Matéria pa studa na runion Vida i pregason
1 TI 7 DI JUNHU
TIZORUS DI PALAVRA DI DEUS | GÉNESIS 44-45
“Juzé púrdua se irmons”
(Génesis 44:1, 2 ) Dipôs, el fla kel ómi ki ta tomaba kónta di se kaza: “Intxi kes saku di kes ómi ku kumida, kel ki es ta pode leba, i poi dinheru di kada un na bóka di se saku. 2 Má, poi nha kópu, kel kópu di prata, na bóka di saku di kel más pikinoti, djuntu ku se dinheru di kumida.” Asi, el faze sima Juzé manda-l.
‘Bu ta atxa ma N sta na lugar di Deus?’
Nton, Juzé aji. El manda pa se irmons pirsigidu, podu prézu i akuzadu ma es furta kópu, ki ben atxadu na saku di Benjamin. Dipôs es torna lebadu pa Juzé. Gósi Juzé tinha xansi di sabe ki tipu di ómi se irmons éra. Judá pâpia na nómi di es tudu. El inplora pa Juzé ten mizerikórdia di es, ti el fla ma tudu kes 11 irmon ta biraba skravu na Ijitu. Juzé fla-s ma é sô Benjamin ki ta fikaba skravu na Ijitu i ma kes otu pode baba ses kaminhu. — Génesis 44:2-17.
Manera ki Judá reaji ta mexe ku algen. El fla: ‘Di kes fidju di se mai é sô el ki fika, i se pai ta ama-l txeu.’ Ta parse ma kes palavra li mexe ku Juzé, pamodi el éra fidju más grandi di Rakel, ki éra mudjer di Jakó ki el ta amaba txeu ki móre kantu el staba ta ten Benjamin. Sima se pai, Juzé di sertéza ta lenbraba di Rakel ku txeu karinhu. Pamodi es éra fidju di mésmu mai, talvês Juzé gostaba di Benjamin más txeu. — Génesis 35:18-20; 44:20.
Judá kontinua ta pidi pa Juzé ka poi Benjamin bira skravu. Ti el oferese pa el fika skravu na lugar di Benjamin. Dipôs el faze kel pididu li ki ta mexe ku algen: ‘Modi ki N ta torna bai pa nha pai sen leba kel rapás djuntu ku mi? N ka ta aguentaba odja nha pai ta pasa pa kel disgrasa li!’ (Génesis 44:18-34 ) Kel-li éra un próva klaru ma Judá dja mudaba. El ka mostra sô ma dja el rapendeba, má el mostra ma el ta poba na lugar di otus algen, ma el ta preokupaba más ku interesi di otus algen i ma el tinha konpaxon. Kes kualidadi li ta dexa-nu dimiradu.
Juzé ka staba ta aguenta más. El tinha ki poi pa fóra kuzê ki el staba ta xinti. Juzé pidi pa tudu kes sérvu sai i el txora riju ti ki obidu na palásiu di Faraó. Nton ti ki enfin, el dexa-s sabe kenha ki el éra. El fla-s: ‘Ami é Juzé, nhos irmon’. Juzé brasa se irmons ki staba spantadu, i ku bondadi el purdua-s pa tudu kes kuza ki es fazeba el. (Génesis 45:1-15 ) Di kel manera li, el imita izénplu di Jeová, ki ta púrdua di korason. (Salmo 86:5 ) Nu ta faze mésmu kuza?
(Génesis 44:33, 34 ) Nton, pur favor, nhu dexa skravu di nho fika na lugar di kel rapás, pa ser skravu di nha sinhor, asi pa kel rapás pode volta ku se irmons. 34 Modi ki N ta torna bai pa nha pai sen leba kel rapás djuntu ku mi? N ka ta aguentaba odja nha pai ta pasa pa kel disgrasa li!”
(Génesis 45:4, 5 ) Nton, Juzé fla se irmons: “Nhos txiga más pértu di mi favor.” I es txiga más pértu di el. El fla-s: “Ami é Juzé, nhos irmon ki nhos bende pa gentis di Ijitu. 5 Má, gósi, ka nhos fika preokupadu nen ka nhos poi kulpa na kunpanheru pamodi nhos bende-m pa gentis di Ijitu; pamodi Deus manda-m nhos frenti pa salva vida di pesoas.
Djobe jóias ki sta na Bíblia
(Génesis 44:13 ) Nton, es ratxa ses ropa, i es tudu poi ses karga na buru otu bês, i es torna bai pa sidadi.
it-3 p. 381
Ratxa ropa
Éra un manera ki judeus i otus algen di Orienti ta mostraba tristéza, spesialmenti óras ki es fikaba ta sabe ma un algen di ses família pértu móre. Txeu bês, es ta ratxaba ropa na párti di frenti ki ta daba pa parse sô un párti di petu. Má es ka ta ratxaba kel ropa interu di manera ki ka ta daba pa bisti-l más.
Primeru bês ki Bíblia ta pâpia di kel-li é kantu Ruben, ki éra fidju más grandi di Jakó, volta i el ka atxa Juzé na sistérna, el ratxa se ropa i el fla: ‘Rapazinhu dja dizaparse! I mi, kuzê ki N ta faze?’ Dja ki Ruben éra primeru fidju, é el ki tinha más responsabilidadi di toma kónta di se irmon más pikinoti. Kantu se pai, Jakó, fika ta sabe ma talvês Juzé móre, el ratxa se ropa tanbê i el bisti ropa di saku pa mostra se tristéza. (Gén 37:29, 30, 34) I na Ijitu, kes irmon di Juzé sô pa ladu pai, ratxa ses ropa pa mostra ma es staba tristi kantu fazedu armadilha pa parse ma Benjamin éra ladron. — Gén 44:13.
(Génesis 45:5-8 ) Má, gósi, ka nhos fika preokupadu nen ka nhos poi kulpa na kunpanheru pamodi nhos bende-m pa gentis di Ijitu; pamodi Deus manda-m nhos frenti pa salva vida di pesoas. 6 Kel-li é sugundu anu di fómi na país, i inda ta ben ten más sinku anu ki ka ta ten nen simentera nen kodjéta. 7 Má, Deus manda-m nhos dianti, pa un párti di nhos família pode fika bibu na Téra i pa salva nhos vida através di un grandi libertason. 8 Pur isu, é ka nhos ki manda-m pa li, má foi kel Deus verdaderu, pa el pode skodjeba mi pa N ser kel algen prinsipal pa da Faraó konsedju, sinhor di tudu se kaza i governador di tudu téra di Ijitu.
w04 15/8 p. 15 par. 15
Es odiadu sen motivu
15 Kuzê ki pode djuda-nu ka guarda rankor di kes algen ki ta odia-nu sen motivu? Lenbra ma nos inimigus prinsipal é Satanás ku se dimónis. (Efésios 6:12 ) Nbóra alguns algen ta pirsigi-nu di abuzu i es sabe dretu kuzê ki es sta ta faze, txeu di kes ki é kóntra povu di Deus ka sabe kuzê ki es sta ta faze ô ten otus algen ki ta kontrola-s. (Daniel 6:4-16; 1 Timóteo 1:12, 13 ) Jeová krê pa ‘tudu tipu di algen’ ten oportunidadi di ‘salva i pa es ten un konhisimentu izatu di verdadi’. (1 Timóteo 2:4 ) Tanbê, alguns algen ki antis ta fazeba nos opozison, gósi é nos irmons pamodi es odja ma nu ta konporta dretu. (1 Pedro 2:12 ) Alén di kel-li, nu pode imita izénplu di Juzé, fidju di Jakó. Nbóra el sufri txeu pamodi se irmons sô di ladu pai, el ka guarda rankor di es. Pamodi? Pamodi el da kónta ma éra Jeová ki staba ta kontrola situason pa Se vontadi kunpri. (Génesis 45:4-8 ) Di mésmu manera, Jeová pode faze kalker sufrimentu injustu ki nu pode pasa pa el da glória pa se nómi. — 1 Pedro 4:16.
8 TI 14 DI JUNHU
TIZORUS DI PALAVRA DI DEUS | GÉNESIS 46-47
“Juzé salva se família na ténpu di fómi”
(Génesis 47:13 ) Ka tinha kumida na tudu kel lugar, pamodi fómi éra duru dimás; téra di Ijitu ku téra di Kanan perde ses forsa pamodi kel fómi.
w87 1/5 p. 15 par. 2
Na ténpu di fómi salvadu txeu vida
2 Kel fartura di 7 anu kaba, i sima Jeová dja flaba fómi kumesa. Kel fómi ka éra sô na Ijitu má ‘na tudu lugar na Téra’. Kantu povu staba ku txeu fómi na Ijitu, es kumesa ta pidi Faraó kumida i Faraó fla-s: ‘Nhos bai pâpia ku Juzé i nhos faze sima el fla nhos.’ Juzé bende kumida pa gentis di Ijitu ti ki ses dinheru kaba. Pur isu, el seta pa es paga-l ku ses ribanhu. Dipôs povu txiga na Juzé ta fla: ‘Kunpra-nu, anos ku nos téra, i da-nu kumida, i anos ku nos téra, nu ta bira skravu di Faraó.’ Asi, Juzé kunpra tudu téra di gentis di Ijitu pa Faraó. — Génesis 41:53-57; 47:13-20.
(Génesis 47:16 ) Nton Juzé fla: “Si nhos dinheru dja kaba, nhos traze nhos ribanhu, i N ta da nhos kumida na lugar di kes ribanhu.”
(Génesis 47:19, 20 ) Bu ta dexa-nu anos ku nos téra pa nu móre bu dianti? Kunpra-nu, anos ku nos téra, i da-nu kumida, i anos ku nos téra, nu ta bira skravu di Faraó. Da-nu simenti pa nu fika bibu i pa nu ka móre, i pa nos téra ka fika sen ningen.” 20 Nton, Juzé kunpra tudu téra di gentis di Ijitu pa Faraó, pamodi tudu gentis di Ijitu bende ses kanpu, dja ki fómi éra duru dimás; i tudu kes téra bira di Faraó.
(Génesis 47:23-25 ) Nton, Juzé fla povu: “Nhos odja, oji N kunpra anhos ku nhos téra pa Faraó. N sta da nhos simenti i nhos ten ki símia téra ku es. 24 Óras ki téra da kumida, nhos da Faraó un kintu di kel kumida, má kes otu kuatu párti é di nhos, pa nhos símia kanpu i pa nhos kume, anhos, nhos fidjus i gentis di nhos kaza.” 25 Nton, es fla: “Nhu salva nos vida. Nu ta bira skravu di Faraó pa nu pode agrada sinhor.”
Reinu ta faze vontadi di Deus na Téra
11 Fartura. Mundu sta ta sufri fómi spritual. Bíblia dja avizaba: ‘É si ki Jeová, kel Sinhor Más Grandi, fla: “Nhos odja! Ta ben txiga ténpu ki N ta ben manda un fómi pa kel téra li, é ka un fómi di kumida nen un sedi di agu, má di obi palavras di Jeová.”’ (Amós 8:11 ) Má kes sidadon di Reinu di Deus ta pasa fómi tanbê? Jeová dja flaba kal ki ta sérba diferénsa entri se povu i Se inimigus: ‘Nhas sérvu ta kume, má nhos ta pasa fómi. Nhas sérvu ta bebe, má nhos ta pasa sedi. Nhas sérvu ta ben fika kontenti, má nhos ta ba pasa vergónha.’ (Isa. 65:13) Bu sta ta odja kes palavra li ta kunpri?
12 Kes txeu kuza spritual ki Jeová ta da-nu oji é sima un riu ki sta fika kada bês más largu i más fundu. Nos publikasons ku bazi na Bíblia, gravasons, vídius, runions, kongrésus i kes informason ki ta sta na nos site é kumida spritual ki nu ta resebe sénpri, timenti kel mundu li sta xeiu di fómi spritual. (Eze. 47:1-12; Joel 3:18 ) Bu ka ta fika kontenti di odja kes promésa di Jeová sobri fartura spritual ta kunpri na bu vida? Bu sta ta kume tudu dia na méza di Jeová?
Djobe jóias ki sta na Bíblia
(Génesis 46:4 ) Mi própi N ta dixi ku bo pa Ijitu, i ami própi N ta torna traze-u otu bês, i é Juzé ki ta poi mô na bus odju.”
it-1 p. 272 par. 4
Atitudis, puzison i jéstus
Poi mô na odju di un algen mortu. Kantu Jeová fla Jakó, ‘Juzé ki ta poi mô na bus odju’, éra un manera di fla ma Juzé ta fitxaba odju di Jakó dipôs ki el móre. (Gén 46:4) Kel-li normalmenti éra un kuza ki primeru fidju ta fazeba. Asi, ta parse ma Jeová staba ta mostra Jakó ma direitu di primeru fidju ta sérba di Juzé. — 1Cr 5:2.
(Génesis 46:26, 27 ) Tudu kes disendenti di Jakó ki bai ku el pa Ijitu éra 66, sen konta kes mudjer di fidjus di Jakó. 27 Juzé tevi dôs fidju ki nase na Ijitu. Éra 70 algen di kaza di Jakó ki bai pa Ijitu.
Bíblia di studu, nóta na At 7:14
Es éra 75 algen: Estêvão talvês ka staba ta pâpia di ninhun versíklu di Skrituras Ebraiku kantu el fla ma éra 75 algen di família di Jakó ki staba na Ijitu. Kel nunbru li ka sta na testu massorético di Skrituras Ebraiku. Gén 46:26 ta fla: ‘Tudu kes disendenti di Jakó ki bai ku el pa Ijitu éra 66, sen konta kes mudjer di fidjus di Jakó.’ I versíklu 27 ta fla: ‘Éra 70 algen di kaza di Jakó ki bai pa Ijitu.’ Na kes versíklu li, kes algen kontadu di dôs manera diferenti. Ta parse ma kel primeru nunbru ta inklui sô kes disendenti di Jakó i kel sugundu nunbru ta inklui tudu kes algen di família di Jakó ki bai pa Ijitu. Êx 1:5 i De 10:22 tanbê ta fla ma disendentis di Jakó éra ‘70’. Ta parse ma Estêvão pâpia di 75 algen, ki ta inklui otus algen di família di Jakó. Alguns algen ta fla ma kel nunbru li ta inklui fidjus i nétus di Manasés i Efrain, ki éra fidjus di Juzé, sima sta na Gén 46:20 na traduson Septuaginta. Otus algen ta fla ma kel nunbru li ta inklui mudjeris di fidjus di Jakó, ki Gén 46:26 ta fla klaru ma ka sta inkluidu na kes 66 família di Jakó ki kontadu. Nton ‘75’ pode ser kel nunbru konplétu. Má, kel nunbru li pode ten bazi na kópia di Skrituras Ebraiku ki staba ta uzadu na primeru séklu. Dja tinha anus ki studiozus sabia ma kel nunbru ‘75’ ta parseba na Septuaginta Gregu, na Gén 46:27 i Êx 1:5. Má, pa vólta di 1950 atxadu dôs padás di rolu di Mar Mortu di Êx 1:5 na língua ebraiku, i na es tanbê ta parse kel nunbru ‘75’. Pode ser ki Estêvão fla ‘75’ ku bazi na un di kes testu antigu li. Di kalker manera, nunbru ki Estêvão fla ta mostra un manera diferenti di konta kes família di Jakó.
15 TI 21 DI JUNHU
TIZORUS DI PALAVRA DI DEUS | GÉNESIS 48-50
“Kes irmon di idadi ten txeu kuza pa inxina-nu”
(Génesis 48:21, 22 ) Dipôs, Israel fla Juzé: “Odja, N sta ta móre, má Deus di sertéza ta kontinua ku nhos i el ta ben leba nhos otu bês pa téra di nhos gentis grandi. 22 I ami, N ta da-u un párti di téra amás di ki kel ki N da bus irmon, ki N toma di mô di kes amoreu ku nha spada i ku nha arku.”
it-2 p. 468 par. 5
Jakó
Poku ténpu antis di Jakó móre, el abênsua se nétus, ki éra fidjus di Juzé, i ku orientason di Jeová el poi Efrain, kel más pikinoti, na frenti di Manasés, kel más grandi. Dipôs, pa Juzé, ki ta ben resebeba dôs párti di eransa di kel primeru fidju, el fla: ‘N ta da-u un párti di téra amás di ki kel ki N da bus irmon, ki N toma di mô di kes amoreu ku nha spada i ku nha arku.’ (Gén 48:1-22; 1Cr 5:1) Jakó kunpra kel téra di fidjus di Amor ki ta fikaba pértu di Sikén. Jakó faze-l na pas. (Gén 33:19, 20) Nton, ta parse ma kel promésa pa Juzé éra un manera di Jakó mostra se fé, pamodi na kel promésa el faze profesia ma se disendentis ta ben tomaba téra di Kanan. El fla kel-li sima si é un kuza ki dja kontiseba ku se spada i arku. (Djobe AMORREU.) Kes dôs párti di Juzé na kel téra ki es toma, éra kes dôs párti ki dadu pa tribu di Efrain i di Manasés.
(Génesis 49:1 ) I Jakó txoma se fidjus i el fla: “Nhos djunta, pa N pode fla nhos kuzê ki ta ben kontise ku nhos na ténpu di fin.
it-3 p. 750 par. 12
Ténpu di fin
Profesia ki Jakó faze kantu el staba kuazi ta móre. Kantu Jakó fla se fidjus: ‘Nhos djunta, pa N pode fla nhos kuzê ki ta ben kontise ku nhos na ténpu di fin’, el staba ta pâpia di un ténpu na futuru ki kes kuza ki el fla ta ben kunpriba. (Gén 49:1) Más di 200 anu antis, Jeová dja flaba Abron (Abraon), ki éra avó di Jakó, ma se disendenti ta sufreba duránti 400 anu. (Gén 15:13) Nton, na kel kazu li, kel ténpu na futuru ki Jakó txoma di ‘ténpu di fin’ sô pode kumesaba dipôs ki kes 400 anu di sufrimentu tirmina. (Pa más informason sobri Génesis 49, djobe artigus sobri fidjus di Jakó, nómi pa nómi.) Kel profesia li ta ben kunpriba tanbê dipôs na ‘Israel di Deus’. — Gál 6:16; Ro 9:6.
(Génesis 50:24, 25 ) Na fin, Juzé fla se irmons: “N sta ta móre, má Deus sen falta ta torna djobe nhos i di sertéza el ta leba nhos pa fóra di kel téra li, pa kel téra ki el jura ma el ta daba Abraon, Izaki i Jakó.” 25 Pur isu, Juzé poi fidjus di Israel ta jura; el fla-s: “Di sertéza, Deus ta torna djobe pa nhos. Nhos ten ki leba nhas osu pa fóra di li.”
w07 1/6 p. 28 par. 10
Kes algen grandi é un benson pa kes más jóven
10 Kes irmon ki dja sta grandi tanbê pode ser un bon influénsia pa kes otu irmon. Na se bedjisa, Juzé, fidju di Jakó, faze un kuza sinplis ki mostra se fé i ki mexe txeu ku milhons di adorador verdaderu ki vive dipôs di el. Juzé tinha 110 anu kantu ‘el fla-s kuzê ki es ta fazeba ku se osus’, ô ma israelitas debe lebaba se osus óras ki es ta saíba di Ijitu. (Hebreus 11:22; Génesis 50:25 ) Kel kuza ki el manda-s faze sirbi di speransa pa israelitas duránti kes txeu anu ki es éra skravu na Ijitu dipôs ki Juzé móre, i da-s sertéza ma es ta sérba libertadu.
Djobe jóias ki sta na Bíblia
(Génesis 49:19 ) “I Gadi, un grupu di bandidus ta ben ataka-l, má el ta ataka ses kalkanhada.
Ken ki ta da Deus glória é abensuadu
4 Antis di tribu di Gadi di Israel entra na kel téra ki Deus prometeba es, es pidi pa es fika ta mora na lésti di Jurdon, ki éra un lugar ki ta daba pa kria animal. (Números 32:1-5 ) Mora na kel lugar ka ta sérba fásil pa es. Kes tribu ki fika na ladu oésti tinha vali di Jurdon ki ta protejeba es óras ki trópas bai lutaba kóntra es. (Josué 3:13-17 ) Má, sobri kes téra na lésti di Jurdon, livru The Historical Geography of the Holy Land di George Adam Smith, ta fla: “Tudu [es] ta txiga ti kes lugar grandi i planu di Arábia, sen kuazi ninhun difikuldadi. Nton, duránti tudu ténpu es fika sen ninhun proteson pa kes algen ki kada óra ta moraba na un lugar ka invadiba ses téra pa djobe kumida. Alguns di es ta atakaba es tudu anu pa djobe padja pa animal.”
5 Modi ki tribu di Gadi ta lidaba ku kel preson duru li? Un monti ténpu antis, kantu Jakó, ki éra pai di tribu di Gadi, staba kuazi ta móre el profetiza: ‘I Gadi, un grupu di bandidus ta ben ataka-l, má el ta ataka ses kalkanhada.’ (Génesis 49:19 ) Na komésu, ta parse ma kes palavra li ta dizanima algen. Má na verdadi éra un órdi pa tribu di Gadi ataka tanbê. Jakó garanti-s ma si es fazeba asi, kes algen ki ta atakaba es ta fujiba ku vergónha i tribu di Gadi ta koreba ses tras.
(Génesis 49:27 ) “Benjamin ta kontinua ta satadja sima lobu. Di palmanhan el ta kume kuzas ki el kasa i na bóka noti el ta dividi kuzas ki eI panha.”
it-1 p. 339 par. 6
Benjamin
Na kel profesia ki Jakó faze kantu el staba kuazi ta móre, el pâpia sobri kapasidadi ki disendentis di Benjamin ten na géra. Sobri Benjamin ki el ta amaba txeu, el fla: ‘Benjamin ta kontinua ta satadja sima lobu. Di palmanhan el ta kume kuzas ki el kasa i na bóka noti el ta dividi kuzas ki eI panha.’ (Gén 49:27) Kes trópa di tribu di Benjamin éra txeu konxedu pamodi ses kapasidadi di uza funda. Es ta konsigi daba ku pédra ku mô direita i ku mô skérda ki ta panhaba ‘na un fiu di kabélu’. (Jz 20:16; 1Cr 12:2) Juís Eúdi, ki ta uzaba mó skerda i ki mata rei Eglon ki ta frontaba Israel, éra di tribu di Benjamin. (Jz 3:15-21) Nu pode odja tanbê ma éra na ‘palmanhan’ di govérnu di Israel ki primeru rei di Israel, Saul, fidju di Kis, ki éra di tribu di Benjamin, ‘kel tribu más pikinoti’, luta sen péna kóntra filisteus. (1Sa 9:15-17, 21) Di mésmu manera, éra ‘na bóka noti’ di nason di Israel ki Rainha Ester i primeru ministru Mordekai, ki éra di tribu di Benjamin, djuda salva israelitas di kel distruison dibaxu di govérnu di Pérsia. — Est 2:5-7.
22 TI 28 DI JUNHU
TIZORUS DI PALAVRA DI DEUS | ÊXODO 1-3
“N ta bira kel ki N disidi bira”
(Êxodo 3:13 ) Má Muizés fla Deus verdaderu: “Imajina ma N bai ti israelitas i N fla-s: ‘Deus di nhos gentis grandi manda-m ti nhos’, i es pergunta-m: ‘Kal ki é se nómi?’ Kuzê ki N ta fla-s?”
Da ónra pa grandi nómi di Jeová
4 Lé Êxodo 3:10-15. Kantu Muizés tinha 80 anu, Deus da-l un órdi inportanti: ‘Bu ta ben tra nha povu, kes israelita, di Ijitu.’ Ku ruspetu, Muizés faze un pergunta ki ten txeu siginifikadu. El pergunta: ‘Kal ki é bu nómi?’ Dja tinha txeu ténpu ki nómi di Deus éra konxedu, nton pamodi ki Muizés faze kel pergunta li? El krê sabeba más sobri kel algen ki tinha kel nómi ô kuzas ki ta konvenseba povu di Deus ma el ta libertaba es. Ta da pa ntende kel preokupason ki Muizés xinti pamodi dja tinha txeu ténpu ki israelitas éra skravu. Talvês es pode perguntaba si Deus di ses gentis grandi ta konsigi libertaba es. Na verdadi, alguns israelita dja kumesaba ti ta adora kes deus di Ijitu! — Eze. 20:7, 8.
(Êxodo 3:14 ) Nton Deus fla Muizés: “N ta bira kel ki N disidi bira.” I el fla tanbê: “É kel-li ki bu debe fla pa kes israelita: ‘“N ta bira” manda-m pa nhos.’”
kr, kuadru na pájina 43
KUZÊ KI NÓMI DI DEUS SIGINIFIKA
NÓMI Jeová ta ben di un vérbu na língua ebraiku ki siginifika “ta bira”, “faze kontise”. Nton, ta ntendedu ma nómi di Deus siginifika “El ta faze kontise”. Kel siginifikadu li ta mostra klaru kuzê ki Jeová ta faze kómu Kriador. El faze Séu ku Téra i tudu kriatura intilijenti, i el ta kontinua ta faze se vontadi kunpri.
Nton, modi ki nu debe ntende respósta ki Jeová da pa pergunta di Muizés na Êxodo 3:13, 14 ? Muizés pergunta: ‘Imajina ma N bai ti israelitas i N fla-s: “Deus di nhos gentis grandi manda-m ti nhos”, i es pergunta-m: “Kal ki é se nómi?” Kuzê ki N ta fla-s?’ Jeová responde: ‘N ta bira kel ki N disidi bira.’
Repara ma Muizés ka staba ta pidi Jeová pa dexa-l sabe se nómi. Muizés i kes israelita dja konxeba nómi di Deus dretu. Muizés kreba pa Jeová dexaba el sabe un kuza ki ta poba se fé bira más fórti na ki tipu di Deus ki el é, un kuza ki ta mostraba klaru kuzê ki se nómi ta siginifikaba. Nton, kantu El responde ‘N ta bira kel ki N disidi bira’, Jeová staba ta mostra un kuza rei di inportanti di se manera di ser: Na kada situason el ta bira kuzê ki el meste pa kunpri se vontadi. Pur izénplu, pa Muizés i pa kes israelita, Jeová bira un Salvador, un algen ki ta faze lei, un algen ki da-s tudu kuza ki es mesteba i el bira otus kuza tanbê. Nton, Jeová ta skodje bira kuzê ki el meste pa kunpri se promésas pa se povu. Nbóra nómi di Deus pode inklui kel ideia li, el ka ta nvolve sô kes kuza ki Deus ta skodje bira. El ta inklui tanbê ideia ma Deus ta poi ô ta faze se kriason ta bira kuzê ki el meste pa kunpri se vontadi.
Djobe jóias ki sta na Bíblia
(Êxodo 2:10 ) Kantu kel mininu kria, el leba-l pa fidju-fémia di Faraó, i el bira sima un fidju pa el. Fidju-fémia di Faraó pô-l nómi di Muizés, i el fla: “É pamodi N tra-l di agu.”
g04 8/4 p. 6 par. 5
Muizés izistiba mê ô é un stória inventadu?
Má ta faze sentidu kridita ma un prinséza di Ijitu ta tomaba kel mininu pa el kria? Sin, pamodi relijion di gentis di Ijitu ta inxinaba ma pa un algen bai pa Séu el meste fazeba bons óbra. Sobri adota mininu arkiolojista Joyce Tyldesley fla: “Mudjeris di Ijitu konsigi ten mésmu direitus ki ómis. Es tinha mésmu direitus na kuzas ki tinha aver ku lei i ku nogósiu, peloménus éra si ki lei ta flaba, i. . . mudjeris pode adotaba algen.” Un papiru antigu ta pâpia di un mudjer di Ijitu ki adota se skravus. I sobri disizon di skodje mai di Muizés pa da-l mama, un disionáriu ta fla: “Kuza ki fazedu pa mai di Muizés da-l mama. . . é sima kes kontratu ki es ta fazeba na Mezopotámia pa adota algen.” — The Anchor Bible Dictionary.
(Êxodo 3:1 ) Muizés bira pastor di ribanhu di se sogru, Jetru, ki éra saserdóti di Midian. Kantu ki el staba ta leba ribanhu pa ladu oésti di dizértu, el txiga na Orebi, kel monti di Deus verdaderu.
w04 15/3 p. 24 par. 4
Pártis inportanti di livru di Êxodo
3:1 — Jetru éra ki tipu di saserdóti? Na ténpu antigu, xéfis di família éra saserdótis di ses família. Jetru éra xéfi di un família di un tribu di midianitas. Dja ki midianitas éra disendentis di Abraon através di Ketura, talvês es sabeba algun kuza sobri adorason di Jeová. — Génesis 25:1, 2.
29 DI JUNHU TI 5 DI JULHU
TIZORUS DI PALAVRA DI DEUS | ÊXODO 4-5
“N ta sta ku bo óras ki bu ta pâpia”
(Êxodo 4:10 ) Nton Muizés fla Jeová: “Jeová diskulpa-m, má ami nunka N ka éra bon na pâpia, nen antis nen dipôs ki bu pâpia ku bu sérvu, pamodi ami N ta pâpia divagar i nha língua é pizadu.”
(Êxodo 4:13 ) Má, el fla: “Diskulpa-m, Jeová. Favor, manda kalker otu algen ki bu krê manda.”
Bu konxe Jeová dretu?
7 Muizes kontinua ta prende sobri kualidadis di Jeová i ta faze se vontadi. Pur izénplu, kantu Jeová manda Muizes pa tra israelitas di Ijitu, el fika ku medu i el fla Jeová txeu bês ma el ka staba priparadu pa kel diziginason. Respósta di Deus, ta mostra ma el tinha konpaxon di Muizes i ma el ntende modi ki el staba ta xinti. Pur isu el djuda-l. (Êxo. 4:10-16) Pamodi kel-li, Muizes konsigi leba Faraó kel mensaji fórti di julgamentu. Dipôs Muizes odja Jeová ta uza se puder pa salva israelitas, i ta distrui Faraó ku se trópas na Mar Burmedju. — Êxo. 14:26-31; Sal. 136:15.
(Êxodo 4:11, 12 ) Jeová fla-l: “Kenha ki da ómi bóka? Kenha ki ta pô-l fika mudu ô surdu, ta odja dretu ô fika ségu? É ka ami, Jeová? 12 Nton, gósi bai, N ta sta ku bo óras ki bu pâpia i N ta inxina-u kuzê ki bu debe fla.”
Bu ta odja ‘Kel ki é invizível’?
5 Antis di Muizés volta pa Ijitu, Deus inxina-l un prinsípiu inportanti ki Muizés ben skrebe dipôs na livru di Jó: ‘Ten grandi ruspetu pa Jeová, kel-la é sabedoria’. (Jó 28:28 ) Pa djuda Muizés ten kel ruspetu pa Deus i aji ku sabedoria, Jeová mostra modi ki umanus i Deus Tudu-Poderozu é diferenti di kunpanheru. El pergunta: ‘Kenha ki da ómi bóka? Kenha ki ta pô-l fika mudu ô surdu, ta odja dretu ô fika ségu? É ka ami, Jeová?’ — Êxo. 4:11.
6 Kuzê ki nu ta prende? Muizés ka meste tinha medu. É Jeová ki mandaba Muizés i El ta daba Muizés kel ki el mesteba pa pâpia di mensaji di Deus pa Faraó. Inda más, konparadu ku Jeová, Faraó ka éra nada. Kel-li ka éra primeru bês ki un sérvu di Deus staba ta kóre risku na mô di kes Faraó di Ijitu. Muizés talvês staba ta pensa na modi ki Jeová protejeba el, protejeba Abraon i Juzé na ténpu ki otus Faraó staba ta governa. (Gén. 12:17-19; 41:14, 39-41; Êxo. 1:22–2:10) Ku koraji i fé na Jeová, ‘Kel ki é invizível’, Muizés bai ti Faraó i el fla tudu kes palavra ki Jeová manda-l pa el fla.
(Êxodo 4:14, 15 ) Nton, Jeová xatia ku Muizés, i el fla: “Kuzê ki bu ta atxa di bu irmon Aron, ki é levita? N sabe ma el pode pâpia dretu. El sta ta ben gósi li, pa ben nkontra ku bo. Óras ki el odja-u, se korason ta fika kontenti. 15 Nton, pâpia ku el i pô-l palavras na se bóka; i óras ki nhos pâpia, N ta sta ku nhos i N ta inxina nhos kuzê ki nhos debe faze.
Un Deus Tudu-Poderozu ki ta preokupa ku otus
7 Kantu Muizes tinha 80 anu, Jeová da-l un diziginason difísil. El tinha ki libertaba israelitas di Ijitu. (Êxo. 3:10) Di sertéza, kel-li éra un kuza ki Muizes ka sta speraba. El pasa uns 40 anu ta pastora animal na téra di Midian. Muizes fla: ‘Ken ki é mi, pa N bai ti Faraó i tra israelitas di Ijitu?’ Pa djuda-l ten koraji Jeová fla-l: ‘N ta sta ku bo’. (Êxo. 3:11, 12) Tanbê Deus promete-l ma ‘ansions di Israel ta obiba se vós’. Má simé, Muizes fla-l: ‘Má imajina ki es ka obi ku mi’. (Êxo. 3:18; 4:1) Kel-li éra sima si Muizes ka sta kunfiaba na palavra di Jeová! Má Jeová kontinua ku paxénxa i el faze más un kuza. El da Muizes puder pa faze milagris. I Bíblia ta fla ma Muizes é kel primeru algen ki dadu puder pa faze milagri. — Êxo. 4:2-9, 21.
8 Muizes inda tenta ranja otu diskulpa. El fla ma el ka éra bon na pâpia. Nton Jeová fla: ‘N ta sta ku bo óras ki bu ta pâpia, i N ta inxina-u kuzê ki bu debe fla.’ Má kel-li konvense Muizes? Nau, pamodi el pidi Jeová pa manda otu algen. Na kel óra, Jeová fika xatiadu ku Muizes, i el tinha razon. Má simé, el mostra ma el ta preokupaba ku Muizes. El ntende kuzê ki el staba ta xinti i el skodje Aron pa ser porta-vós di Muizes. — Êxo. 4:10-16.
Djobe jóias ki sta na Bíblia
(Êxodo 4:24-26 ) Duránti kel viaji, na kel lugar undi es sta ta ba durmiba, Jeová atxa-l i el tenta mata-l. 25 Má dipôs, Zípura panha un pédra moladu i el faze sirkunsizon na se fidju, i el poi kel péli ta toka na se pé, i el fla: “É pamodi abo é un noivu di sangi pa mi.” 26 Asi, El dexa-l bai. Zípura fla “noivu di sangi” pamodi kel sirkunsizon.
w04 15/3 p. 28 par. 4
Perguntas ki leitoris ta faze
Kes palavra di Zípura ‘abo é un noivu di sangi pa mi’, ka mutu konxedu. Kuzê ki kel-li krê fla sobri Zípura? Kantu Zípura kunpri kel kontratu di sirkunsizon, el rekonhese ma tinha un kontratu ku Jeová. Kel kontratu di Lei, ki ben fazedu dipôs ku israelitas, mostra ma na un kontratu, Jeová pode ser sima un maridu i kel otu párti sima un mudjer. (Jeremias 31:32 ) Nton, kantu ki Zípura txoma Jeová (através di Se anju) di ‘noivu di sangi’, ta parse ma Zípura rekonhese ma el ta kunpriba kel kontratu. Éra sima si el seta ser mudjer di Jeová na kel kontratu di sirkunsizon i éra sima si Jeová éra se maridu. Di kalker manera, pamodi Zípura aji lógu pa obi ku lei di Deus, vida di se fidju ka staba más na prigu.
(Êxodo 5:2 ) Má, Faraó fla: “Ken ki é Jeová, ki N ten ki obi ku se vós pa N dexa Israel bai se kaminhu? N ka konxe Jeová, i inda más, N ka sta dexa Israel bai se kaminhu.”
it-2 p. 500 par. 5
Jeová
Nton “konxe”, ka krê fla sô ten informason sobri un kuza ô un algen. Kantu Nabal, ki éra un algen tolu, i ki sabeba nómi di Davidi pergunta: ‘Kenha ki é Davidi?’ éra sima si el staba ta fla, “Davidi é inportanti mê?” (1Sa 25:9-11; konpara ku 2Sa 8:13.) Faraó tanbê fla Muizés: ‘Ken ki é Jeová, ki N ten ki obi ku se vós pa N dexa Israel bai se kaminhu? N ka konxe Jeová, i inda más, N ka sta dexa Israel bai se kaminhu.’ (Êx 5:1, 2) Asi, Faraó krê flaba ma el ka konxeba Jeová kómu Deus verdaderu, nen kómu algen ki tinha autoridadi sobri rei di Ijitu i se asuntus, ô ku puder pa kunpri Se vontadi ki dja el flaba através di Muizés ku Aron. Má, dipôs Faraó i gentis di Ijitu, i israelitas tanbê ta ben konxeba siginifikadu verdaderu di kel nómi li, ô ken ki el é. Sima Jeová mostra Muizés, kel-li ta ben kontiseba óras ki Deus kunpriba promésa ki el fazeba israelitas di tra-s di Ijitu i da-s kel téra ki dja el prometeba es. I di kel manera li, el ta kunpriba kel kontratu ku gentis grandi di israelitas. Nton Deus fla: ‘Di sertéza nhos ta sabe ma mi é Jeová, nhos Deus’. — Êx 6:4-8; djobe TODO-PODEROSO.