Alguns anju rabela na Séu

Tudu anju ki Jeová faze éra dretu. Má un di es kaba pa bira mau, ki é Satanás ô Diabu. Satanás kria pa algen na Téra adora-l envês di es adora Jeová. Odja kuzê ki kontise.

Na jardin di Éden tinha txeu arvi ki ta daba fruta sábi. Jeová fla Adon, ku se mudjer Eva, ma es pode kumeba kes fruta avontádi. Má Deus fla-s pa es ka kume fruta di un arvi. I el fla-s ma si es kumeba el, di sertéza es ta moreba. — Génesis 2:9, 16, 17.

Un dia Eva staba el sô i un kóbra pâpia ku el. É klaru ki ka éra kel kóbra ki staba ta pâpia ku Eva. Éra Satanás ô Diabu ki poi kel kóbra ta parse ma el staba ta pâpia. Satanás fla Eva ma si el kumeba kel fruta ki Deus proibiba es, el ta fikaba ta ten txeu sabedoria sima Deus. El fla-l tanbê ma el ka ta moreba. Tudu kes kuza ki el fla éra sô mintira. Má simé, Eva kridita na Satanás i el kume kel fruta. Dipôs el da Adon i el kume tanbê. — Génesis 3:1-6.

Kel stória li, ki kontise mê, ta djuda-nu odja ma Satanás é rebéldi i mintirozu. El fla Eva ma si el ka obiba ku Deus, el ka ta moreba. Kel-la éra un mintira pamodi el ku Adon kaba pa móre. Satanás ka móre na kel ténpu, má el ta ben móre na futuru pamodi el peka. Má timenti kel-li ka kontise, el ta kontinua ta ngana algen li na Téra. Inda el é mintirozu i el ta tenta poi otus algen ta aji kóntra kes lei di Deus. — João 8:44.

Otus anju rabela tanbê

Dipôs otus anju bira mau tanbê. Kes anju odja uns mudjer bunita li na Téra i es kria ten relason seksual ku es. Nton, es transforma na korpu di ómi i es ben pa Téra. Dipôs es fika ku kes mudjer. Má kel-li éra kóntra vontadi di Deus. — Génesis 6:1, 2; Judas 6.

Kontise un monti di disgrasa na Téra pamodi kel-li. Kes mudjer di kes anju tevi fidjus, má kes mininu ka éra normal. Kantu es kria, es bira jigantis violéntu i mau. Téra kaba pa fika ku txeu violénsia, ki Jeová disidi kaba ku tudu kes algen mau através di un dilúviu. Kes úniku algen ki skapa di kel Dilúviu éra Nué ku se família, ki éra algen justu. — Génesis 6:4, 11; 7:23.

Kes anju mau ka móre i es torna bai pa Séu. Má es kastigadu i Deus ka dexa-s torna faze párti di kel família di anjus justu. Alén di kel-li, Jeová ka dexa-s torna transforma na korpu di ómi más. I na futuru es ta ben móre na kel grandi julgamentu. — 2 Pedro 2:4; Judas 6.

Satanás tradu di Séu

Lógu na komésu di séklu 20 tevi un géra na Séu. Livru di Apocalipse ta splika kuzê ki kontise: ‘Kumesa un géra na Séu: Migel [ki é Jizus Kristu dipôs ki el resusitadu] ku se anjus [bon] géra kóntra dragon [ki é Satanás], i dragon ku se anjus [mau] géra, má es ka ganha géra, i nen ka tinha más lugar pa es na séu. Nton, kel grandi dragon botadu pa baxu, kel primeru kóbra, ki ta txomadu di Diabu i Satanás, ki sta ta ngana Téra interu. El botadu pa baxu, pa Téra, i se anjus [mau] botadu pa baxu djuntu ku el.’

Kal ki foi rezultadu? Livru di Apocalipse ta kontinua ta fla: ‘Pur isu, nhos fika rei di kontenti, ó séu, i nhos ki ta mora na el!’ Kes anju bon fika kontenti pamodi Satanás ku kes anju mau tradu di Séu. Má i kes algen na Téra? Bíblia ta fla: ‘Ai di Téra i di mar, pamodi Diabu dixi pa nhos xeiu di raiba, dja ki el sabe ma falta-l poku ténpu.’ — Apocalipse 12:7-9, 12.

Satanás ku kes anju mau ta ngana algen na Téra i es ta ranja-nu un monti di prubléma. Kes anju mau txoma dimónis. Es é inimigu di Deus i tudu es é mau.