Intruduson

Es livru, Testus di Bíblia ki ta djuda-nu faze vontadi di Jeová, pode djuda-u atxa kes versíklu di Bíblia más faxi i tanbê kes stória ki pode djuda-u lida ku prublémas ki bu sta pasa pa el. Tanbê, el pode djuda-u atxa izénplus di Bíblia ki bu meste pa inkoraja otus i djuda-s toma disizons ki ta onra Jeová. Skodje kel asuntu ki ta interesa-u. Na kada asuntu ten perguntas inportanti i alguns izénplu di Bíblia. (Djobe kuadru “Modi ki es publikason ta uzadu”.) Bu ta ben atxa testus di Bíblia ki ta da-u konsedju i konsolu ki bu meste, i tanbê bu ta atxa prinsípius di Bíblia ki bu pode uza pa djuda i inkoraja otus.

Modi ki es publikason ta uzadu

Pa bu atxa un asuntu, bu pode uza kuadru pa piskiza ô bu pode djobe pa párti ki kes asuntu sta divididu. Es livru, Testus di Bíblia ki ta djuda-nu faze vontadi di Jeová, sta divididu na 7 párti: Dizafius, Konportamentu, Kongregason, Nos dia-dia, Família, Amizadi ku Deus i Kualidadis. Bu pode atxa kel asuntu ki bu sta ta djobe na un di kes párti li. Skodje kel párti ki bu sta meste i dipôs skodje kel asuntu ki bu sta djobe. Si bu ka ten serteza ki párti ki tene kel asuntu ki bu sta meste, bai na Tudu asuntu pa bu atxa tudu kes asuntu ki ten na es publikason. Dibaxu di kada asuntu bu ta atxa alguns subtéma na negritu. Uns é frazi i otus é pergunta. Sima bu ta ba ta lé kes versíklu, pensa modi ki es ta apoia kel frazi ô responde kel pergunta. Alguns asuntu sta divididu na pártis pa djuda-u atxa kel informason ki bu sta ta djobe más faxi. Na alguns kazu bu ta atxa versíklus di Bíblia ku kes palavra li: “Tanbê djobe”. Kes versíklu ta da-u otus ideia ki ten aver ku kel asuntu. Na txeu kazu, tanbê bu ta atxa “Izénplus di Bíblia ki pode djuda-u”. Dipôs di kada “Izénplus di Bíblia ki pode djuda-u”, bu ta atxa un frazi kurtu ki ta splika kel asuntu prinsipal di kes versíklu. Kes frazi ta djuda-u sabe na kuzê ki bu debe pensa óras ki bu ta lé kes versíklu.

Na es publikason, bu ka ta atxa tudu kes testu di Bíblia ki ten aver ku un asuntu ki bu sta ta djobe. El fazedu pa djuda-u atxa kes testu di Bíblia ki ta djuda-u midjór i dipôs bu pode uza otus feraménta pa prende más si bu meste. (Pr 2:1-6) Pa bu faze más piskiza uza kes referénsia i kes nóta di studu na Traduson di Mundu Novu si el sta na un língua ki bu ta intende. Uza Publikason pa djuda Tistimunhas di Jeová faze piskiza ô Índice das Publicações da Torre de Vigia pa bu sabe más sobri un testu. Kes feraménta li ta mostra kuzê ki dja skrebedu sobri un testu. Kes publikason más novu ta mostra-u kel intendimentu más atualizadu sobri un testu.

Pa es livru, Testus di Bíblia ki ta djuda-nu faze vontadi di Jeová, djuda-u atxa sabedoria, konhisimentu i intendimentu ki sta na Palavra di Deus. Sima bu ta ba ta uza es livru, bu ta ten más serteza ma “palavra di Deus é bibu i el ten puder”. — Eb 4:12.