Ken ki é Jizus?

Jizus é un di kes algen más famozu na stória di mundu. Txeu algen sabe nómi di Jizus, má es ka konxe-l dretu. Tanbê es ten ideias diferenti sobri ken ki é Jizus. Kuzê ki Bíblia ta fla sobri el?

1. Ken ki é Jizus?

Jizus é un anju poderozu ki ta vive na Séu. Jeová kria-l antis di el faze kalker otu kuza. É pur isu ki el ta txomadu di ‘primeru di tudu kriason’. (Colossenses 1:15) Bíblia ta fla ma Jizus é ‘Fidju unijénitu’ di Deus pamodi é sô el ki Deus kria ku se mô. (João 3:16) Jizus trabadja djuntu ku se Pai, Jeová, i el djuda-l kria tudu kes otu kuza. (Lé Provérbios 8:30.) Jizus kontinua ta ten un amizadi fórti ku Jeová. Ku lialdadi, el ta sirbi sima pórta-vós di Deus, ô ‘Palavra’, i el ta leba Se mensaji i instrusons. — João 1:14.

2. Pamodi ki Jizus ben Téra?

Dja ten uns 2 mil anu ki Jeová uza se spritu santu pa poi vida di Jizus na bariga di un vírjen, ki txomaba Maria. Di kel manera li, Jizus nase na Téra. (Lé Lúkas 1:34, 35, BPK.) Jizus ben Téra pa ser kel Misías ki staba pa binha, ô Kristu, i pa salva-nu.a Tudu kes profesia ki sta na Bíblia sobri Misías kunpri na el. Kel-li djuda pesoas sabe ma Jizus éra ‘Kristu, Fidju di kel Deus ki é bibu.’ — Mateus 16:16.

3. Undi ki Jizus sta gósi?

Dipôs ki Jizus móre, Deus resusita-l sima un anju i el volta pa Séu. La, ‘Deus pô-l na un puzison más altu’. (Filipenses 2:9) Jizus gósi é un anju poderozu, i é sô Jeová ki ten más puder ki el.

4. Jizus é ka Deus Tudu-Poderozu

Bíblia ta inxina ma nbóra Jizus é un anju poderozu na Séu, el ta obi ku Jeová, ki é se Pai i se Deus. Pamodi ki nu ta fla kel-li? Odja VÍDIU pa bu sabe ma Bíblia ta inxina ma Jizus é diferenti di Deus Tudu-Poderozu.

VÍDIU: Jizus Kristu é Deus? (3:22)

Kes testu ki sta li ta djuda-nu ntende ma Jizus é diferenti di Jeová. Lé kada testu di Bíblia i dipôs pâpia sobri kes pergunta ki sta dibaxu di es:

Lé Lúkas 1:30-32, BPK.

• Kuzê ki anju fla ki ta mostra ma Jizus é diferenti di Jeová, kel “ki sta di riba tudu”?

Lé Mateus 3:16, 17.

• Kantu Jizus batiza, kuzê ki kel vós la di Séu fla?

• Di kenha ki bu ta atxa ma éra kel vós?

Lé João 14:28.

• Na un família, kenha ki é más bédju i ki ten más autoridadi? Pai ô fidju?

• Jizus txoma Jeová di se Pai. Kuzê ki kel-li ta inxina-nu?

Lé João 12:49.

• Jizus ta atxa ma el ku se Pai é mésmu algen? Kuzê ki bu ta atxa?

5. Kuzê ki prova ma Jizus éra Misías

VÍDIU: Jizus kunpri profesias (3:03)

Lé kes profesia ki sta na Bíblia i dipôs pâpia sobri kes pergunta li:

Lé Miqueias 5:2 pa bu sabe undi ki Misías ta ben naseba.b

• Kel profesia li kunpri? — Mateus 2:1.

Lé Salmo 34:20 i Zacarias 12:10 pa bu sabe kuzê ki profesias dja flaba sobri modi ki Misías ta moreba.

• Kes profesia li kunpri? — João 19:33-37.

• Bu ta atxa ma Jizus faze algun kuza pa poi kes profesia li ta kunpri?

• Kuzê ki kel-li ta prova sobri Jizus?

REZUMU

Jizus é un anju poderozu. El é Fidju di Deus i el é Misías.

Perguntas di rezumu

• Pamodi ki Jizus ta txomadu di ‘primeru di tudu kriason’?

• Kuzê ki Jizus faze antis di el ben Téra?

• Modi ki nu sabe ma Jizus é Misías?

DJOBE MÁS

Prende más sobri modi ki nu sabe ma Jizus éra Misías.

“Profesias di Bíblia ta prova ma Jizus éra Misías?” (Artigu na jw.org)

Odja si Bíblia ta inxina ma Deus bira pai di Jizus di mésmu manera ki un algen ta bira pai di un fidju.

“Pamodi ki Jizus ta txomadu di Fidju di Deus?” (Artigu na jw.org)

Odja pamodi ki Bíblia ka ta inxina sobri Trindadi.

“Jizus é Deus?” (Sentinéla, 1 di abril di 2009)

Lé sobri modi ki un mudjer muda se vida dipôs ki el piskiza kuzê ki Bíblia ta fla sobri Jizus.

“Un mudjer judeu splika pamodi ki el rezolve konfirma si se relijion staba dretu” (Nhos korda!, maiu di 2013)