Modi ki nu pode ten pas

NU STA ta vive na un mundu xeiu di prubléma, pur isu, nu meste faze txeu sforsu pa nu ten pas. Óras ki nu atxa ma nu tene pas, ta kontise algun kuza ki ta tra-nu el. Modi ki Bíblia pode djuda-nu ten pas di verdadi i ka perde-l? Modi ki nu pode djuda otus ten pas?

KUZÊ KI NU MESTE FAZE PA NU TEN PAS DI VERDADI?

Pa nu ten pas déntu nos, nu meste xinti suguru i kalmu. Tanbê nu debe ten un bon amizadi ku otus algen. I si nu krê pa nos pas ka kaba nunka más, nu meste ten un amizadi fórti ku Deus. Modi ki nu pode ser se amigu?

Óras ki nu ta faze tudu kel ki Jeová ta pidi-nu, nu ta mostra ma nu ta kúnfia na el i ma nu krê sta na pas ku el. (Jer. 17:7, 8; Tia. 2:22, 23) Asi, Jeová ta bira nos amigu i el ta da-nu kel pas déntu nos. Isaías 32:17 ta fla: ‘Rezultadu di justisa di verdadi ta ser pas, i frutu di justisa di verdadi ta ser soségu i suguransa pa tudu ténpu.’ Jeová ta da ‘soségu i suguransa’ pa kes algen ki ta obi ku el di korason. — Isa. 48:18, 19.

Spritu santu é otu kuza ki pode djuda-nu xinti pas. El é un prezenti di txeu valor ki nos Pai ta da-nu. — Atos 9:31.

SPRITU DI DEUS TA DJUDA-NU TEN PAS

Apóstlu Polu fla ma pas ta faze párti di ‘frutu di spritu’. (Gál. 5:22, 23) Sô spritu santu di Jeová ki pode djuda-nu ten pas di verdadi. Pur isu, si nu krê xinti pas déntu nos, nu meste dexa spritu santu gia-nu. Nu ben odja dôs manera ki spritu di Deus ta djuda-nu ten pas.

Primeru, pa nu ten pas nu meste lé Bíblia tudu dia. (Sal. 1:2, 3) Óras ki nu ta tra ténpu pa nu pensa na kuzê ki Bíblia ta fla, spritu santu ta djuda-nu odja txeu asuntu sima Jeová ta odja. Pur izénplu, nu ta odja modi ki el é un Deus di pas i pamodi ki el ta atxa ma pas é un kuza txeu inportanti. Lé Bíblia i faze sima nu prende ta djuda-nu xinti txeu pas. — Prov. 3:1, 2.

Sugundu, nu meste pidi spritu santu di Deus. (Lucas 11:13 ) Si nu pidi ajuda di Jeová, el ta promete ma ‘pas di Deus, ki ningen ka ta konsigi ntende ta guarda [nos] korason i [nos] pensamentu ku ajuda di Kristu Jizus.’ (Fil. 4:6, 7) Si sénpri nu faze orason i nu pidi spritu santu, Jeová ta da-nu kel pas déntu nos ki sô se amigus pode xinti. — Rom. 15:13.

Kes dôs konsedju di Bíblia dja djuda un monti di algen. Es ntende ma es meste mudaba ses vida pa es pode ten pas ku ses kabésa, ku Jeová i ku otus algen. Nu ben odja dôs izénplu.

MODI KI ES ATXA PAS?

Na kongregason di Tistimunhas di Jeová ten un monti di algen ki antis ta ‘xatiaba faxi’. Má gósi es prende ser algen kalmu ku paxénxa i ki ta npenha pa pas ku otus algen.a (Prov. 29:22) Nu sta ben odja kuzê ki kontise ku dôs Tistimunha di Jeová. Ku ajuda di Jeová es vense raiba i es prende sta na pas ku otus algen.

Davidi tinha prubléma na kontrolaba se bóka. Antis di el da se vida pa Deus, el tinha ábitu di kritikaba otus algen i el ta papiaba mal ku se família. Ku ténpu, Davidi da kónta ma el meste mudaba i bira un algen di pas. Kuzê ki djuda-l atxa pas? El fla: “N kumesa ta faze kel ki Bíblia ta fla. N pasa ta ten más ruspetu pa nha família i es bira ta ruspeta-m más txeu tanbê.”

Rachel, tanbê ta atxaba difísil kontrolaba se raiba pamodi manera ki el kriadu. El fla: “Ti gósi N ten ki kontrola pamodi na nha família tudu algen éra si.” Kuzê ki djuda Rachel ser un algen di pas? El responde: “Sénpri N ta fazeba orason i N ta pidiba ajuda di Jeová.”

Sima izénplu di Davidi ku Rachel ta mostra, faze kel ki Bíblia ta fla i ora ta pidi spritu santu pode djuda-nu ten pas. Ta fika klaru ma sikrê nu sta ta vive na un mundu violéntu nu pode ten pas déntu nos. I kel pas ta djuda-nu sta na pas ku nos família i ku irmons na kongregason. Má, Jeová tanbê ta fla-nu ma nu debe ser algen ki ta ‘mante pas ku tudu algen.’ (Rom. 12:18) Nu ta pode ten pas ku tudu algen? Kuzê ki nu ta ganha óras ki nu sforsa pa mante pas?

STA NA PAS KU OTUS

Trabadju di pregason ta da-nu xansi di pâpia di un mensaji ki ta djuda otus algen ten pas. (Isa. 9:6, 7; Mat. 24:14) Inda ben ki txeu algen sta ta seta notísias sábi di Reinu. Kel-li ta djuda-s ka fika dizusperadu i ku raiba pamodi situason di kel mundu li. Es ten speransa ma kuzas ta ben muda pa midjór na futuru, pur isu es ta ‘buska pas i es ta npenha pa el.’ — Sal. 34:14.

Má nen tudu algen ka ta seta nos mensaji lógu na komésu. (João 3:19 ) Má simé, spritu santu di Deus ta djuda-nu prega notísias sábi di un manera ki ta mostra ma nos é algen di pas i ma nu ta ruspeta kes algen. Nu ta faze si pamodi nu krê sigi kel ki Jizus fla na Mateus 10:11-13: ‘Óras ki nhos entra na kaza, nhos kunprimenta kel família. Si kel kaza merese, nhos pas ta fika ku el, má si el ka merese, nhos pas ta volta pa nhos.’ Óras ki nu sigi es konsedju di Jizus, nu ta sai di kaza di kel algen na pas. Talvês, na otu dia el pode seta nos mensaji.

Alvês govérnus é kóntra nos trabadju di pregason. Má óras ki nu trata-s ku ruspetu é más faxi nu sta na pas ku es. Odja kuzê ki kontise na un país di Áfrika. Govérnu di kel país ka gostaba di Tistimunhas di Jeová, pur isu éra difísil irmons konsigiba lisénsa pa fazeba Salon di Reinu. Modi ki irmons pode rezolveba kel prubléma li na pas? Un irmon ki éra misionáriu na kel país, mandadu pa bai vizita Enbaxador di kel país di Áfrika na Inglatéra. Kel irmon krê ba splikaba kel Enbaxador ma Tistimunhas di Jeová ta fazeba un trabadju ki ta djuda ten pas. Kuzê ki kontise dipôs?

Kel irmon fla: “Kantu N txiga la N odja na ropa di kel mudjer ki atende-m ma el éra di un tribu ki N sabia papiaba se língua. Nton N kunprimenta-l na se língua. El fika spantadu i el pergunta-m: “N pode djuda nho?” Ku idukason N fla-l ma N krê pâpia ku Enbaxador i kel sinhora txoma-l pa tilifóni. Kantu Enbaxador pâpia ku mi, el kunprimenta-m na língua di se tribu. Nton N splika-l ma Tistimunhas di Jeová ta faze un trabadju di pas i el obi-m ku atenson.”

Pamodi kel irmon trata Enbaxador ku ruspetu, el muda kel ideia mariadu ki el tinha sobri Tistimunhas di Jeová. Dipôs di algun ténpu, govérnu di kel país di Áfrika ka inpidi irmons más di faze Salon di Reinu. Irmons fika txeu kontenti! Kel-li ta mostra klaru ma óras ki nu trata otus algen ku ruspetu nu ta ten bons rezultadu i pas é un di es.

BU PODE TEN PAS PA TUDU TÉNPU

Oji nu pode fla ma nu sta ta vive na un paraízu spritual pamodi nu ta vive na pas ku nos irmons. Modi ki bu pode djuda pa kel pas ka kaba nunka más? Bu ta faze kel-li óras ki bu ta sforsa pa bu ten pas, ki ta faze párti di frutu di spritu. Jeová ta fika txeu kontenti i bu ta pode vive pa tudu ténpu na pas na kel mundu novu ki el promete. — 2 Ped. 3:13, 14.