Nunka ka bu sai di nos paraízu spritual

1. Kuzê ki é paraízu spritual i kuzê ki nu sta disididu na faze?

OJI ten un paraízu na téra ki ten txeu algen ki sta okupadu ta faze txeu kuza bon. El ten milhons di algen ki ten pas di verdadi. Kes algen ki dja sta na kel paraízu li sta disididu na nunka ka sai di el. Tanbê es krê pa más algen djunta ku es na kel paraízu li. Kuzê ki é es paraízu? El é un paraízu spritual!a

2. Kuzê ki ten di spesial na kel paraízu spritual?

² Di un manera spesial, Jeová kria un anbienti undi pesoas sta na pas i unidu, sikrê es ta vive na es mundu mau di Satanás ki é prigozu i pesoas ta ôdia kunpanheru. (1 Jn. 5:19; Apo. 12:12) Nos Deus ki ta ama-nu ta odja modi ki es mundu ta prujudika pesoas. Má, el ta poi se sérvus ta xinti suguru, asi pa es kontinua ta sirbi-l ku alegria. Na se Palavra el ta fla ma kel paraízu spritual é sima un lugar suguru pa ‘sukundi’ i un ‘jardin ben regadu’. (Isa. 4:6; 58:11) Ku benson di Jeová, kes ki ta vive na kel paraízu li ta xinti filís i suguru duránti es ténpu di fin konplikadu. — Isa. 54:14; 2 Ti. 3:1.

3. Modi ki profesia ki sta na Isaías kapítlu 65 kunpri primeru na kes judeu na pasadu?

³ Jeová uza proféta Isaías pa mostra modi ki vida ta sérba pa kes algen ki ta vive na kel paraízu spritual. Bu pode atxa kuzê ki Jeová fla sobri kel-li na Isaías 65, ki kunpri primeru na anu 537 A.K. Na kel ténpu, kes judeu ki rapende libertadu di Babilónia i es volta pa ses téra. Jeová abensua-s i el djuda-s konpo sidadi di Jiruzalen ki staba tudu distruídu i kel ténplu ki éra lugar undi es ta adoraba Jeová na Israel. — Isa. 51:11; Zac. 8:3.

4. Modi ki profesia ki sta na Isaías kapítlu 65 sta ta kunpri na nos ténpu?

⁴ Kel profesia di Isaías kumesa ta ten sugundu kunprimentu na anu 1919 D.K., kantu povu di Jeová na nos ténpu libertadu di Babilónia Grandi. Dipôs di kel-la kel paraízu spritual kumesa ta spadja na mundu interu. Pregadoris di Reinu ki tinha txeu zelu forma txeu kongregason i es dizenvolve kualidadi spritual. Ómis i mudjeris ki antis éra violéntu i tinha konportamentu mariadu “bisti di kel manera di ser novu di akordu ku vontadi di Deus”. (Efé. 4:24) É klaru ki txeu di kes benson ki Izaías ta pâpia di el ta ben kunpri na futuru, na mundu novu. Má mésmu gósi nu sta kontenti di ten txeu benson. Nu ben odja modi ki kel paraízu spritual ta afeta-nu i pamodi ki nunka nu ka debe sai di el.

MODI KI KES ALGEN KI STA NA PARAÍZU SPRITUAL TA XINTI

5. Sima sta na Isaías 65:13, kuzê ki nu ten na kel paraízu spritual?

⁵ Ku bon saúdi i bon kumida. Kel profesia di Izaías ta mostra un diferénsa grandi ki ten entri kes algen ki ta vive na kel paraízu spritual i kes algen ki ta vive fóra di el. (Lé Isaías 65:13.) Jeová ta da kes algen ki ta adora-l tudu kel ki es meste pa es kontinua se amigu. Nu ten se spritu santu, Bíblia i txeu publikason ku vídiu ki ten bazi na Bíblia, ki nu pode ‘kume, bebe i fika kontenti’. (Konpara ku Apokalipse 22:17.) Má, situason di kes algen ki ka sta na kel paraízu spritual é txeu diferenti. Es ta ‘pasa fómi, sedi i vergónha’ pamodi es ka ten un amizadi ku Deus — Amós 8:11.

6. Modi ki Joel 2:21-24 ta mostra kes prezenti ki Jeová ta da-nu, i modi ki nu pode tra pruvetu di es?

⁶ Profesia di Juel ta pâpia di alguns kuza sima gran, vinhu i azeti pa mostra ma Jeová ta da-nu tudu kuza ki nu meste pa nu kontinua ku un fé fórti. Kel-li ta inklui instruson ki ta ben di Bíblia. (Joel 2:21-24) Pur izénplu, Jeová ta faze kel-li através di Bíblia, nos publikasons ki ten bazi na Bíblia, jw.org, runions, asenbleias i kongrésus. Nu pode tra pruvetu di kes kuza li tudu dia, asi nu ta ten bon saúdi spritual i nu ta xinti más animadu.

7. Kuzê ki ta poi nos ‘korason ta xinti sábi’? (Isaías 65:14)

⁷ Filís i satisfetu. Povu di Jeová pode “grita di alegria” pamodi es sta txeu gratu pa Jeová. (Lé Isaías 65:14.) Kes verdadi ki ta inkoraja-nu, kes promésa ki ta konsola-nu ki sta na Bíblia i kel speransa sértu ki nu ten pa futuru pamodi sakrifisiu di resgati ta poi nos ‘korason ta xinti sábi’. Pâpia di kes kuza li ku nos irmons i irmans na fé ta pó-nu ta xinti filís di verdadi. — Sal. 34:8; 133:1-3.

8. Ki dôs kuza inportanti ten na paraízu spritual?

⁸ Kel amor i union ki ten entri povu di Jeová é kes dôs kuza más inportanti na kel paraízu spritual. Es amor ki ta “uni tudu algen”, ta djuda-nu imajina modi ki vida ta ben ser na mundu novu, undi sérvus di Jeová ta ben ama i sta unidu ku kunpanheru más txeu inda. (Kol. 3:14) Odja kuzê ki un irman repara sobri povu di Jeová primeru bês ki el sisti un runion, el fla: “Nunka N ka xintiba filís di verdadi, nen mésmu na nha família. Primeru bês ki N odja pesoas ta mostra amor di verdadi pa kunpanheru foi kantu N sisti runion di Tistimunhas di Jeová.” Ken ki krê xinti alegria di verdadi i satisfetu meste sta na nos paraízu spritual. Ka ta inporta kuzê ki mundu ta pensa di sérvus di Jeová, es ten un bon nómi na família di Jeová. — Isa. 65:15.

9. Kuzê ki Isaías 65:16, 17 ta promete sobri kes kuza ki ta pô-nu ku dór i ta sufri?

⁹ Trankuilu i kalmu. Isaías 65:14 ta fla ma kes algen ki skodje fika fóra di kel paraízu spritual ta ‘grita pamodi dór di korason i ta txora pamodi ses spritu maguadu.’ É verdadi ma ten kuzas ki ta poi povu di Deus ta xinti dór i ta sufri tanbê. Má, lógu kes prubléma ta ben ‘skesedu i es ta fika sukundidu di odjus di Deus’. (Lé Isaías 65:16, 17.) Jeová ta ben kaba ku nos prublémas i ku ténpu nu ka ta lenbra más dór ki kes prubléma pó-nu ta xinti.

10. Pamodi ki bu ta xinti ma é un benson sta djuntu ku nos irmons ku irmans? (Odja fotu.)

¹⁰ Mésmu gósi nu ta xinti kalmu óras ki nu sta na nos runion, undi nu pode fika trankuilu i nu ka meste konsentra na kes kuza di kel mundu mau li ki ta pô-nu preokupadu dimás. Tanbê, nu pode djuda nos irmon ku irmans xinti kalmu óras ki nu ta mostra amor, alegria, pas, bondadi i brandura, ki é kes kualidadi ki ta faze párti di frutu di spritu santu di Deus. (Gál. 5:22, 23) É un benson pa nos faze párti di organizason di Deus! Kes algen ki kontinua déntu di kel paraízu spritual li ta ben odja promésa di Deus di “un séu novu ku un téra novu” ta kunpri.

11. Di akordu ku Isaías 65:18, 19, modi ki kel paraízu spritual ki Jeová faze ta afeta-nu?

¹¹ Gratu i animadu. Dipôs, Izaías ta splika pamodi ki nu debe ‘fika kontenti i ku alegria’ na paraízu spritual. É Jeová ki kria kel paraízu spritual li. (Lé Isaías 65:18, 19.) Pur isu, nu ka ta fika dimiradu ki Jeová sta ta uza-nu pa djuda pesoas sai di kel mundu li i entra na nos paraízu spritual, ki é bunitu! Nu sta animadu pamodi kes benson ki nu ten di sta na verdadi i nu ta xinti motivadu na fla otus algen sobri kes benson li. — Jer. 31:12.

12. Modi ki kel promésa ki sta na Isaías 65:20-24 ta pô-u ta xinti, i pamodi?

¹² Nu ta xinti gratu i kontenti ku kel speransa ki nu tene dja ki nu ta fazi párti di paraízu spritual. Imajina kuzê ki nu ta ben odja i faze na kel mundu novu di Deus! Bíblia ta promete: ‘Nunka más ka ta ten la un mininu ki ta vive poku dia, nen algen bédju ki ka ta vive tudu se ténpu’. Nu ta ben ‘faze kazas i mora na es i planta lugaris xeiu di pé di uva i kume di ses fruta.’ Nu ‘ka ta ben trabadja duru sen rezultadu’, pamodi ‘Jeová ta ben abensua-nu.’ El ta promete da-nu un vida ku obijetivu i xeiu di filisidadi. ‘Timenti inda es sta ta pâpia’ el ta sabe kuzê ki kada algen meste i el ta ben ‘faze vontadi di tudu kuza bibu.’ — Isa. 65:20-24; Sal. 145:16.

13. Modi ki Isaías 65:25 ta mostra kes mudansa ki un algen ta faze na vida óras ki el kumesa ta sirbi Jeová?

¹³ Pas i suguransa. Ku ajuda di spritu santu di Deus, txeu algen ki éra violéntu i ki ka éra onéstu faze txeu mudansa na ses vida. (Lé Isaías 65:25.) Es faze txeu sforsu pa es muda kel manera di ser ki es tinha. (Rom. 12:2; Efé. 4:22-24) É verdadi ki povu di Deus inda é inperfeitu i nu ta kontinua ta fadja. Má, Jeová sta ta uni “tudu tipu di algen” ki ta ama-l i ki ta ama kunpanheru. Pamodi kel-li, es ten pas i union di verdadi. (Titu 2:11) Kel-li é un milagri ki sô kel Deus Tudu Poderozu pode faze!

14. Modi ki izénplu di un irmon ta mostra ma kes palavra na Isaías 65:25 é verdadi?

¹⁴ Un algen pode muda se manera di ser própi? Odja un izénplu di un jóven ki antis di fazeba 20 anu dja baba kadia txeu bês. El éra violéntu i el ta fazeba konportamentu seksual mariadu. El podu prézu pamodi el ta furtaba karus, el ta furtaba na kazas di algen i el ta fazeba otus krimi. Sénpri el staba prontu pa briga. Kantu el obi verdadis di Bíblia pa primeru bês i el kumesa ta sisti runion di Tistimunhas di Jeová, el fika konvensidu ma dja el atxaba un obijetivu na vida ki é adora Jeová na kel paraízu spritual. Dipôs ki el batiza, el ta pensaba na modi ki Isaías 65:25 ta aplika na el. El dexa di ser un algen violéntu i el bira un algen di pas.

15. Pamodi ki nu krê konvida otus algen pa djunta ku nos na paraízu spritual, i modi ki nu pode faze kel-li?

¹⁵ Isaías 65:13 ta kumesa ta fla: ‘Jeová, kel Sinhor más Grandi fla’. Versíklu 25 ta tirmina ku kes palavra li: ‘É Jeová ki fla.’ Se promésas sénpri ta kunpri. (Isa. 55:10, 11) Kel paraízu spritual dja sta ta izisti oji. Jeová faze un família di irmons ku irmans ki ta adora-l i ki ka ten konparason. Pamodi nu ta faze párti di kel família spritual li, nu ta xinti pas i nu ta xinti suguru na kel mundu violéntu li. (Sal. 72:7) É pamodi kel-li ki nu krê djuda tudu algen ki nu pode djunta ku nos na kel família spritual li. Nu ta faze kel-li, óras ki nu ta konsentra na trabadju di faze disiplus. — Mat. 28:19, 20.

DJUDA OTUS ALGEN ENTRA NA PARAÍZU SPRITUAL

16. Kuzê ki pode djuda pesoas krê entra na paraízu spritual?

¹⁶ Kada un di nos pode faze un kuza inportanti pa djuda otus algen krê entra na paraízu spritual. Nu pode faze kel-li si nu imita Jeová. El ka ta obriga ningen faze párti di se organizason. Má, ku amor el ta ‘atrai’ pesoas pa el. (Juan 6:44; Jer. 31:3) Kes algen sinseru ki prende sobri amor di Jeová i se kualidadis bunitu ta xinti atraídu pa el. Modi ki kes bon kualidadi ki nu ten i nos manera di konporta pode atrai pesoas pa kel paraízu spritual?

17. Modi ki nu pode atrai otus algen pa paraízu spritual?

¹⁷ Un manera ki nu pode atrai otus algen pa paraízu spritual é óras ki nu ta trata nos irmons ku irmans ku amor i bondadi. Óras ki un algen ta sisti runion pa primeru bês nu krê pa el xinti di mésmu manera ki kes algen ki ka éra kriston xinti kantu es bai runion na kongregason Korintu di ténpu antigu. Es fla: “Deus sta ku nhos própi.” (1 Kor. 14:24, 25; Zac. 8:23) Nton, nu meste kontinua ta sigi kel konsedju di “vive na pas ku kunpanheru.” — 1 Tes. 5:13.

18. Kuzê ki pode poi algen ta xinti vontadi di faze párti di nos organizason?

¹⁸ Sénpri nu debe sforsa pa nu odja nos irmons ku irmans di mésmu manera ki Jeová ta odja-s. Nu ta faze kel-li, óras ki nu ka ta konsentra na ses inperfeison ki ka ta dura es ka ta ben ten, má nu ta konsentra na ses bons kualidadi. Nu pode rezolve ku amor kalker prubléma ki nu ten ku kunpanheru si nu ‘mostra bondadi pa kunpanheru, konpaxon di korason i sta prontu pa púrdua kunpanheru.’ (Efé. 4:32) Asi, pesoas ki krê ser tratadu ku amor ta xinti vontadi di faze párti di kel paraízu spritual li.b

KONTINUA DÉNTU DI PARAÍZU SPRITUAL

19. (a) Sima sta na kuadru “Es sai, má es torna volta”, kuzê ki alguns algen fla kantu es volta pa paraízu spritual? (b) Kuzê ki nu debe sta disididu na faze? (Odja fotu.)

¹⁹ Nu ta xinti kontenti di faze párti di paraízu spritual! Oji kel paraízu spritual li, sta más bunitu di ki antis i sta más algen na el ta adora Jeová. Nu krê kontinua ta mostra ma nu sta gratu pa kel paraízu spritual li ki Jeová faze pa nos. Tudu algen ki krê sta ku bon saúdi, kontenti, kalmu i suguru ten ki entra na paraízu spritual i nunka sai di el. Má, nu meste toma kuidadu pamodi Satanás sta ta faze tudu kel ki el ta pode pa pô-nu ta sai di kel paraízu spritual li. (1 Ped. 5:8; Apo. 12:9) Ka nu dexa-l faze kel-li. Nu krê faze nos midjór pa nu proteje es paraízu spritual ki é bunitu, linpu i xeiu di pas.