Kaba ku tudu rasusinu ki é kóntra konhisimentu di Deus

1. Ki avizu apóstlu Polu da pa kristons skodjedu ku spritu santu?

APÓSTLU Polu aviza: ‘Nhos para’. Para di kuzê? ‘Nhos para di sigi kel mundu li’. (Rom. 12:2) Polu fla kes palavra li pa kes kriston di se ténpu. Kes kriston ki obi kel konsedju, dja éra didikadu pa Deus i es éra skodjedu ku spritu santu. Nton, pamodi ki Polu da-s kel avizu li? — Rom. 1:7.

2-3. Kuzê ki Satanás ta tenta faze pa disvia-nu di Jeová, má modi ki nu pode tra ideias ki sta ben finkadu na nos menti?

² Polu staba preokupadu pamodi alguns kriston staba ta ser influensiadu pa kes rasusinu i filozofias di mundu di Satanás. (Efé. 4:17-19) Kel-li pode kontise ku kalker un di nos. Satanás, ki é deus di kel mundu li, sta ta faze di tudu pa disvia-nu di Jeová, pur isu el ta uza txeu armadilha. Pur izénplu, si nu krê ser un algen inportanti ô famozu, el ta uza kel dizeju li pa tenta disvia-nu di Jeová. Tanbê el pode uza kuzas ki kontise na nos vida, nos kultura ô skóla ki nu ten pa pô-nu ta pensa sima el.

³ Nu pode tra ideias ki sta ben finkadu na nos menti? (2 Cor. 10:4) Odja modi ki Polu responde: ‘Nu sta ta kaba ku tudu rasusinu i tudu barera ki ta labanta kóntra konhisimentu di Deus, i nu sta ta poi tudu pensamentu prézu, pa nu pô-l ta obi ku Kristu’. (2 Cor. 10:5) Sin, ku ajuda di Jeová nu pode kontrola nos manera di pensa. Sima un ramedi pode kaba ku kel mal ki un venénu ta faze-nu, Palavra di Deus pode djuda-nu kaba ku kes mal ki venénu di es mundu di Satanás pode faze-nu.

‘NHOS TROKA NHOS MANERA DI PENSA’

4. Ki mudansas txeu di nos faze kantu nu prende kuzê ki Bíblia ta inxina?

⁴ Pensa na kes mudansa ki bu tinha ki fazeba kantu bu prende kuzê ki Bíblia ta inxina, i bu disidi sirbi Jeová. Pa sirbi Jeová, txeu di nos tevi ki para di faze kuzas mariadu. (1 Cor. 6:9-11) Nu ta fika kontenti pamodi Jeová djuda-nu para di faze kes kuza mariadu.

5. Kal ki é kes dôs kuza ki Romanos 12:2 ta fla-nu pa nu faze?

⁵ Má, nunka nu ka debe pensa ma nu ka meste faze más mudansa. Mésmu ki nu para di faze pekadus gravi ki nu ta fazeba antis di nu batiza, inda nu meste kontinua ta trabadja duru pa ivita kalker kuza ki pode pô-nu ta faze kes pekadu gravi otu bês. Modi ki nu pode faze kel-li? Polu responde: ‘Nhos para di sigi kel mundu li, má nhos troka nhos manera di pensa pa nhos pode transforma’. (Rom. 12:2) Nton, nu ten ki faze dôs kuza. Primeru, nu meste ‘para di sigi’, ô di ser influensiadu, pa kel mundu li. Sugundu, nu meste ‘transforma’ ô muda nos manera di pensa.

6. Kuzê ki nu ta prende ku kes palavra di Jizus ki sta na Mateus 12:43-45 ?

⁶ Kel mudansa ki Polu pâpia di el, ka éra sô muda kuzê ki nos é pa fóra. Kel-li ta nvolve faze un mudansa grandi di pa déntu. (Odja kuadru “Nu transforma ô nu sta disfarsadu?”) Nu meste faze un mudansa konplétu na nos manera di pensa, na nos konportamentu, sentimentus i dizejus. Nton, nos tudu nu debe pergunta nos kabésa: ‘Kes mudansa ki N sta ta faze pa N bira un kriston é sô pa fóra, ô N sta ta bira un kriston di verdadi di pa déntu?’ É inportanti nu sabe kal ki é diferénsa. Na palavras di Jizus ki sta na Mateus 12:43-45, el mostra kuzê ki nu ten ki faze. (Lé.) Kes palavra ta inxina-nu un lison inportanti: Nu ka debe sô libra di pensamentus mariadu; má tanbê nu meste troka-s pa pensamentus ki ta agrada Deus.

‘NHOS BIRA NHOS MANERA DI PENSA MÁS NOVU’

7. Modi ki nu pode muda kel algen ki nos é di pa déntu?

⁷ Má, nu ta pode muda kel algen ki nos é di pa déntu? Bíblia ta responde: ‘Nhos kontinua ta bira nhos manera di pensa más novu i nhos troka nhos manera di ser pa un otu novu, ki kriadu sima Deus ta krê, ku justisa verdaderu i lialdadi.’ (Efé. 4:23, 24) Sin, nu ta pode muda kel algen ki nos é di pa déntu. Má é ka un kuza faxi di faze. Nu meste faze más di ki sô ivita dizejus mariadu i ka faze kuzas ki Jeová ka gosta. Nu meste ‘bira nos manera di pensa, más novu.’ Kel-li ta nvolve muda nos dizeju, nos atitudi i nos intenson. Faze kes mudansa li, ta iziji pa nu kontinua sénpri ta sforsa.

8-9. Modi ki spiriénsa di un irmon ta mostra ma nu meste muda kel algen ki nos é di pa déntu?

⁸ Nu ben odja izénplu di un irmon ki antis éra violéntu. El ta bebeba txeu i el ta brigaba ku otus algen, má dipôs, el dexa di faze kes kuza la i el batiza. Kel-la da un grandi tistimunhu na kel zóna undi el ta moraba. Má un dia di noti, poku ténpu dipôs ki el batiza, kontise un situason ki el ka sta speraba. Un ómi moku bai se kaza i el krê pa es brigaba. Na komésu, kel irmon konsigi kontrola i el ka briga. Má dipôs ki kel ómi pâpia mal di nómi di Jeová, kel irmon fika uma xatiadu ki el ka konsigi kontrola más se raiba. El sai na rua i el sota kel ómi. Pamodi ki el faze kel-la? Nbóra kuzas ki el prende na Bíblia djuda-l kontrola se manera violéntu, inda el ka mudaba se manera di pensa. Kel-li ta mostra ma inda el éra kel mésmu algen di pa déntu.

⁹ Má, kel irmon ka dizisti. (Pro. 24:16) Ku ajuda di ansions, el kontinua ta faze prugrésu. Ku ténpu el bira un ansion. Nton un dia di noti, fóra di Salon di Reinu, el pasa pa un situason kuazi igual ku kel ki kontise dja tinha alguns anu. Un ómi ki staba moku krê sotaba un di kes ansion. Kuzê ki nos irmon faze? Ku kalma i ruspetu, el pâpia ku kel ómi moku, el djuda-l fika kalmu i ti el djuda-l bai pa kaza. Pamodi ki di es bês nos irmon reaji di manera diferenti? Nos irmon dja mudaba se manera di pensa. Di pa déntu, el bira un algen mansu i umildi. Kel-la traze txeu lovor pa Jeová!

10. Kuzê ki nu meste faze pa nu muda kel algen ki nos é di pa déntu?

¹⁰ Kes mudansa li ka ta kontise di un óra pa kel otu ô sen nu faze sforsu. Talvês nu meste faze txeu sforsu duránti txeu anu. (2 Ped. 1:5) Kes mudansa li ka ta kontise sô pamodi dja nu ten txeu ténpu na verdadi. Nu meste kontinua ta faze tudu kel ki nu pode pa nu muda kel algen ki nos é di pa déntu. Ten alguns kuza ki nu pode faze pa djuda-nu muda. Nu ben odja alguns di es.

MODI KI NU PODE MUDA NOS MANERA DI PENSA

11. Modi ki orason ta djuda-nu muda nos manera di pensa?

¹¹ Orason é kel primeru kuza más inportanti ki nu debe faze. Nu meste faze orason sima kel skritor di salmo: ‘Kria na mi un korason puru, ó Deus, i poi déntu mi un spritu novu i firmi.’ (Sal. 51:10) Nu ten ki rekonhise ma nu meste muda nos manera di pensa i pidi Jeová pa djuda-nu. Modi ki nu sabe ma Jeová ta djuda-nu faze mudansa? Pur izénplu, kes israelita na ténpu di proféta Ezekiel éra temozu. Má promésa ki Jeová faze-s ta nkoraja-nu. El fla: ‘N ta ben da-s un korason unidu i N ta poi na es un spritu novu i N ta da-s un korason di karni, [ô, ki ta seta orientasons di Deus].’ (Eze. 11:19; nóta di rodapé) Jeová krê djudaba kes israelita, i tanbê el krê djuda-nu.

12-13. (a) Di akordu ku Salmo 119:59, na kuzê ki nu meste midita? (b) Ki perguntas bu debe faze bu kabésa?

¹² Midita na kuzas ki nu ta lé é kel sugundu kuza inportanti ki nu pode faze. Óras ki nu ta lé Bíblia tudu dia, nu debe tra ténpu pa pensa dretu na ki mudansas nu meste faze na nos pensamentus i sentimentus. (Lé Salmo 119:59; Heb. 4:12; Tia. 1:25) Nu meste sabe si nos menti ô korason ka sta influensiadu pa filozofias di mundu. Nu meste ser onéstu i seta ma nu ten frakézas i dipôs sforsa pa nu libra di es.

¹³ Pur izénplu, pergunta bu kabésa: ‘Sta algun tipu di invéja ô siumi na nha korason?’ (1 Ped. 2:1) ‘N ta xinti ma mi é midjór ki otus algen pamodi nha rasa, skóla ki N ten ô pamodi N ten más dinheru?’ (Pro. 16:5) ‘N ta atxa ma mi é más inportanti ki kes algen ki ka ten kes mésmu kuza ki mi ô ki é di otu rasa?’ (Tia. 2:2-4) ‘N gosta di kes kuza ki mundu di Satanás ta oferese?’ (1 João 2:15-17 ) ‘N gosta di odja diverson ki ten konportamentu mariadu i ki é violéntu?’ (Sal. 97:10; 101:3; Amós 5:15 ) Bus respósta pode mostra na undi ki bu meste midjora. Si nu konsigi tra di nos korason kes ideia ki sta ben finkadu na nos, nu ta agrada nos Pai ki sta na Séu. — Sal. 19:14.

14. Pamodi ki é txeu inportanti nu skodje bons amigu?

¹⁴ Skodje bons amigu é kel tirseru kuza inportanti. Talvês nu ka ta da kónta, ma nos é txeu influensiadu pa nos amigus. (Pro. 13:20) Na trabadju ô na skóla, talvês nu ta sta serkadu di kes algen ki ka ta djuda-nu dizenvolve un manera di pensa ki ta agrada Jeová. Má, na runion nu pode atxa kes midjór amigu ki nu pode ten. É la ki nu pode xinti vontadi di mostra amor i faze bons óbra. — Heb. 10:24, 25, nóta di rodapé.

‘STA FIRMI NA FÉ’

15-16. Modi ki Satanás ta tenta muda nos manera di pensa?

¹⁵ Ka bu skese ma Satanás sta disididu na muda nos manera di pensa. El ta uza txeu tipu di rasusinu pa pô-nu ku dúvida di verdadi ki sta na Palavra di Deus.

¹⁶ Satanás ta kontinua ta faze kel mésmu pergunta ki el faze Eva na jardin di Éden: ‘É si própi ki Deus fla?’ (Gén. 3:1) Na es mundu ki Satanás ta kontrola, txeu bês nu ta obi perguntas ki pode pô-nu ta fika ku dúvida di kuzas ki nu ta kridita, sima: ‘É si própi ki Deus fla ma ómi ku ómi ô mudjer ku mudjer ka debe faze séksu? É si própi ki Deus fla ma bu ka debe komemora Natal i aniversáriu? É si própi ki Deus fla ma bu ka debe toma sangi? É si própi ki Deus fla ma bu ka debe pâpia ku bus família i bus amigu ki dizasosiadu?’

17. Kuzê ki nu meste faze óras ki algen ta faze-nu perguntas pa tenta pô-nu dúvida sobri kuzas ki nu ta kridita na es, i di akordu ku Colossenses 2:6, 7 kal ki ta ser rezultadu?

¹⁷ Nu meste ten sertéza di kes kuza ki nu ta kridita na es. Si nu ka sta atxa respósta pa kes pergunta inportanti sobri nos krénsa, nu pode kumesa ta ten dúvida di kuzas ki nu ta kridita na es. Kes dúvida pode muda nos manera di pensa i kaba ku nos fé. Nton kuzê ki nu meste faze? Bíblia ta fla ma nu debe troka nos manera di pensa pa nu pode prova nos kabésa ‘kal ki é kel vontadi di Deus, ki é dretu i perfetu’. (Rom. 12:2) Si sénpri nu ta faze studu pesoal, nu ta pode prova nos kabésa ma kel ki nu prende na Bíblia é verdadi. El ta djuda-nu ten sertéza ma leis di Jeová é sénpri midjór. Asi, nu ta ser sima un arvi ku raís fórti, nu ta fika ‘firmi na fé’. — Lé Colossenses 2:6, 7.

18. Kuzê ki pode djuda-nu libra i proteje di kes venénu di mundu di Satanás?

¹⁸ Fika firmi na fé, é un kuza ki ningen ka ta pode faze pa bo. Pur isu, kontinua ta bira bu manera di pensa más novu. Faze orason tudu óra, pidi ajuda di spritu di Jeová. Pensa txeu i kontinua ta analiza bus pensamentus i intensons. Faze amigus di verdadi ki pode djuda-u muda bu manera di pensa. Si bu faze kel-li, bu ta libra i bu ta proteje di kes venénu di mundu di Satanás, i bu pode kaba ku tudu ‘rasusinu i tudu barera ki ta labanta kóntra konhisimentu di Deus’. — 2 Cor. 10:5.