Odja bebida alkólika sima Jeová ta odja-l

DI SERTEZA bu ta da txeu valor pa tudu prezenti ki Jeová dja da-u i kel-li ta inklui liberdadi di skodje modi ki bu ta uza kes prezenti li. Sima sta na Bíblia, vinhu é un prezenti di Deus. Bíblia ti mésmu ta fla: ‘Pon ta fazedu pa da algen alegria i vinhu ta poi vida sábi’. (Ecl. 10:19; Sal. 104:15) Má talvês dja bu da kónta ma alguns algen ten prubléma ku bebida alkólika. Tanbê, pesoas na mundu interu ten opinions diferenti sobri bebida alkólika. Nton, kuzê ki pode djuda un sérvu di Jeová toma un bon disizon sobri kel asuntu li?

Ka ta inporta na undi ki nu ta mora ô di ki manera nu kriadu, nu debe kunfia na konsedjus di Deus envês di kunfia na kuzê ki pesoas na nos volta ta pensa. Asi nu ta ten un vida más filís.

Sima dja bu repara, txeu algen na mundu ta bebe dimás i txeu bês. Alguns talvês ta bebe bebida alkólika pa es xinti sábi. Otus ta bebe pa djuda-s lida ku ses prubléma. I na alguns lugar, pesoas ta atxa ma kes algen ki ta bebe dimás é fórti.

Má sérvus di Jeová pode sigi orientasons ki ten sabedoria di ses Kriador, ki krê-s txeu. Pur izénplu, Jeová ta aviza-nu di kes mau rezultadu ki nu ta ten si nu bebe bebida alkólika dimás. Na Provérbios 23:29-35 nu pode lé sobri un stória di un algen ki bebe dimás i ki dipôs tevi maus rezultadu.a Daniel, un ansion na Europa, ta lenbra di modi ki se vida éra antis di el kumesa ta sirbi Jeová. El fla: “N ta bebeba dimás i pamodi kel-li N toma maus disizon. Pur isu, N tevi spiriénsias kasábi i ti inda N ta xinti xatiadu óras ki N ta pensa na es.”

Modi ki nu pode toma bons disizon sobri bebida alkólika i ivita prublémas ki nu pode ten óras ki nu ta bebe dimás? Nu debe dexa manera ki Jeová ta pensa orienta nos manera di pensa i nos manera di aji.

Nu ben odja kuzê ki Bíblia ta fla sobri bebida alkólika i pamodi ki alguns algen ta bebe.

KUZÊ KI BÍBLIA TA FLA SOBRI BEBIDA ALKÓLIKA

Palavra di Deus ka ta kondena bebe bebida alkólika na limiti. Na verdadi, Bíblia ta fla ma bebe vinhu pode ser un kuza ki ta pô-nu ta xinti sábi. El ta fla: ‘Kume bu kumida ku alegria i bebe bu vinhu ku un korason kontenti’. (Ecl. 9:7) Jizus i otus sérvu fiel di Jeová ta bebeba vinhu di vês en kuandu. — Mat. 26:27-29; Luk. 7:34; 1 Tim. 5:23.

Má, Palavra di Deus ta mostra klaru diferénsa ki ten entri bebe na limiti i fika moku. El ta fla klaru: “Ka nhos fika moku”. (Efé. 5:18) I tanbê el ta fla ma kes ki ta “bebe dimás... ka ta erda Reinu di Deus.” (1 Kor. 6:10) Ta fika klaru ma Jeová ta kondena bebe dimás. Envês di nu imita kel ki algen na nos vólta ta faze, nu debe aji di akordu ku kel ki ta agrada Deus.

Alguns algen ta atxa ma es pode bebe dimás sen fika moku. Má kel-li é txeu prigozu. Bíblia ta fla ma kenha ki é “skravu di txeu vinhu” pode faze kuzas mariadu, peka kóntra Jeová i prujudika se amizadi ku El. (Titu 2:3; Pro. 20:1) Jizus ti mésmu fla ma “bebe dimás” pode ka dexa un algen entra na mundu novu di Deus. (Luk. 21:34-36) Kuzê ki pode djuda un sérvu di Jeová ivita prublémas ki é fásil kontise pamodi bebida alkólika?

PENSA NA PAMODI KI BU TA BEBE I KANTU BU TA BEBE

É prigozu dexa nos kultura influensia manera ki nu ta pensa sobri bebida alkólika. Sérvus di Jeová ta aji ku sabedoria pa agrada-l ti mésmu na asuntus sima kumida i bebida. Bíblia ta fla: “Ô nhos kume, ô nhos bebe, ô nhos faze kalker otu kuza, nhos faze tudu kuza pa glória di Deus.” (1 Kor. 10:31) Nu ben odja alguns pergunta i prinsípius di Bíblia ki pode djuda-nu:

N ta bebe bebida alkólika sô pa otus algen pode gosta di mi? Êxodo 23:2 ta fla: ‘Ka bu sigi un monti di algen’. Li Jeová staba ta aviza kes israelita pa es ka imitaba kes algen ki ka ta agradaba el. Kel konsedju li ta sirbi pa sérvus di Jeová oji tanbê. Si nu dexa otus algen influensia nos manera di pensa i nos disizon sobri bebida alkólika, nu pode para di vive di akordu ku leis di Jeová i perde nos amizadi ku el. — Rom. 12:2.

N ta bebe bebida alkólika pa N mostra otus algen ma mi é fórti? Na alguns kultura, bebe bebida alkólika dimás i txeu bês é un kuza normal i ki es ta seta. (1 Ped. 4:3) Má repara kel konsedju ki sta na 1 Koríntius 16:13: “Nhos fika sienti, nhos mante firmi na fé, nhos ser korajozu, nhos bira poderozu.” Bebida alkólika pode djuda un algen bira poderozu? É klaru ki nau. Bebida alkólika pode prujudika kapasidadi di algen pensa di manera klaru i di toma bons disizon. Pur isu, bebe dimás ka ta prova ma un algen é fórti, envês di kel-li el ta prova ma un algen é tolu. Isaías 28:7 ta fla ma kes ki ta disvia pamodi bebida alkólika ta fika prujudikadu.

Kel forsa ki nu meste pa faze kel ki é dretu ta ben di Jeová i el ta involve ‘fika sienti i mante firmi na fé.’ (Sal. 18:32) Un sérvu di Jeová ta faze kel-li óras ki el ta toma kuidadu pa ivita prigus i el ta toma disizons ki ka ta prujudika se amizadi ku Jeová. Jizus mostra kel forsa li kantu el staba na téra i txeu algen ta ruspetaba el pamodi el éra korajozu i el staba disididu na faze kel ki é dretu.

N ta bebe bebida alkólika pa N fuji di nhas prubléma? Jeová uza spritu santu pa poi un salmista ta skrebe kes palavra li: ‘Kantu preokupasons toma kónta di mi, bu [Jeová] konsola-m i bu pô-m ta fika kalmu.’ (Sal. 94:19) Si prublémas bira txeu dimás, djobe ajuda na Jeová envês di bebe bebida alkólika. Un bon manera di faze kel-li, é ora pa Jeová sénpri. Tanbê, txeu algen da kónta ma é bon djobe konsedjus na un irmon maduru na kongregason. Na verdadi, bebe bebida alkólika pa lida ku prublémas pode dexa un algen sen forsa pa faze kel ki é dretu. (Ose. 4:11) Daniel, ki dja nu papiaba di el antis, fla: “N luta kóntra preokupason i ku sentimentus di kulpa. N ta bebeba pa N xintiba ménus preokupadu, má nhas prubléma bira más txeu. N perde nhas amigu i ruspetu pa nha kabésa.” Kuzê ki djuda Daniel? El fla: “N da kónta ma N mesteba Jeová na nha ladu envês di bebida alkólika. N konsigi lida ku nhas prubléma i N vense-s.” Na verdadi Jeová sta sénpri prontu pa djuda-nu sikrê ta parse ma nos situason ka ten soluson. — Fil. 4:6, 7; 1 Ped. 5:7.

Si alvês bu ta bebe bebida alkólika, bu debe pensa si bu meste faze algun mudansa na kuantidadi ki bu ta bebe ô ki óras ki bu ta bebe. Pergunta bu kabésa: ‘Algun algen na nha família ô un amigu ki N krê txeu dja mostra-m ma es sta preokupadu ku manera ki N ta bebe bebida alkólika?’ Si kel-li sta ta kontise, talvês é pamodi bu sta ta dizenvolve un prubléma ki inda bu ka da kónta. ‘N sta ta bebe más di ki antis?’ Algen ki sta na kel situason li talvês inda ka sta visiadu na bebida alkólika, má el pode kumesa ta fika visiadu. ‘N ta konsigi fika sen bebe bebida alkólika pa alguns dia ô más?’ Si bu ta atxa ma kel-li é difísil, talvês bebida alkólika dja bira un vísiu pa bo. Na kel situason li, bu pode meste djobe ajuda di un dotor pa vense kel prubléma li.

Dja ki bebida alkólika pode traze txeu prubléma, alguns sérvu di Jeová disidi ka bebe ninhun tipu di bebida alkólika. Otus talvês disidi ka bebe pamodi es ka gosta. Si un algen ki bu konxe toma kel disizon li, bu pode mostra-l bondadi óras ki bu ta ruspeta se disizon i bu ka ta kritika-l.

Talvês bu disidi ma ta sérba bon poi limiti na kantu bebida bu ta bebe. Ô bu pode disidi kantu bês ki bu ta bebe, talvês un bês pa simana ô óras ki bu sta kume. Otus disidi poi limiti na ki tipu di bebida ki es ta bebe. Pur izénplu, es pode disidi bebe vinhu ô serveja na limiti, má ka toma bebidas fórti ô otus bebida ki ta misturadu. Si bu poi limiti na kantu bebida bu ta bebe ta ser más fásil bu kontrola. Un sérvu di Jeová maduru ki ta poi limiti ka meste fika ku vergónha di kuzê ki otus ta pensa.

Óras ki nu ta disidi kantu bebida alkólika ki nu ta bebe, tanbê nu debe pensa na kuzê ki otus algen ta xinti. Romanus 14:21 ta fla: “É midjór ka kume karni, nen bebe vinhu, nen faze nada ki ta poi bu irmon ta tropesa.” Modi ki bu pode aplika kel konsedju li? É óras ki bu ta mostra amor. Si bu ta atxa ma bebe bebida alkólika pode ofende algen, nton bu amor ta pô-u ka ta bebe na kel momentu. Asi, bu ta mostra ma bu ta preokupa i ruspeta kuzê ki otus ta xinti. Bu ka ta djobe bu própi vantajen, má kel di otu algen. — 1 Kor. 10:24.

Alén di kel-li, talvês govérnu ten leis sobri bebida alkólika i un sérvu di Jeová debe obidese kes lei li. Pur izénplu, alguns di kes lei li pode fla ku ki idadi un algen pode bebe ô talvês é un lei ki ka ta dexa un algen konduzi ô uza alguns mákina dipôs ki el bebe bebida alkólika. — Rom. 13:1-5.

Jeová da-nu txeu prezenti bunitu i un di es é liberdadi di disidi modi ki nu ta uza kes prezenti. Kel-li ta inklui kel prezenti di uza nos liberdadi di skodje pa disidi kuzê ki nu ta kume i kuzê ki nu ta bebe. Nu ka ten dúvida ma nos é txeu gratu pa nos liberdadi di skodje i nu krê mostra nos gratidon óras ki nu ta toma disizons ki ta agrada Jeová.