Modi ki aparelhus iletróniku ta afeta bus fidju?
Mininus é bon na uza aparelhus iletróniku, é sima ki es nase ku un tablet ô ku un telemóvel na mô. Dja pa un algen adultu, pode ser más difísil pa el prende uza kes novu tekinolojia.
Pa otu ladu, alguns algen dja repara ma kes jóven ki ta pasa txeu ténpu na internet ten tendénsia di. . .
fika visiadu na aparelhus iletróniku.
manda ô resebe mensájens ku kuzas ki ta mágua algen.
odja pornografia, mésmu sen es krê.
KUZÊ KI BU DEBE SABE
FIKA VISIADU
Alguns kuza na internet, sima jogus, fazedu própi pa poi algen visiadu. Un livrua ta fla: “Kes aplikativu di telemóvel fazedu pa pô-nu koladu na telemóvel.” Kantu más nu uza un aplikativu ki ten publisidadi, más dinheru kes algen ki ta faze kes publisidadi ta ganha.
PENSA NA KEL-LI: Ta parse ma bus fidju ka ta pode vive sen telemóvel? Modi ki bu pode djuda-s uza ses ténpu di midjór manera? — EFÉSIOS 5:15, 16.
MENSÁJENS KU KUZAS KI TA MÁGUA ALGEN
Alguns algen ta konporta mariadu ku otus algen, es ta fika violéntu i es ka ta preokupa ku sentimentus di otus algen óras ki es ta sta na internet. Kes kuza li pode pô-s ta mágua i ta faze trósa di otus algen.
Alguns algen ta aji si, pa es pode txoma atenson pa ses kabésa i pamodi es sta dizusperadu pa algen gosta di es i pa sigi-s na ses redi sosial. Dja otus, ta xinti maguadu óras ki es ka ta konvidadu pa algun kuza. Pur izénplu, kel-li pode kontise óras ki es ta sabe ma es ka konvidadu pa un fésta.
PENSA NA KEL-LI: Bus fidju ta konporta mariadu óras ki es sta na internet? (Efésios 4:31) Modi ki es ta xinti óras ki es ka konvidadu pa algun kuza?
PORNOGRAFIA
Pornografia é un kuza fásil di odja na internet. Pai ku mai debe ntende ma nbóra ten maneras di es kontrola kuzê ki ses fidju sta ta odja na internet, nen sénpri es ka ta funsiona.
Pode ser kóntra lei manda ô resebe imajis di algen nu pa telemóvel. Di akordu ku leis di kel lugar i di idadi di kes ki sta nvolvidu, na alguns kazu kes algen ki manda kel tipu di mensaji li pode ser akuzadu di spadja pornografia di kriansas.
PENSA NA KEL-LI: Modi ki bu pode djuda bus fidju ka kai na armadilha di odja ô manda imajis ki ta mostra konportamentu seksual mariadu? — EFÉSIOS 5:3, 4.
KUZÊ KI BU DEBE FAZE
TRENA BUS FIDJU
Nbóra é fásil pa jóvens uza aparelhus iletróniku, inda es meste di orientason. Ten un livrub ki ta fla ma dexa un mininu uza un telemóvel ô internet sen inxina-l modi ki el ta uza-l di manera suguru é sima “dexa-l kai di kabésa na un pisina sen el sabe nada.”
PRINSÍPIU DI BÍBLIA: ‘Iduka mininu na kaminhu ki el debe anda; mésmu óras ki el bira bédju, el ka ta disvia di el.’ — PROVÉRBIOS 22:6, NÓTA DI RODAPÉ.
Djobe kal di kes kuza li ki bu ta gostaba di faze ô skrebe bus própi ideia.
Pâpia ku nha fidju sobri modi ki el ta konporta na internet
Djuda nha fidju lida ku ses sentimentu óras ki el sta xinti el sô pamodi es ka konvida-l pa algun kuza
Blokia kes site ki ten kuzas mariadu
Di vês en kuandu djobe kuzê ki nha fidju ten na se telemóvel
Poi un limiti di kantu óra pa dia nha fidju pode uza telemóvel
Ka dexa nha fidju ten aparelhu iletróniku na se kuartu na óra ki el debe durmi
Poi un régra pa ningen ka uza telemóvel na óra di kume