LISON 54
Kenha ki é ‘kel skravu fiel i prudenti’ i kuzê ki el ta faze?
Jizus é Kabésa di kongregason. (Efésios 5:23) Oji, la di Séu, Jizus sta ta uza un ‘skravu fiel i prudenti’ pa orienta se sigidoris na Téra. (Lé Mateus 24:45.) Jizus skodje kel ‘skravu’ i el da-l autoridadi pa toma alguns disizon. Má simé, kel skravu ten ki obi ku Jizus i sirbi irmons di Kristu. Kenha ki é kel skravu? Modi ki kel skravu ta kuida di nos?
1. Kenha ki é ‘kel skravu fiel i prudenti’?
Jeová sénpri uza un ómi ô un grupu pikinoti di ómis pa orienta se povu. (Malaquias 2:7; Hebreus 1:1) Dipôs ki Jizus móre, apóstlus i ansions na Jiruzalen kumesa ta toma kónta di trabadju. (Atos 15:2) Di mésmu manera, oji un grupu pikinoti di ansions ta da-nu kumida spritual i ta orienta trabadju di pregason. Es ta txomadu di Grupu Enkaregadu di Óbra di Tistimunhas di Jeová. Kel grupu li é ‘kel skravu fiel i prudenti ki Jizus poi pa toma kónta’ di kes responsabilidadi la. (Mateus 24:45a) Tudu kes ki ta faze párti di Grupu Enkaregadu di Óbra é kristons skodjedu ku spritu santu. Es ta ba governa djuntu ku Jizus na se Reinu na Séu óras ki es tirmina ses vida na Téra.
2. Ki kumida spritual kel skravu fiel ta da?
Jizus fla ma kel skravu fiel ta daba se sigidoris ‘kumida na óra sértu’. (Mateus 24:45b) Sima kes kumida ki nu ta kume ta djuda-nu ten forsa i saúdi, kumida spritual, ki é orientason ki ta ben di Palavra di Deus, ta da-nu kel forsa ki nu meste pa nu mante lial pa Jeová i faze kel trabadju ki Jizus manda-nu. (1 Timóteo 4:6) Nu ta resebe kel kumida spritual na runions, asenbleias i kongrésus, i tanbê na publikasons i vídius ki ta djuda-nu sabe kal ki é vontadi di Deus i bira más se amigu.
SABE MÁS
Odja pamodi ki nu meste di ‘kel skravu fiel i prudenti’, ki é Grupu Enkaregadu di Óbra.
Grupu Enkaregadu di Óbra ta da Tistimunhas di Jeová na mundu interu kumida spritual, orientason i ajuda ki es meste
3. Povu di Jeová ten ki sta organizadu
Na ténpu di apóstlus, Jizus ta orientaba se sigidoris. Oji tanbê Jizus sta ta orienta Grupu Enkaregadu di Óbra pa organiza trabadju di Tistimunhas di Jeová. Odja VÍDIU.
Lé 1 Coríntios 14:33, 40, i dipôs pâpia sobri kel pergunta li:
Modi ki kes versíklu li ta mostra ma Jeová krê pa se povu sta organizadu?
4. Kel skravu fiel ta organiza nos trabadju di pregason
Pregason éra kel trabadju más inportanti ki kes primeru sigidoris di Jizus faze. Lé Atos 8:14, 25, i dipôs pâpia sobri kes pergunta li:
Na ténpu di apóstlus, ken ki ta orientaba trabadju di pregason?
Modi ki Pedru ku Juan reaji kantu kes otu apóstlus da-s orientason?
Kel trabadju más inportanti ki Grupu Enkaregadu di Óbra ta organiza é pregason. Odja VÍDIU.
Jizus mostra pamodi ki trabadju di pregason é inportanti. Lé Marcos 13:10, i dipôs pâpia sobri kes pergunta li:
Pamodi ki trabadju di pregason é rei di inportanti pa Grupu Enkaregadu di Óbra?
Pamodi ki nu meste pa ‘kel skravu fiel i prudenti’ organiza kel trabadju li na mundu interu?
5. Kel skravu fiel ta da-nu orientason
Grupu Enkaregadu di Óbra ta orienta kristons na mundu interu. Má, modi ki el ta da orientason? Odja modi ki grupu enkaregadu di óbra na ténpu di apóstlus faze kel-li. Lé Atos 15:1, 2, i dipôs pâpia sobri kes pergunta li:
Ki asuntu staba ta kria prubléma entri kes kriston na ténpu di apóstlus?
Na kenha ki Polu, Barnabé i otus kriston ba pidi orientason pa rezolve kel asuntu?
Lé Atos 15:12-18, 23-29, i dipôs pâpia sobri kel pergunta li:
Antis di toma un disizon, kuzê ki kel grupu enkaregadu di óbra faze pa es ten orientason di Deus na kel asuntu? — Odja versíklus 12, 15 i 28.
Lé Atos 15:30, 31 i 16:4, 5, i dipôs pâpia sobri kes pergunta li:
Modi ki kes kriston reaji kantu kel grupu enkaregadu di óbra da-s orientason?
Modi ki Jeová abensua-s pamodi es obi ku grupu enkaregadu di óbra?
Lé 2 Timóteo 3:16 i Tiago 1:5, i dipôs pâpia sobri kel pergunta li:
Na undi ki Grupu Enkaregadu di Óbra ta djobe orientason óras ki es ta toma disizons oji?
ALGUNS ALGEN TA FLA: “Si bu obi ku Grupu Enkaregadu di Óbra, bu sta ta sigi ómi.”
Kuzê ki ta da-u sertéza ma Jizus sta ta orienta Grupu Enkaregadu di Óbra?
REZUMU
Grupu Enkaregadu di Óbra é ‘kel skravu fiel i prudenti’ ki Jizus skodje. Kel grupu ta orienta i ta da kristons na mundu interu kumida spritual.
Perguntas di rezumu
Kenha ki skodje ‘kel skravu fiel i prudenti’?
Modi ki Grupu Enkaregadu di Óbra ta kuida di nos?
Bu ta kridita ma Grupu Enkaregadu di Óbra é ‘kel skravu fiel i prudenti’?
DJOBE MÁS
Odja modi ki Grupu Enkaregadu di Óbra sta organizadu ta faze ses trabadju.
“Kuzê ki é Grupu Enkaregadu di Óbra di Tistimunhas di Jeová?” (Artigu na jw.org)
Prende kuzê ki Grupu Enkaregadu di Óbra ta faze pa es ten sertéza ma kel kumida spritual ki nu ta resebe é di kunfiansa.
Kuzê ki kes ki ta faze párti di Grupu Enkaregadu di Óbra ta atxa di trabadju ki Jizus da-s?
Modi ki nos runions i kongrésus ta prova ma Jeová sta ta orienta Grupu Enkaregadu di Óbra?