Perguntas ki leitoris ta faze
Kuzê ki Jizus krê flaba ku kes palavra li: ‘Ka nhos pensa ma N ben poi pas na Téra’?
Jizus inxina algen sta na pas ku kunpanheru. Má un bês el fla se apóstlus: ‘Ka nhos pensa ma N ben poi pas na Téra; é ka pas ki N ben traze, má é spada. Pamodi N ben traze divizon entri ómi ku se pai, fidju-fémia kóntra se mai i nóra kóntra se sógra.’ (Mat. 10:34, 35) Kuzê ki Jizus krê flaba ku kel-li?
Jizus ka krê siparaba família di kunpanheru. Má el sabia ma kuzas ki el ta inxinaba ta trazeba divizon na alguns família. Nton, kes ki krê batiza i bira disiplus di Jizus meste ntende ma alvês ses família ka ta fika kontenti ku ses disizon. Si es ten maridu ô mudjer, ô un algen na família ki ka ta sirbi Jeová, kontinua ta sigi kes kuza ki Jizus inxina pode ser difísil.
Bíblia ta insentiva kes algen ki ta sirbi Deus ‘pa mante pas ku tudu algen.’ (Rom. 12:18) Má na alguns família kes kuza ki Jizus inxina pode bira sima un ‘spada’. Kel-li ta kontise óras ki un algen na família ta seta kes kuza ki Jizus inxina i otus algen na família ta fika kóntra kes kuza ki Jizus inxina. Si kel-li kontise kes algen na família pode bira ‘inimigus’ di kel ki sta ta prende verdadi. — Mat. 10:36.
Kes algen ki ta sirbi Jeová ki ta mora ku ses família ki é di otu relijion, alvês ten ki disidi si es ta dexa Jeová i Jizus kontenti ô si es ta dexa ses família kontenti. Pur izénplu, un família ki ka ta sirbi Jeová pode insentiva-nu pa nu partisipa na un fésta ki sta ligadu ku relijion falsu. Nton nu ten ki disidi na ki ladu ki nu ta fika. Jizus fla: ‘Ken ki ta ama se pai ô se mai más di ki mi ka merese-m’. (Mat. 10:37) É klaru ki Jizus ka krê flaba ma si un algen biraba se disiplu el tinha ki amaba se mai ku se pai más poku. Envês di kel-li el inxina se disiplus modi ki es ta disidiba kuzê ki éra más inportanti na ses vida. Si kes algen di nos família ki ka ta sirbi Jeová fika kóntra nos pamodi nu ta adora Jeová, nu debe kontinua ta ama-s, má nos amor pa Deus debe sta sénpri na primeru lugar.
É ka sábi óras ki nos família ta fika kóntra nos. Má nu meste lenbra di kes palavra li: ‘Ken ki ka ta seta se staka di tortura i ki ka ta sigi-m ka merese ser nha disiplu.’ (Mat. 10:38) Kel-li krê fla ma pa kes algen ki ta sirbi Deus, opozison na família ta faze párti di sufrimentu ki disiplus di Jizus ta pasa pa el. Má pamodi ses konportamentu, es ta spéra ma ses família ta muda di ideia i es ta krê prende sobri Bíblia. — 1 Ped. 3:1, 2.