Mostra ma bu ta da valor pa kes ómi ki é un prezenti pa kongregason

1. Kal ki é alguns prezenti ki Jizus da-nu?

NUNKA ningen ka faze más kuza pa djuda otus algen di ki Jizus. Kantu el staba na téra, txeu bês el faze milagris pa djuda pesoas. (Luk. 9:12-17) El da kel midjór prezenti ki ten, pa tudu algen kantu ki el da se vida pa nos. (Juan 15:13) Désdi ki Jizus resusitadu, el sta kontinua ta djuda-nu. Sima el promete-nu, el pidi Jeová pa baza se spritu santu, pa inxina-nu i pa konsola-nu. (Juan 14:16, 17, nóta di rodapé; 16:13) I através di runions na kongregason, Jizus sta kontinua ta da-nu kuzê ki nu meste pa nu faze disiplus na téra interu. — Mat. 28:18-20.

2. Ken ki é kes ‘ómi sima prezenti’ ki Efézius 4:7, 8 ta pâpia di el?

² Ten otu prezenti ki Jizus da-nu. Apóstlu Paulu skrebe ma dipôs ki Jizus subi pa séu, “el manda [ómis] pa ser sima prezenti.” (Lé Efézius 4:7, 8.) Paulu splika ma Jizus da-nu kes ómi li pa djuda kongregason di txeu manera. (Efé. 1:22, 23; 4:11-13) Oji, ‘kes ómi li ki é sima prezenti’, ta inklui kes ajudanti di kongregason, kes ansion i kes enkaregadu di grupu di kongregason.a É klaru ki kes ómi li é inperfeitu, pur isu es ta fadja. (Tia 3:2) Má nos Sinhor Jizus Kristu ta uza-s pa djuda-nu. Es é prezenti ki el da-nu!

3. Da un izénplu ki ta mostra modi ki nos tudu nu pode djuda na kel trabadju ki ‘kes ómi ki é sima un prezenti’ ta faze.

³ Jizus dizigina kes ómi li pa da kongregasons forsa. (Efé. 4:12) Má nos tudu, nu pode djuda-s kunpri kel responsabilidadi inportanti li. Nu pode konpara kel-li ku trabadju di faze un Salon di Reinu. Alguns di nos ta trabadja na konstruson. Otus ta djuda kes algen ki sta ta trabadja i es ta leba-s kumida ô material pa konstruson, ô es ta djuda-s di otus manera. Di mésmu manera, nos tudu nu pode djuda kes ajudanti di kongregason, ansions i enkaregadus di grupu di kongregason através di kuzas ki nu ta fla i ki nu ta faze. Nu ben odja modi ki ses trabadju duru ta djuda-nu i modi ki nu pode mostra-s i mostra Jizus, ki da-nu kes prezenti li, ma nu ta da valor pa es.

AJUDANTIS DI KONGREGASON “TA DJUDA OTUS”

4. Kal ki é alguns manera ki kes ajudanti di kongregason “djuda otus” na ténpu di apóstlus?

⁴ Na ténpu di apóstlus, alguns irmon diziginadu pa ser ajudantis di kongregason. (1 Tim. 3:8) Talvês es éra kes algen ki apóstlu Paulu skrebe ma ‘ta djudaba otus’. (1 Kor. 12:28) Ta parse ma kes ajudanti di kongregason ta fazeba txeu trabadju inportanti i otus trabadju ki ta djudaba ansions mante konsentradu na inxina i na faze vizitas di pastoreiu. Pur izénplu, talvês kes ajudanti di kongregason djuda na faze kópias di Skrituras ô es kunpra kes kuza ki mesteba pa faze kes kópia li.

5. Kal ki é alguns kuza ki ajudantis di kongregason ta faze na nos ténpu?

⁵ Pensa na alguns kuza inportanti ki ajudantis di kongregason ta faze na bu kongregason. (1 Ped. 4:10) Es pode diziginadu pa toma kónta di tiritórius ô pa kuida di kóntas di kongregason, pa pidi publikasons pa kongregason, pa uza kes ekipamentu di son i vídiu, pa ser indikador ô pa djuda konpo Salons di Reinu. Tudu kes trabadju li é inportanti pa kongregason pode tra pruvetu di runion i pa trabadju di pregason fazedu di manera organizadu. (1 Kor. 14:40) Tanbê, alguns ajudanti di kongregason ta faze pártis na runion Nos vida i nos trabadju di pregason i es ta faze diskursus pa públiku. Un ajudanti di kongregason tanbê pode diziginadu pa djuda un enkaregadu di grupu pa pregason. Ku ténpu, kes ajudanti di kongregason ki sta kualifikadu pode kunpanha un ansion na vizitas di pastoreiu.

6. Kal ki é alguns motivu ki ta pô-nu ta da txeu valor pa trabadju ki kes ajudanti di kongregason ta faze?

⁶ Modi ki kes trabadju ki ajudantis di kongregason ta faze ta djuda kongregason? Un irman na Bulívia, ki txoma Bárbarab fla: “Grasas-a nos ajudantis di kongregason, N ta tra pruvetu di runions. Pamodi trabadjus ki es ta faze, N ta pode kanta, da komentárius, obi diskursus i prende ku vídius i fotus ku dizenhus. Es ta faze tudu kel ki es ta pode pa kes algen ki ta sisti runion xinti suguru i es ta djuda kes ki sta sisti através di xamada ku vídiu. Dipôs di runion, es ta organiza linpéza, es ta djuda na tra kaxa di kontribuison i es ta djuda-nu ten kes publikason ki nu meste. N ten txeu gratidon pa es!” Leila, ki ta mora na Kulónbia i ki se maridu é ansion, fla: “Nha maridu meste di ajuda di kes ajudanti di kongregason pa el pode kunpri se diziginasons. Sen es, el ta staba sénpri okupadu. Pur isu, ami é txeu gratu pa ses zelu i pamodi es sta prontu pa djuda.” Di serteza é kel-li ki bu ta xinti. — 1 Tim. 3:13.

7. Modi ki nu ta mostra gratidon pa kes ajudanti di kongregason? (Odja fotus.)

⁷ Enbóra nu ta xinti txeu gratidon pa kes ajudanti di kongregason, Bíblia ta insentiva-nu pa nu mostra gratidon. (Kol. 3:15) Un ansion di Finlándia ki txoma Kristofer fla kuzê ki el ta faze pa el mostra gratidon. El fla: “N ta manda un karta ô un mensajen ku un testu di Bíblia, N ta fla algun kuza ki kel ajudanti di kongregason fla ô faze pa inkoraja-m ô pamodi ki N ta da valor pa se trabadju.” Paulu ku Jael ki ta mora na Nova Kaledónia, txeu bês ta ora pa kes ajudanti di kongregason. Paulu fla: “Gósi nu sta ta ora txeu pa kes ajudanti di kongregason. Nu ta agradese Jeová pa es i nu ta pidi-l pa el sta ku es i pa el djuda-s.” Jeová ta obi kes orason li i kel-li ta djuda tudu kongregason. — 2 Kor. 1:11.

ANSIONS DI KONGREGASON “TA TRABADJA DURU NA NOS MEIU”

8. Pamodi ki Paulu fla ma kes ansion na ténpu di apóstlus ‘ta trabadjaba duru’? (1 Tesalonisensis 5:12, 13)

⁸ Ansions na ténpu di apóstlus ta trabadjaba duru na kongregason. (Lé 1 Tesalonisensis 5:12, 13; 1 Tim. 5:17) Es ta ‘orientaba’ kongregasons, es ta fazeba runions i djuntu ku kes otu ansion es ta tomaba disizons. Tanbê, es ta ‘konsedjaba’ ses irmons ku irmans ku amor, asi pa es pode kontinuaba fórti na fé. (1 Tes. 2:11, 12; 2 Tim. 4:2) É klaru ki kes ómi li tanbê ta trabadjaba duru pa daba ses família kes kuza ki es mesteba i pa es kontinuaba ku un amizadi fórti ku Jeová. — 1 Tim. 3:2, 4; Titu 1:6-9.

9. Kal ki é alguns responsabilidadi ki ansions na nos ténpu ten?

⁹ Oji ansions ten un vida okupadu. Es é pregadoris. (2 Tim. 4:5) Es ta da un bon izénplu pamodi es ta prega ku zelu, es ta organiza trabadju di pregason na nos tiritóriu i es ta trena-nu pa prega i inxina di manera dretu. Tanbê es é juís. Es ta julga ku mizerikórdia i sen faze diferénsa. Óras ki un algen na kongregason ta faze un pekadu gravi, ansions ta sforsa pa djuda-l rekupera se amizadi ku Jeová. I omésmu ténpu, es ta sforsa pa mante kongregason linpu. (1 Kor. 5:12, 13; Gál. 6:1) Má más inportanti di tudu, ansions é pastoris. (1 Ped. 5:1-3) Es ta faze diskursus ben priparadu ku bazi na Bíblia, es ta sforsa pa konxe tudu algen na kongregason i es ta faze vizitas di pastoreiu. Alén di kes otu diziginason ki ansion ten, tanbê alguns di es ta djuda na faze i konpo Salons di Reinu, es ta organiza kongrésus i es ta trabadja na Kumison di Ligason ku Ospital i na Grupus pa Vizita Duentis. Ansions ta trabadja duru pa nos!

10. Kal ki é alguns motivu ki ta pô-nu ta da txeu valor pa trabadju ki ansions ta faze?

¹⁰ Jeová dja flaba ma pastoris ta ben tomaba kónta di nos. Pur isu, nu ‘ka ta xinti medu más, nen nu ka ta dexa medu toma kónta di nos’. (Jer. 23:4) Un irman di Finlándia, ki txoma Juana, xinti kel-li dipôs ki se mai fika txeu duenti. El fla: “Enbóra é difísil pa mi pâpia di nhas sentimentu ku otus algen, un ansion ki N ka konxeba dretu, tevi txeu paxénxa ku mi, el ora ku mi i el da-m serteza ma Jeová ta ama-m. N ka ta lenbra dretu kuzê ki el fla-m, má N ta lenbra ma N xinti suguru. N ta atxa ma Jeová manda-l pa el djuda-m na óra sértu.” Modi ki ansions na bu kongregason dja djuda-u?

11. Modi ki nu pode mostra ma nu ta da valor pa ansions? (Odja fotus.)

¹¹ Jeová krê pa nu da txeu valor pa ansions “pamodi trabadju ki es ta faze.” (1 Tes. 5:12, 13) Érika, ki ta mora na Finlándia, fla: “Ansions sta prontu pa djuda otus, má kel-li ka krê fla ma es ten txeu ténpu i forsa ô ma es ka ten prubléma na vida. Alvês, sô N ta fla-s: ‘Bu sabe un kuza? Bo é un bon ansion. N krê sô pa bu sabe di kel-li.’” Un irman na Turkia, ki txoma Sara, fla: “Ansions meste pa nu da-s koraji pa es kontinua ta faze ses trabadju. Pur isu, nu pode skrebe-s un karta, konvida-s pa es kume ku nos i pa es sai djuntu ku nos na pregason.” Ten algun ansion ki bo é gratu pa kuzê ki el ta faze na kongregason? Djobe maneras pa bu mostra-l gratidon. — 1 Kor. 16:18.

ENKAREGADUS DI GRUPU DI KONGREGASON TA DA-NU FORSA

12. Ki otus ómi Jizus uza pa da kongregasons forsa na ténpu di apóstlus? (1 Tesalonisensis 2:7, 8)

¹² Jizus Kristu da kongregason otus ómi ki é “sima prezenti” ki ta sirbi di otus manera. El uza ansions na Jiruzalen pa manda Paulu, Barnabé i otus ómi pa viaja pa vizita kongregasons. (Atus 11:22) Pamodi? É pamodi kel mésmu motivu ki el dizigina ajudantis di kongregason i ansions, ki é pa da kongregasons koraji. (Atus 15:40, 41) Kes ómi li ta fazeba txeu sakrifisiu pa es kunpriba ses trabadju. Alvês ti es poi ses vida na prigu pa inxina i inkoraja otus algen. — Lé 1 Tesalonisensis 2:7, 8.

13. Kal ki é alguns responsabilidadi ki enkaregadus di grupu di kongregason ten?

¹³ Enkaregadus di grupu di kongregason ta sta sénpri ta viaja. Alguns ta viaja duránti txeu óra pa vizita kongregasons. Tudu simana, un enkaregadu di grupu di kongregason ta faze txeu diskursu, vizitas di pastoreiu, un runion pa pioneru, un runion pa ansion i runions pa pregason. Es ta pripara diskursus i es ta organiza kes asenbleia ku enkaregadu di grupu di kongregason i kongrésus. Es ta inxina na skólas di pioneru, es ta organiza runions spesial ku pionerus na ses grupu di kongregason i alvês es ta faze otus kuza inportanti i urjenti ki Betel ta manda-s pa es faze.

14. Kal ki é alguns motivu ki ta pô-nu ta da valor pa trabadju ki enkaregadus di grupu di kongregason ta faze?

¹⁴ Modi ki trabadju ki enkaregadus di grupu di kongregason ta faze ta djuda kongregasons? Un irmon na Turkia, fla: “Kada vizita ta motiva-m pa N pasa más ténpu ta djuda nhas irmon ku irmans. Dja N konxe txeu enkaregadu di grupu di kongregason, má nunka ninhun di es faze-m xinti ma es sta okupadu dimás ô ma es ka krê pâpia ku mi.” Juana, ki dja nu papiaba di el antis, sai na pregason ku un enkaregadu di grupu di kongregason, má es ka atxa ningen na kaza. El fla: “Má simé, sénpri N ta ben lenbra di kel dia. Dja tinha poku ténpu ki nhas dôs irman saíba di kaza i N staba ku txeu sodadi di es. Kel enkaregadu di grupu di kongregason da-m koraji i el djuda-m odja ma na sirvisu pa Jeová nen sénpri nu ka ta konsigi sta pértu di nos famílias i amigus. Má na mundu novu nu ta ben ten oportunidadi di pasa ténpu djuntu ku es.” Txeu di nos, ta lenbra di kuzas sima kes-li ki enkaregadus di grupu di kongregason faze pa nos. — Atus 20:37–21:1.

15. (a) Di akordu ku 3 Juan 5-8, modi ki nu pode mostra gratidon pa kes enkaregadu di grupu di kongregason? (Odja fotus.) (b) Pamodi ki nu debe mostra gratidon pa mudjeris di kes irmon ki ta trabadja duru na kongregason, i modi ki nu pode faze kel-li? (Odja kuadru “Lenbra di ses mudjer”.)

¹⁵ Apóstlu Juan insentiva Gaiu pa resebe dretu kes irmon ki ta vizitaba kongregason i pa el ‘djuda-s ku kes kuza ki es mesteba pa ses viajen i fazeba el di un manera ki ta agradaba Deus.’ (Lé 3 Juan 5-8.) Un manera di nu faze kel-li é konvida kes enkaregadu di grupu di kongregason pa es kume ku nos. Otu manera di faze kel-li é óras ki nu ta apoia kes runion pa pregason ki es ta faze duránti vizita. Leila, ki dja nu papiaba di el antis, mostra se gratidon di otus manera. El fla: “N ta ora pa Jeová da-s kes kuza ki es meste. Tanbê, mi ku nha maridu, nu ta skrebe-s karta i nu ta fla-s modi ki ses vizita djuda-nu.” Má, lenbra ma kes enkaregadu di grupu di kongregason é ka super-ómi. Alvês es ta fika duenti, preokupadu dimás i ti mésmu dizanimadu. Talvês, palavras ki bu ta fla ku amor ô un prezenti pikinoti ki bu ta da-s, pode ser un respósta pa un orason ki un enkaregadu di grupu di kongregason faze! — Pro. 12:25.

NU MESTE DI ‘ÓMIS KI É SIMA PREZENTI’

16. Di akordu ku Provérbios 3:27, ki perguntas irmons debe pensa na el?

¹⁶ Na mundu interu, nu meste di más irmons pa ser “sima prezenti”. Si bo é un irmon batizadu, ‘bu ta konsigi djuda’? (Lé Provérbios 3:27.) Bu sta dispostu na sforsa pa bira un ajudanti di kongregason? Si dja bo é un ajudanti di kongregason, bu sta dispostu na sforsa pa bira un ansion?c Bu sta dispostu na faze mudansas na bu vida pa bu bai pa Skóla di Pregadoris di Reinu? Kel skóla li ta ba trena-u i ta ba djuda-u pa Jizus pode uza-u inda más txeu. Si bu sta xinti ma bu ka ta konsigi faze kes kuza li, ora pa Jeová. Pidi se spritu santu pa djuda-u faze kalker diziginason ki bu resebe. — Luk. 11:13; Atus 20:28.

17. Kuzê ki kes irmon ki é “sima prezenti” ta mostra sobri nos Rei Jizus Kristu?

¹⁷ Kes irmon ki Jizus dizigina pa ser “sima prezenti” sta ta mostra ma es sta ta orienta-nu duránti es ténpu di fin. (Mat. 28:20) Nos é txeu gratu pamodi nu ten un Rei ki ta mostra amor i ki gosta di da. El sabe kuzê ki nu meste i el da-nu irmons pa djuda-nu. Pur isu, djobe maneras pa bu mostra ma bu ta da valor pa kes ómi li ki ta trabadja duru. I nunka ka bu skese di agradese Jeová, ki é kel ki ta da “tudu bon prezenti i tudu prezenti perfeitu”. — Tia. 1:17.