,
Pamodi N sta negaba kel Deus verdaderu ki sta la di riba.
29 Algun bês N fika kontenti ku distruison di nha inimigu
Ô ku algun kuza mariadu ki kontise ku el?
30 Nunka N ka peka ku nha bóka,
Ta pidi pa un maldison kontise ku nha inimigu i pa el móre.
31 Kes algen di nha ténda ta flaba:
‘Tudu kes algen ki bai pa ténda di Jó kume* ti farta.’
32 Ninhun stranhu* ka tevi ki pasa noti na rua.
Pórta di nha kaza staba abértu pa kes algen ki ta viaja.
33 Pur akazu N tenta sukundi nhas pekadu, sima otus algen ta faze?
N txiga di sukundi nha éru na bolsu di nha ropa?
34 N fika ku medu di reason di un monti di algen?
Ô N fika ku medu pamodi otus família podia disprezaba mi?
N fika kétu i N ka sai di kaza pamodi medu toma kónta di mi?
35 N ta gostaba pa algen obiba mi!
N ta sinaba pa baxu di kel ki N fla.*
Pa Deus Tudu-Poderozu responde-m!
N ta gostaba pa kel algen ki akuza-m skrebeba kes akuzason na un dukumentu!
36 N ta karegaba es na nha onbru
I N ta poba es na nha kabésa sima un koroa.
37 N ta prestaba el kónta di tudu nhas pasu.
N ta txigaba pértu di el ku kunfiansa, sima un prínsipi.
38 Si nha txon kexa kóntra mi
I tudu kes vala ki kobadu na txon txora,
39 Si N kume ses fruta sen paga,
Ô si N poi ses dónu* ta fika dizusperadu,
40 Nton, pa spinhu nase na nha kanpu envês di trigu
I érvas ki ta txera mal envês di sevada.”
Kes palavra di Jó ta tirmina li.