Kantu Deus ta governaba, tudu kriatura ta staba unidu i na pas

Pamodi ki nu meste di Reinu di Deus?

Kantu primeru ómi kriadu, ken ki ta governaba éra sô nos Kriador, ki txoma Jeová. El ta governaba ku amor. El pripara un lugar bunitu, ki txomaba jardin di Éden, pa algen viveba na el. Tanbê, el da-s un monti tipu di kumida i un trabadju rei di sábi. (Génesis 1:28, 29; 2:8, 15 ) Si es kontinuaba ta obiba ku Deus, ki éra ses Governanti, tudu algen ta viveba na pas.

Adon ku kel fruta proibidu na mô ki Eva da-l. — Primeru ómi ku mudjer ka seta pa Deus governa-s

Bíblia ta fla ma un anju rebéldi, ki dipôs bira ta txomadu di Satanás i Diabu, fla ma Deus ka ten direitu di governa-nu. El kreba pa tudu algen pensaba ma es ta sérba más filís si es viveba sen orientason di Deus i sen se govérnu. É tristi, pamodi nos primeru pai ku mai, Adon ku Eva, sigi izénplu di Satanás i es rabela kóntra Deus. — Génesis 3:1-6; Apocalipse 12:9.

Adon ku Eva ka seta pa Deus governa-s. Pur isu, es perde xansi di vive pa tudu ténpu na Paraízu sen ninhun tipu di duénsa. (Génesis 3:17-19 ) Ses disizon tanbê prujudika ses fidju ki es ben ten dipôs. Bíblia ta fla ma ‘pekadu ku mórti entra na mundu’ pamodi Adon ka obi ku Deus. (Romanos 5:12 ) Pekadu tanbê traze otu grandi prubléma: ‘Ómi ta manda na ómi pa se disgrasa.’ (Eclesiastes 8:9 ) Kel-li krê fla ma óras ki ómis ta governa ses kabésa, sénpri ta ten prubléma.

ÓMIS KUMESA TA GOVERNA

Ninrodi sakédu ku orgulhu. Se tras, sta pesoas ta trabadja na un konstruson. — Ninrodi rabela kóntra Jeová

Bíblia ta fla ma primeru ómi ki kumesa ta governa txomaba Ninrodi. El tanbê, el rabela i el mostra ma el ka kreba pa Jeová governaba algen. Désdi ténpu di Ninrodi, txeu algen ki tinha autoridadi abuza di ses puder. Dja ten uns 3 mil anu, ki Rei Salumon skrebe: ‘N odja lágua di kes ki maltratadu, má ka tinha algen pa konsolaba es. Kes ki ta maltrataba es tinha puder’. — Eclesiastes 4:1.

Oji ta kontise mésmu kuza. Na anu di 2009, un publikason di Organizason di Nasons Unidu fla ma sta kada bês más klaru ki governa mariadu é “un di kes kuza ki más ta poi prublémas na mundu”.

TÉNPU DI AJI!

Mundu sta meste di governantis más midjór i un manera di governa más midjór. I é kel-li própi ki nos Kriador dja promete-nu!

Fotus: Rezultadus di govérnu di ómi. 1. Un mudjer na Ázia xintadu na un rua suju ku se fidju pikinoti na mô ki sta sô na txora. 2. Un ómi bédju ki sta duenti na kama di ospital. 3. Trópas ta baza tiru na un géra. 4. Pesoas xatiadu ta grita i ku kartás na mô ta faze manifestason. 5. Un mudjer ku se fidju-fémia ta txiga kaza i es ta atxa pórta rabentadu. 6. Un sidadi poluídu ku fumu di kes fábrika i ku fius di lus. — Nen mésmu kel midjór govérnu di ómi ka konsigi rezolve kes prubléma más difísil ki algen ten

Deus kria un Reinu, ô un govérnu, ki ta ben fika na lugar di tudu govérnus di ómi i é ‘sô el ki ta ben fika pa tudu ténpu’. (Daniel 2:44 ) É kel Reinu li ki milhons di algen ta pidi na orason. (Mateus 6:9, 10 ) Má, é ka Deus ki ta ben ser governanti di kel Reinu. El skodje un algen ki vive na Téra sima ómi pa ser Governanti. Kenha ki Deus skodje?