Kuzê Ki Deus Sta Ben Faze?

Si bu sta pasa pa un situason difísil, di serteza bu ta spera ma un bon amigu ta faze algun kuza pa djuda-u. Pamodi kel-li alguns algen ta fla ma Deus é ka ses amigu pamodi es ta xinti ma Deus ka sta ta faze nada pa djuda-s. Na verdadi, Deus dja faze txeu kuza pa djuda-nu i el ta ben aji pa ben kaba ku kes prublémas i sufrimentu ki nu ta pasa pa el oji. Kuzê ki Deus ta ben faze?

KABA KU TUDU MALDADI

Deus ta ben kaba ku maldadi óras ki el distrui kel algen ki ta poi maldadi ta kontise. Bíblia ta fla-nu ken ki é kel algen. El ta fla: “Mundu interu sta na puder di Malvadu.” (1 Juan 5:19) Kel “Malvadu” é kel mésmu algen ki Jizus txoma “governanti di es mundu”, ki é Satanás ô Diabu. (Juan 12:31) Influensia ki Satanás ten na mundu é kel razon prinsipal pa ten maldadi oji na téra. Kuzê ki Deus ta ben faze?

Ka ta dura Jeová Deus ta ben uza se Fidju, Jizus Kristu, pa ben ‘kaba ku kel ki ten puder di mata, ki é Diabu’. (Ebreus 2:14; 1 Juan 3:8) Na verdadi Bíblia ta mostra ma Diabu sabe ma “falta-l poku ténpu” pa el ben distruídu. (Apokalipse 12:12) Tanbê Deus ta ben kaba ku tudu kes algen ki ta faze maldadi. — Salmos 37:9; Provérbios 2:22.

BIRA TÉRA UN PARAÍZU

Dipôs di kaba ku tudu maldadi na téra, nos Kriador ta ben aji pa kunpri se vontadi di ten pesoas perfeitu ta vive pa tudu ténpu na téra. Kuzê ki nu pode spera?

Suguransa i pas pa tudu ténpu. ‘Kes algen mansu ta ben toma kónta di téra i es ta ben ten txeu alegria ku txeu pas.’ — Salmos 37:11.

Txeu kumida bon pa saúdi. ‘Ta ben ten kumida avontádi na téra, i riba monti ta ben ten un monti kumida.’ — Salmos 72:16.

Bons kaza i trabadju ki ta da alegria. ‘Es ta ben faze kazas i mora na es; es ta ben planta lugaris xeiu di pé di uva i kume ses fruta. Kes ki N skodje ta ba goza rezultadu di trabadju di ses mô.’ — Isaías 65:21, 22.

Bu tene vontadi di odja kes kuza li ta kontise? Ka ta dura kel-li ta ben ser nos rialidadi tudu dia.

DUÉNSA I MÓRTI TA DEXA DI IZISTI

Oji tudu algen ta fika duenti i ta móre, má ka ta dura kel-li ka ta ben izisti más. Falta poku ténpu pa Deus ben faze tudu kes kuza bon ki sakrifisiu di resgati di Jizus bira posível asi pa ‘tudu kel ki mostra fé na el ka ser distruídu, má pa ten vida pa tudu ténpu.’ (Juan 3:16) Kal ki ta ser rezultadu?

Duénsa ta ben dexa di izisti. ‘I ningen ki ta mora la ka ta fla: “N sta duenti.” Kel povu ki ta mora na kel téra ta purduadu ses éru.’ — Isaías 33:24.

Ningen ka ta sufri pamodi mórti. ‘El ta ben kaba ku mórti pa tudu ténpu, i Jeová, kel Sinhor Más Grandi, ta ben linpa lágua di tudu róstu.’ — Isaías 25:8.

Pesoas ta ben vive pa tudu ténpu. “Prezenti ki Deus ta da é vida pa tudu ténpu através di Kristu Jizus, nos Sinhor.” — Romanus 6:23.

Kes algen ki móre ta ben vive otu bês. “Ta ben ten un resureison di kes algen justu i tanbê di kes algen injustu.” (Atus 24:15) Pamodi kel sakrifisiu di resgati, kes algen ki móre ta ben vive otu bês.

Modi ki Deus ta ben faze tudu kel-li?

UN GOVÉRNU PERFEITU

Deus ta ben kunpri se vontadi pa nos i pa téra através di se govérnu na séu, ki Jizus Kristu ta ben governa. (Salmos 110:1, 2) I é kel govérnu li, ô Reinu, ki Jizus inxina se sigidoris faze orason ta pidi pa el, kantu el fla-s: “Nos Pai ki sta na séu, ... pa bu Reinu ben.” — Mateus 6:9, 10.

Reinu di Deus ta ben governa téra interu i el ta ben kaba ku tudu sufrimentu. Kel Reinu li é midjór govérnu ki nu pode tinha! É pamodi kel-li ki Jizus pâpia di “kes notísia sábi di Reinu” duránti se trabadju di pregason na téra i el fla se disiplus pa faze mésmu kuza. — Mateus 4:23; 24:14.

Pamodi Jeová Deus ta ama-nu txeu el promete faze tudu kes kuza li pa nos. Kel-li ka ta pô-u ta krê konxe-l i bira se amigu? Si bu skodje faze kel-li, kuzê ki el ta siginifika pa bo? Kel otu artigu ta ben splika.