“Gósi N ta ama pregason!”

N PERDE NHA ALEGRIA

Infilismenti kantu ki N tinha kuazi 13 anu, nha amor pa Jeová kumesa ta fria. Ta parseba ma nhas koléga di skóla tinha tudu liberdadi i ma N staba ta perde algun kuza. N ta atxaba ma kes régra di nha pai ku nha mai i kes régra di konportamentu pa un kriston, staba ta prende-m. I ma adora Jeová ta daba txeu trabadju. Nunka N ka duvida ma Jeová ta izisti, má N ka sta xintiba se amigu más.

Nbóra N kontinua ta prega, N ta saíba poku na pregason sô pa N ka fikaba inativu. Óras ki N ta baba pregason, nunka N ka ta priparaba. Pur isu, éra difísil N kumesaba i mante bons konbérsu ku kes algen ki N ta papiaba ku es. Pamodi kel-li, N ka ta tinha bons rezultadu. Kel-li pô-m ku ménus vontadi inda di sai na pregason. Alvês N ta perguntaba: ‘Modi ki un algen ta konsigi faze kel-li, simana ta sai simana ta entra, mês ta sai mês ta entra?’

Kantu N tinha 17 anu, N krê tinha más liberdadi. Nton, N ruma nhas kuza, N sai di kaza i N muda pa Austrália. Kel-li foi txeu difísil pa nha pai ku nha mai. Es fika preokupadu, má es ta pensaba ma N ta kontinuaba ta sirbi Jeová.

Na Austrália, nha fé fika más fraku inda. N ta baba runion sô di vês en kuandu. N faze amizadi ku jóvens ki éra sima mi. Un dia es ta staba na runion, i otu dia es ta staba na diskotéka ta bebe i ta badja. Óras ki N ta pensa na nha vida na kel ténpu, N ta odja ma N staba ku un pé na verdadi i kel otu na mundu. Má, N ka ta xintiba filís na ninhun di kes lugar li.

UN LISON INPORTANTI KI N KA STA SPERABA

Uns dôs anu más tardi, N konxe un irman na poku ténpu ki pô-m ta para i ta pensa na nha vida sen el da kónta. N staba ta mora na un kaza djuntu ku más kuatu irman soltera. Un bês, nu konvida un enkaregadu di grupu di kongregason i se mudjer, ki txoma Tamara, pa fika na nos kaza duránti un simana. Timenti se maridu staba ta kuida di asuntus di kongregason, Tamara ta fikaba ku nos sô ta ri. Kel-li éra rei di sábi! Tamara éra un algen ki bu ta xintiba avontádi djuntu ku el i di pâpia ku el. N gosta txeu di konxe un algen si, ki tinha un amizadi fórti ku Jeová, má ki tanbê éra txeu divirtida.

Tamara éra txeu animada. Se amor pa verdadi i pa pregason ta mexe ku algen. El ta xintiba alegria di verdadi na da se midjór pa Jeová. Má ami N ka staba filís pamodi N sta ta fazeba poku pa Jeová. Se atitudi puzitivu i se alegria di verdadi, mexe txeu ku nha vida. Se izénplu pô-m ta pensa na un verdadi inportanti: Jeová krê pa nos tudu sirbi-l ‘ku alegria’ i ‘ku gritus di alegria.’ — Sal. 100:2.

N TORNA XINTI AMOR PA PREGASON

N krê xintiba kel mésmu alegria di Tamara. Má pa kel-li, N tinha ki fazeba txeu mudansa na nha vida. Leba txeu ténpu, má N kumesa ta faze mudansas poku-poku. N kumesa ta pripara más dretu pa pregason i di vês en kuandu N ta sirbiba di pioneru ajudanti. Kel-li djuda-m xinti ménus nervoza i pô-m ta ten más kunfiansa. Dja ki N kumesa ta uza Bíblia más txeu na pregason, N xinti más alegria na prega.

Poku ténpu dipôs, N kumesa ta sirbi di pioneru ajudanti tudu mês. N kumesa ta faze amizadi ku algen di tudu idadi ki staba ta da ses midjór pa Jeová, i ki gostaba di sirbi-l. Ses bon izénplu djuda-m pensa na kuzê ki é más inportanti na nha vida i N kumesa ta lé Bíblia tudu dia. N fika ta gosta más txeu di prega. Nton, N bira pioneru fíksu. Pa primeru bês, dipôs di txeu ténpu, N xinti filís i avontádi na kongregason.

N ATXA UN KUNPANHERU DI SIRVISU PA VIDA INTERU

Un anu dipôs, N konxe Alex, ki é un ómi ki ta mostra bondadi i ki ta ama Jeová i pregason di verdadi. El éra ajudanti di kongregason i dja el tinha 6 anu ta sirbi di pioneru fíksu. Alex tanbê dja sirbiba pa un ténpu na Malauí, na un tiritóriu ki mesteba di más publikador. La, el konxe alguns misionáriu ki bira un bon izénplu pa el i ki insentiva-l pa el kontinua ta poi interesis di Reinu na primeru lugar.

Mi ku Alex nu kaza na 2003 i nu kontinua ta sirbi pa ténpu interu. Nu prende lisons inportanti i Jeová abensua-nu di txeu manera.

JEOVÁ ABENSUA-NU INDA MÁS TXEU

Na 2009, nu konvidadu pa sirbi di misionáriu na Timor-Lésti, ki é un país pikinoti ki ta fika pértu di Indonézia. Nu fika spantadu, animadu i nervozu omésmu ténpu. Sinku mês dipôs, nu txiga na Díli, ki é kapital di Timor-Lésti.

Pa nu sirbi na kel país, nu tevi ki faze txeu mudansa. Nu tevi ki kustuma ku novu kultura, língua i situason di vida. Na pregason, nu tinha ki lidaba ku pesoas ki éra txeu póbri, ki tinha poku skóla i ki ta sufreba txeu injustisa. Pamodi géra ku violénsia, txeu di es pasa pa situasons ki dexa markas na ses korpu i ki ta pô-s ta sufri txeu.a

Pregason éra rei di sábi! Pur izénplu, un bês N konxe un minina di 13 anu ki txoma Maria.b El tinha un vida tristi. Dja tinha alguns anu ki se mai móre i kuazi el ka ta odjaba se pai. Sima txeu jóven di se idadi, Maria ka tinha ninhun obijetivu na vida. N ta lenbra di un dia ki el konta-m, ta txora, modi ki el ta xintiba. Sô ki N ka konsigi ntende kuazi nada ki el konta-m pamodi N ka ta ntendeba ses língua dretu. N faze orason pa Jeová i N pidi-l pa el djuda-m anima kel jóven. Nton, N kumesa ta lé alguns testu pa konsola-l. Sima anus ba ta pasa, N konsigi odja modi ki Bíblia muda atitudi, aparénsia i vida di Maria. El batiza i gósi el ten se própi studus di Bíblia. Oji, Maria ten un família grandi na fé i el ta xinti ma dja el atxa se lugar.

Jeová sta ta abênsua trabadju na Timor-Lésti. Kuazi tudu publikador na kel país li prende verdadi na kes últimu 10 anu ki pasa. Má simé, txeu di es é pioneru, ajudanti di kongregason ô ansions. Otus ta trabadja na skritóriu di traduson, na traduzi publikasons ku bazi na Bíblia pa ses língua. N fika txeu kontenti di odja-s ta kanta na runions, di odja-s ku sorizu na róstu i di odja ses prugrésu spritual.

N KA TA KONSIGI IMAJINA UN VIDA MÁS SÁBI KI KEL-LI

Nos diziginason na Timor-Lésti éra txeu diferenti di kel vida ki nu tinha na Austrália, má N ka ta konsigi imajina un vida más sábi ki kel-li. Alvês nu ta viajaba na un otokaru pikinoti, xeiu di algen, na meiu di pexi séku i di verduras ki ta bendedu na merkadu di kel lugar. Tanbê ten dias ki nu ta fazeba studu na un kaza pikinoti, ki ta faze txeu kalor i ku galinhas ta kóre pa li i pa la. Sikrê ku tudu kes dizafiu li, sénpri N ta pensaba: ‘Pregason li é spetakular!’

Óras ki N ta pensa na nha vida, N ta agradese Deus pamodi nha pai ku nha mai faze kel midjór ki es pode pa inxina-m sobri Jeová i pa apoia-m ti mésmu duránti kel ténpu difísil ki mi éra adulesenti. Ami é próva bibu di kel ki Provérbios 22:6, ta fla. Nha mai ku nha pai ten orgulhu di mi ku Alex. Es ta fika filís di odja modi ki Jeová sta ta uza-nu. Désdi 2016, nu sta faze trabadju di vizita kongregasons na kes tiritóriu ki Betel di Australázia ta kuida di el.

Alvês é difísil kridita ma uns ténpu atras N ka gostaba di pregason. Gósi, N ta ama pregason! N da kónta ma ka nporta kuzê ki kontise na nos vida, nu pode ten alegria di verdadi, óras ki nu ta sirbi Jeová di tudu nos korason. N ka ten dúvida ma kes 18 anu ki dja N ten ta sirbi Jeová djuntu ku Alex sta ta ser kes anu más filís di nha vida. Gósi, N ta ntende klaru ma salmista Davidi tinha razon kantu ki el fla Jeová: ‘Tudu kes ki ta djobe proteson na bo ta ser filís; es ta grita di alegria sénpri. I kes ki ta ama bu nómi ta ben fika kontenti pamodi bo.’ — Sal. 5:11.