Prende trabadja duru é sima faze izersísiu i el ta djuda-u gósi i na futuru
PA JÓVENS
11 Ser trabadjador
KUZÊ KI KEL-LI SIGINIFIKA
Kes algen ki é trabadjador ka ten medu di trabadju. Envês di kel-li, es gosta di trabadja duru pa kuida di ses kabésa i tanbê pa es djuda ken ki meste, sikrê otus algen ka ta atxa ma kel trabadju é inportanti.
PAMODI KI KEL-LI É INPORTANTI
Ô nu krê ô nu ka krê, vida é xeiu di responsabilidadi. Na kel mundu li ki gentis ka gosta di trabadja duru, si bo é trabadjador bu ta ten vantaji. — Eclesiastes 3:13.
“N prende ma óras ki bu ta trabadja duru, bu ta xinti orgulhu i bu ta xinti sábi ku kel trabadju ki bu faze. Na verdadi, kel-li djuda-m prende gosta di trabadja. Ser un bon trabadjador ta djuda otus ten un bon opinion sobri bo.” — Reyon.
KONSEDJU DI BÍBLIA: ‘Ten vantaji na tudu tipu di trabadju duru’. — Provérbios 14:23.
KUZÊ KI BU PODE FAZE
Sigi kes kuza ki sta dibaxu li, pa djuda-u konsigi dizenvolve un atitudi puzitivu sobri trabadju.
Prende faze kuzas dretu i xinti orgulhu di kel ki bu faze. Ka ta nporta si bu sta ta faze algun kuza na kaza, trabadjus di skóla ô si bu sta na trabadju, faze sénpri bu midjór. Si dja bu sabe faze dretu algun kuza, djobe maneras di faze-l inda más dretu. Pur izénplu, bu pode tenta faze-l más faxi ô inda más midjór. Kantu más bu konsigi faze dretu un trabadju, bu ta gosta di el más txeu.
KONSEDJU DI BÍBLIA: ‘Dja bu odja un ómi ki é bon na se trabadju? É dianti di reis ki el ta fika sakédu, el ka ta fika sakédu dianti di kalker ómi.’ — Provérbios 22:29.
Pensa na modi ki bu trabadju ta djuda otus. Kuazi sénpri, óras ki bu ta faze dretu bu trabadju, bu ta djuda otus. Pur izénplu, óras ki bu ta faze bus trabadju na kaza, bu ta djuda otus algen di bu família xinti más diskansadu.
KONSEDJU DI BÍBLIA: ‘É más sábi da di ki toma.’ — Atus 20:35, Bíblia Na Prugrésu Di Traduson Pa Língua Kabuverdianu, BPK.
Sforsa pa bu faze más. Envês di faze sô kel ki bu mandadu, tenta faze más. Asi, bu ta konsigi kontrola bu vida, dja ki bu ta faze más ka pamodi bu obrigadu, má pamodi bo ki disidi faze kel-la. — Mateus 5:41.
KONSEDJU DI BÍBLIA: ‘Pa bu ka faze un kuza dretu pamodi obrigason, má pa bu faze-l di livri vontadi.’ — Filémon 14.
Ser ikilibradu. Kes algen ki é trabadjador ka ten prigisa i nen es ka ta trabadja di manera izajeradu. Es ta tenta ser ikilibradu. Es ta xinti sábi óras ki es ta trabadja i óras ki es ta diskansa.
KONSEDJU DI BÍBLIA: ‘É midjór ten un mô xeiu di diskansu di ki ten dôs mô xeiu di trabadju duru i ta kóre tras di béntu.’ — Eclesiastes 4:6.