LISON 10

Modi ki runions di Tistimunhas di Jeová pode djuda-u?

Formatu di livru na papel

Dja bu kustuma sisti un runion di Tistimunhas di Jeová? Si inda bu ka bai, talvês bu pode ka xinti avontádi di bai pa primeru bês. Talvês bu pode pergunta: ‘Kuzê ki ta kontise na kes runion? Pamodi ki runion é inportanti? Pamodi ki N debe bai runion?’ Na kel lison li, bu ta ben prende ma sisti runion ta djuda-u i el ta pô-u bira más amigu di Deus.

1. Kal ki é razon más inportanti pa nu sisti runion?

Odja kuzê ki un skritor di Bíblia fla: ‘Na kongregason grandi, N ta lova Jeová.’ (Salmo 26:12) Di mésmu manera, Tistimunhas di Jeová ta fika txeu kontenti óras ki es ta sta djuntu na runion. Tudu simana na mundu interu, es ta djunta pa adora Deus, pa kanta i pa faze orason. Tanbê alguns bês pa anu, es ta djunta pa faze runions más grandi pa adora Deus.

2. Kuzê ki bu ta ba prende na nos runion?

Na runion ta inxinadu ku bazi na Palavra di Deus i ‘ta splikadu di manera klaru kuzê ki el krê fla’. (Lé Neemias 8:8.) Na nos runion, bu ta bai prende sobri Jeová i se kualidadis bunitu. Sima bu ta ba ta prende más sobri se amor pa bo, bu ta bira más se amigu. Tanbê bu ta ba prende modi ki el pode djuda-u ten un vida sábi. — Isaías 48:17, 18.

3. Modi ki kes algen ki bu ta sisti runion djuntu ku es pode djuda-u?

Jeová ta fla-nu ‘pa nu insentiva kunpanheru pa amor i pa bons óbra, i pa nu ka dexa di sta na runion’. (Hebreus 10:24, 25) Na nos runion, bu ta ba konxe pesoas ki ta preokupa ku kunpanheru di verdadi i ki sima bo, es krê prende más sobri Deus. Bu ta ba xinti animadu ku kes kuza ki bu ta obi sobri Bíblia. (Lé Romanos 1:11, 12.) Tanbê bu ta ba konxe otus algen, solteru i kazadu, ki sta kontenti sikrê ku prublémas. Kes-li é sô alguns motivu ki Jeová krê pa nu sta sénpri djuntu na runion.

SABE MÁS

Odja kuzê ki ta kontise na runions di Tistimunhas di Jeová i pamodi ki é bon faze sforsu pa sisti-s.

4. Runions di Tistimunhas di Jeová

Na ténpu di apóstlus, kristons sénpri ta djuntaba pa adora Jeová. (Romanos 16:3-5) Lé Colossenses 3:16, i dipôs pâpia sobri kel pergunta li:

Modi ki kristons na ténpu di apóstlus ta adoraba Jeová?

Oji tanbê Tistimunhas di Jeová ta djunta sénpri na ses Salon di Reinu. Pa sabe modi ki ses runion ta fazedu, odja VÍDIU. Dipôs odja dizenhu di un runion i pâpia sobri kes pergunta li:

VÍDIU: Kuzê ki ta kontise na un Salon di Reinu? (2:13)

Kuzê ki bu odja ma ta fazedu na un runion di Tistimunhas di Jeová ki é igual ku kuzê ki bu lé na Colossenses 3:16?
Na vídiu ô na kel dizenhu, bu repara algun otu kuza ki bu gosta na runion?

Lé 2 Coríntios 9:7, i dipôs pâpia sobri kel pergunta li:

Pamodi ki na runions di Tistimunhas di Jeová ka ta pididu dinheru?

Djuntu ku bu instrutor, odja kuzê ki sta ba papiadu di el na kel otu runion.

Ki párti na runion bu ta atxa ma bu ta ba gosta más txeu ô ki pode djuda-u?

Bu sabia?

Na jw.org, bu ta pode sabe na undi i ki óra ki runions ta fazedu na mundu interu.

Dizenhus: Kuzas ki ta kontise antis, duránti i dipôs di un runion na Salon di Reinu. Kes kuza li sta kontise na dizenhus 1 ti 4.

1. Un irmon na tribuna ta faze un párti ku bazi na Bíblia na un runion.

Nos runion ten diskursus, dimonstrasons i vídius. Runion ta kumesa i ta tirmina ku kántiku i orason.
Na alguns párti na runion, kes algen ki sta sisti pode partisipa.
Tudu algen é ben-vindu: famílias, solterus, kes algen di idadi i mininus.
Nos runion é di grasa. Tistimunhas di Jeová ka ta kobra nada pa entra i es ka ta pidi dinheru.

5. Ta iziji sforsu pa sisti runion

Odja izénplu di família di Jizus. Tudu anu es ta andaba uns três dia di Nazaré ti Jiruzalen pa ba ténplu, i kel kaminhu tinha montanhas. Lé Lucas 2:39-42, i dipôs pâpia sobri kes pergunta li:

Bu ta atxa ma kel viaji pa Jiruzalen ta izijiba sforsu?
Pamodi ki talvês bu ten ki faze sforsu pa bu sisti runions?
Bu ta atxa ma bale péna? Pamodi?

Dizenhus: Juzé, Maria, Jizus i un di kes irmon di Jizus ta pripara pa un viaji. 1. Juzé ta poi bólsas riba un buru i Maria sta ta pripara kumida pa es leba. 2. Un mapa ki ta mostra kaminhu di Nazaré ti Jiruzalen.

Bíblia ta fla ma sta djuntu na runion pa adora Deus é txeu inportanti. Lé Hebreus 10:24, 25, i dipôs pâpia sobri kel pergunta li:

Pamodi ki nu debe sta sénpri na runion?

ALGUNS ALGEN TA FLA: “Bu ka meste bai runion. Sô kel studu di Bíblia na kaza dja txiga.”

Ki testu ô izénplu di Bíblia ta mostra kuzê ki Jeová krê?

REZUMU

Sisti runion ta djuda-u prende más sobri Jeová, bira bu amizadi ku el más fórti i adora-l djuntu ku otus algen.

Perguntas di rezumu

Pamodi ki Jeová ta insentiva-nu pa nu sisti runion?
Kuzê ki bu ta prende na runions di Tistimunhas di Jeová?
Bu ta atxa ma runions pode djuda-u di algun otu manera?

Dia ki N tirmina kel lison li:

Sprimenta faze kel-li

Sisti runion i tenta konxe kes algen ki sta la.

Sprimenta tanbê:

Otu kuza pa bu sprimenta

DJOBE MÁS

I si bu ka sta xinti avontádi pa sisti runion? Odja modi ki un ómi ki xinti di kel manera li fika ta gosta di sisti runions.

Nunka nu ka ta skese modi ki nu tratadu (4:16)

Odja pamodi ki un jóven gosta di runion i kuzê ki el faze pa kontinua ta sisti.

N gosta txeu di runion! (4:33)

Prende modi ki otus ta xinti sobri sisti runion.

“Pamodi ki é bon bu sisti runion na Salon di Reinu?” (Artigu na jw.org)

Odja modi ki un ómi ki ta fazeba párti di un grupu violéntu muda se vida dipôs ki el sisti un runion di Tistimunhas di Jeová.

“N ka ta baba ninhun lugar sen nha pistóla” (Sentinéla, 1 di julhu di 2014)