Apoia nos Líder Jizus

1. Kal ki é vontadi di Jeová oji?

OJI vontadi di Deus é pa notísias sábi di Reinu pregadu na Téra interu. (Mar. 13:10; 1 Tim. 2:3, 4) Kel trabadju li é di Jeová i el é txeu inportanti, pur isu el skodje se Fidju Jizus, ki el ta ama, pa orienta kel trabadju li. Dja ki Jizus é nos Líder, nu pode ten sertéza ma trabadju di pregason ta fazedu sima Jeová krê antis di fin ben. — Mat. 24:14.

2. Kuzê ki nu sta ben odja na kel studu li?

² Na kel studu li, nu ta ben odja modi ki Jizus sta ta uza ‘skravu fiel i prudenti’ pa da-nu kumida spritual i pa organiza se sigidoris pa kel kanpanha di pregason más inportanti di stória. (Mat. 24:45) Tanbê nu sta ben odja kuzê ki kada un di nos pode faze pa apoia Jizus i skravu fiel.

JIZUS STA TA ORIENTA TRABADJU DI PREGASON

3. Ki autoridadi ki Jizus resebe?

³ Modi ki nu pode ten sertéza ma Jizus sta ta orienta trabadju di pregason? Poku ténpu antis di Jizus subi pa Séu, el parse pa alguns di se sigidoris fiel na un monti na Galilea. El fla: ‘N dadu tudu autoridadi na Séu i na Téra.’ Tanbê el fla: ‘Pur isu, nhos bai i nhos faze disiplus di algen di tudu nasons’. (Mat. 28:18, 19) Nton, autoridadi ki Jizus resebe tanbê ta inkluiba orienta trabadju di pregason.

4. Pamodi ki nu pode ten sertéza ma ti inda Jizus sta ta orienta trabadju di pregason?

⁴ Jizus fla ma trabadju di pregason i di faze disiplus ta ben fazedu na ‘tudu nasons’. Tanbê el fla ma el ta staba ku se sigidoris ‘tudu dia, ti fin di es sistéma.’ (Mat. 28:20) Nton, kes palavra li ta mostra klaru ma Jizus ti inda sta ta kontinua ta orienta trabadju di pregason.

5. Modi ki nu sta ta djuda kunpri kel profesia ki sta na Salmo 110:3?

⁵ Jizus tinha sertéza ma na ténpu di fin ta tinha trabadjadoris pa faze trabadju di pregason. El sabia ma kes palavra di salmista ta ben kunpriba. El fla: ‘Bu povu ta oferese ses kabésa di livri vontadi na dia ki bu izérsitu sta pripara.’ (Sal. 110:3) Si bu sta ta prega notísias sábi di Reinu, nton bu sta ta apoia Jizus i skravu fiel, i bu sta ta djuda kunpri kel profesia li. Kel trabadju li dja sta ta fazedu, má el ten alguns difikuldadi.

6. Kal ki é un di kes difikuldadi ki kes ki ta prega notísias sábi di Reinu ta pasa pa el oji?

⁶ Un di kes difikuldadi é ki kes algen ki ta prega notísias sábi ta pasa pa opozison. Kes algen ki bandona i fika kóntra organizason di Jeová, kes xéfi di relijion i pulítikus ta spadja mintira sobri nos trabadju. Si nos família, kes algen ki nu konxe i kolégas di trabadju kridita na kes mintira li, es pode faze-nu preson pa nu para di prega i di sirbi Jeová. Na alguns país nos inimigu ta amiasa, ta ataka i ta poi alguns di nos irmons ku irmans na kadia. Nu ka ta fika spantadu ku kel-li. Jizus dja flaba: ‘Nhos ta ser odiadu pa tudu nasons, pamodi nha nómi.’ (Mat. 24:9) Tudu kes kuza li ta prova ma Jeová sta kontenti ku nos. (Mat. 5:11, 12) Tudu kel opozison li ta ben di Satanás. Má Jizus ten mutu más puder ki Satanás! Ku ajuda di Jizus, notísias sábi sta ta pregadu na tudu nason. Nu ben odja alguns próva.

7. Kuzê ki bu sta ta odja ki ta prova ma Apocalipse 14:6, 7 sta ta kunpri?

⁷ Otu difikuldadi ki nu ta pasa pa el óras ki nu ta prega é pamodi txeu algen ka ta pâpia mésmu língua ki nos. Na kel vizon ki Jizus da apóstlu Juan el fla ma na nos ténpu notísias sábi ta pregadu, sikrê ku kel difikuldadi li. (Lé Apocalipse 14:6, 7.) Modi ki kel-li sta ta kontise? Nu sta ta da txeu algen oportunidadi di prende sobri mensaji di Reinu. Pur izénplu, pesoas na mundu interu pode lé informasons ku bazi na Bíblia na nos site jw.org na más di mil língua! Nu dadu aprovason pa traduzi livru Vive filís pa tudu ténpu! na más di 700 língua! El é kel livru prinsipal ki nu ta uza pa studa ku algen pa faze disiplus. Tanbê nu ta dadu kumida spritual através di gravasons, vídius pa surdus i publikasons na braili pa ségus. Nu sta ta odja profesias di Bíblia ta kunpri. Algen ‘di tudu língua di nasons’ sta ta prende pâpia ‘língua puru’ di kes verdadi di Bíblia. (Zac. 8:23; Sof. 3:9) Tudu kes kuza li sta ta fazedu pamodi Jizus Kristu sta ta orienta es trabadju.

8. Ki rezultadus nu sta ta ten na trabadju di pregason?

⁸ Oji más di 8 milhon di algen na 240 país ta faze párti di organizason di Jeová i tudu anu milharis di algen ta batiza! Má kes kualidadi ki kes novu disiplu ta dizenvolve, ki é kel ‘manera di ser novu’, é mutu más inportanti di ki kantu algen ki ta batiza. (Col. 3:8-10) Txeu di es dexa di faze konportamentu seksual mariadu, violénsia, di ten prekonseitu i txeu orgulhu di ses país. Kel profesia ki sta na Isaías 2:4 sta ta kunpri pamodi es ka sta ‘ta prende géra más.’ Dja ki nu ta sforsa pa ten kel manera di ser novu, nu ta djuda pesoas ben pa organizason di Deus i nu ta prova ma nu sta ta sigi nos Líder, Jizus Kristu. (João 13:35; 1 Ped. 2:12) Pamodi ki kel-li sta ta kontise? Pamodi Jizus sta ta da-nu kel ajuda ki nu meste.

JIZUS SKODJE UN SKRAVU

9. Sima sta na Mateus 24:45-47, kuzê ki Jizus fla ma ta kontiseba na ténpu di fin?

⁹ Lé Mateus 24:45-47. Jizus fla ma na ténpu di fin el ta ben skodjeba un ‘skravu fiel i prudenti’ pa da kumida spritual. Nton, nu pode speraba ma kel skravu li ta trabadjaba txeu na nos ténpu. I é kel-li ki sta ta kontise. Jizus sta ta uza un grupu pikinoti di ómis skodjedu ku spritu santu pa da povu di Deus i kes algen ki ten interesi ‘kumida [spritual] na óra sértu’. Kes ómi li, es ka ta atxa ma es é dónu di fé di otus algen. (2 Cor. 1:24) Envês di kel-li, es ta rekonhese ma Jizus Kristu é ‘líder i governanti’ di se povu. — Isa. 55:4.

10. Kal di kes livru ki ta parse na kes dizenhu ki djuda-u kumesa ta sirbi Jeová?

¹⁰ Désdi 1919, skravu fiel dja faze txeu publikason ki dja da kes algen ki mostra interesi oportunidadi di prende verdadi di Palavra di Deus. Na 1921, skravu faze livru A Harpa de Deus, pa djuda kes ki tinha interesi prende kes verdadi prinsipal di Bíblia. Sima ténpu ba ta muda, fazedu otus livru. Ki livru ki djuda-u konxe i ama Jeová? É “Seja Deus Verdadeiro”, A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, O Que a Bíblia Realmente Ensina?, Kuzê ki nu pode prende na Bíblia? ô kel livru más novu, Vive filís pa tudu ténpu!? Obijetivu di tudu kes livru li é djuda-nu faze disiplus, i kada un di es éra kel ki nu staba ta meste na kel ténpu ki es fazedu.

11. Pamodi ki é inportanti nu resebe kumida spritual?

¹¹ Má é ka sô kes algen ki mostra interesi ki meste kumida spritual. Nos tudu nu meste. Apóstlu Polu fla: ‘Kumida fórti é pa algen maduru’. Tanbê el fla ma aplika kel ki nu prende na Bíblia ta djuda-nu ‘sabe kuzê ki é dretu i kuzê ki é mariadu.’ (Heb. 5:14) Gósi sigi lei di Jeová é difísil pamodi txeu algen ta faze konportamentu seksual mariadu. Má Jizus ta kuida di nos i el ta da-nu kumida spritual ki nu meste pa nu ten un fé fórti. Kel kumida spritual li ki nu ta resebe ta ben di Bíblia, ki é Palavra di Deus. Skravu fiel ta pripara i el ta distribui kel kumida dibaxu di orientason di Jizus.

12. Sima Jizus, modi ki nu da nómi di Deus ónra?

¹² Sima Jizus, nu ta da nómi di Deus kel ónra ki el merese. (João 17:6, 26) Pur izénplu, na 1931 nu kumesa ta uza nómi Tistimunhas di Jeová, ki sta na Bíblia. Asi nu mostra ma nómi di Deus é inportanti pa nos i ma nu krê ser konxedu pa nómi di nos Pai na Séu. (Isa. 43:10-12) I désdi otubru di 1931, nómi Jeová ta parse na kapa di revista Sentinéla. Alén di kel-li, Tradução do Novo Mundo da Bíblia Sagrada poi nómi di Deus na kes lugar ki es traba el. Kel-li é diferenti di kes relijion ki ta fla ma es ta sigi Jizus, ki tra nómi Jeová di txeu traduson di Bíblia!

JIZUS ORGANIZA SE SIGIDORIS

13. Kuzê ki ta da-u sertéza ma Jizus sta ta uza ‘skravu fiel i prudenti’ oji? (João 6:68)

¹³ Através di ‘skravu fiel i prudenti’ Jizus faze un organizason spesial li na Téra pa djuda más algen adora Jeová. Modi ki bu ta xinti pamodi bu ta faze párti di kel organizason li? Talvês bu ta xinti sima apóstlu Pedru, ki fla Jizus: ‘Pa kenha ki nu ta bai? Sinhor ten palavras di vida pa tudu ténpu.’ (João 6:68) Na undi ki nu pode staba si nu ka konxeba organizason di Jeová? Através di es organizason, Jizus ta da-nu tudu kel ki nu meste pa nu kontinua fiel pa Deus. Tanbê el ta trena-nu pa nu ten bons rezultadu na pregason. I el ta djuda-nu ten kel ‘manera di ser novu’, asi pa nu pode agrada Jeová. — Efé. 4:24.

14. Modi ki faze párti di organizason di Jeová djuda-u duránti koronavírus?

¹⁴ Jizus ta da bons orientason na ténpus di frónta. Kel-li fika klaru kantu koronavírus kumesa. Timenti txeu algen na mundu ka sabia kuzê ki es ta fazeba, Jizus da-nu orientason klaru pa proteje-nu. Nu insentivadu pa nu uza maskra óras ki nu sta na meiu di algen i ivita sta djuntu ku otus algen. Ansions lenbradu pa es pâpia ku tudu algen na kongregason sénpri i pa es fika sienti na kuzê ki es meste. (Isa. 32:1, 2) Tanbê nu resebe más orientason i nkorajamentu através di kes rilatóriu di Grupu Enkaregadu di Óbra.

15. Ki orientason ki nu dadu sobri faze runion i pregason duránti koronavírus i kal ki foi rezultadu?

¹⁵ Duránti koronavírus tanbê nu resebe orientason klaru sobri modi ki nu ta faze runion i modi ki nu ta partisipa na pregason. Di un óra pa kel otu, nu kumesa ta sisti runion, asenbleia i kongrésu através di internet. Tanbê nu kumesa ta da tistimunhu kuazi sô pa karta i tilifóni. Jeová abênsua sforsu ki nu faze. Txeu filial fla ma nunbru di publikador omenta txeu. Na verdadi txeu algen tevi bons spiriénsia na es ténpu di koronavírus. — Odja kuadru “Jeová sta ta abênsua nos pregason”.

16. Di kuzê ki nu pode ten sertéza?

¹⁶ Talvês alguns algen atxa ma organizason izajera na kes medida sobri koronavírus. Má fika kada bês más klaru ma nu resebe bons orientason. (Mat. 11:19) I óras ki nu ta midita na manera ki Jizus sta ta orienta se povu ku amor, nu ta ten sertéza ma ka ta nporta kuzê ki ben kontise na futuru, Jeová i se Fidju ki el krê txeu ta sta ku nos. — Lé Hebreus 13:5, 6.

17. Modi ki bu ta xinti pamodi Jizus é nos Líder?

¹⁷ Nu sta kontenti pamodi Jizus é nos Líder! Nu ta faze párti di un organizason ki é unidu sikrê ten algen di kultura, rasa i língua diferenti. Nu ta resebe txeu instruson di Palavra di Deus i trenu ki nu meste pa nu faze trabadju di pregason. Kada un di nos sta ta inxinadu pa nu ten kel manera di ser novu i nu sta ta prende ama kunpanheru. Nu ten txeu motivu pa nu xinti orgulhu pamodi Jizus é nos Líder!