STUDU 19
KÁNTIKU 6 Séu ta mostra glória di Jeová
Imita kes anju fiel
‘Nhos lova Jeová, tudu se anjus’. — SALMO 103:20.
ASUNTU PRINSIPAL
Lisons ki nu pode prende ku izénplu di kes anju fiel.
1-2. (a) Di ki manera ki nos é diferenti di anjus? (b) Ki kuzas nu ten igual ku anjus?
DJA ki nos é povu di Jeová, nu ta faze párti di un família xeiu di amor ki ta adora-l. Kel família li ta inklui nos irmons na mundu interu i tanbê milhons di anju. (Dan. 7:9, 10) Óras ki nu ta pensa na anju, talvês nu pode atxa ma es é txeu diferenti di nos. Pur izénplu, Jeová kria anju mutu antis di el kria-nu. (Jó 38:4, 7) Es ten mutu más puder ki nos. I es é más santu i más justu di ki nos, pamodi nos é inperfeitu. — Luk. 9:26.
2 Má, sikrê ku kes diferénsa li, nu ten txeu kuza igual ku es. Pur izénplu, sima anju, nos tanbê nu pode imita kes kualidadi bunitu ki Jeová ten. Tanbê, nu ten liberdadi di toma nos própi disizon. Sima nos, anjus tanbê ten ses própi nómi, es é diferenti di kunpanheru i es ten diziginasons diferenti na sirvisu di Jeová. Tanbê sima anjus, nu meste adora nos Kriador. — 1 Ped. 1:12.
3. Kuzê ki nu pode prende ku izénplu di kes anju fiel?
3 Dja ki nu ten alguns kuza igual ku anjus, ses izénplu pode da-nu koraji i inxina-nu txeu lison inportanti. Na kel studu li, nu sta ben odja modi ki nu pode imita umildadi di kes anju fiel, ses amor pa pesoas, ses kapasidadi di aguenta firmi i sforsu ki es ta faze pa mante kongregason linpu.
ANJUS É UMILDI
4. (a) Modi ki anjus ta mostra umildadi? (b) Pamodi ki anjus é umildi? (Salmo 89:7)
4 Kes anju fiel é umildi. Enbóra es ten txeu spiriénsia, puder i sabedoria, es ta obi ku orientason di Jeová. (Sal. 103:20) Óras ki kes anju ta kunpri kes diziginason ki Jeová ta da-s, nunka es ka ta ingaba di kuzê ki es faze ô uza ses puder pa txoma atenson pa ses kabésa. Es ta faze kel ki Deus manda-s pa es faze, sikrê otus algen nunka ka fika ta sabe di ses nómi.a (Jén. 32:24, 29; 2 Reis 19:35) Es ka ta seta ninhun glória ki debe dadu sô pa Jeová. Pamodi ki kes anju é umildi si? Pamodi es ta ama Jeová i es ten txeu ruspetu pa el. — Lé Salmo 89:7.
5. Modi ki un anju mostra ma el éra umildi kantu el koriji apóstlu Juan? (Odja dizenhu.)
5 Odja un izénplu ki ta mostra ma kes anju é umildi. Pa vólta di anu 96 D.K., un anju ki nu ka sabe se nómi, mostra apóstlu Juan alguns vizon ki ta dexa-nu dimiradu. (Apo. 1:1) Modi ki Juan reaji kantu el tevi kes vizon? El tenta adora kel anju. Má kel anju lial lógu fla-l: “Toma kuidadu! Ka bu faze kel-li! Ami é sô un skravu sima bo i sima bus irmon... Adora Deus!” (Apo. 19:10) Kel anju mostra txeu umildadi! El ka krê resebeba ónra. Lógu el fla Juan pa adora Jeová Deus. Tanbê, kel anju ka ta atxaba ma el éra más inportanti di ki Juan. Enbóra kel anju dja tinha mutu más ténpu di ki Juan ta sirbi Jeová i el tinha mutu más puder di ki Juan, el foi umildi i el fla ma el é un skravu sima Juan. I sikrê el tevi ki koriji Juan, el ka faze-l di manera duru. Na verdadi, el pâpia ku el ku bondadi. Talvês, el da kónta ma Juan staba dimiradu pamodi kes vizon ki el tevi.
Kel anju mostra umildadi kantu el pâpia ku Juan i el koriji-l (Odja parágrafu 5.)
6. Modi ki nu pode imita kes anju ki é umildi?
6 Modi ki nu pode imita kes anju ki é umildi? Sima es, tanbê nu krê sforsa na nos sirvisu pa Jeová sen ingaba di kes kuza ki nu ta faze ô aji sima si nu ten un don spesial. (1 Kor. 4:7) Tanbê, nu ka debe atxa ma nos é más inportanti di ki otus algen pamodi dja nu ten txeu ténpu ta sirbi Jeová ô pamodi nu ten algun priviléjiu ki es ka ten. Na verdadi, kantu más responsabilidadi nu ten, nu debe atxa ma nos é ménus inportanti di ki otus algen. (Luk. 9:48) Sima anjus, nu krê sirbi otus. Nu ka ta tenta poi otus algen ta pensa ma nos é más inportanti di ki es.
7. Modi ki nu ta mostra umildadi óras ki nu ta koriji un algen ô óras ki nu ta da-l un konsedju?
7 Tanbê, nu ta mostra umildadi óras ki nu ta koriji ô nu ta da un irmon ô nos fidju konsedju. Óras ki nu ta da konsedju, talvês nu ten ki ser firmi. Má sima kel anju ki koriji Juan ku bondadi, nu pode ser firmi, sen poi kel algen ki sta ta resebe konsedju ta xinti dizanimadu. Si nu ka ta atxa ma nos é más inportanti ki otus algen, nu ta da konsedju ku bazi na Bíblia di un manera ki ta mostra ruspetu i konpaxon. — Kol. 4:6.
ANJUS TA AMA PESOAS
8. (a) Di akordu ku Lukas 15:10, modi ki anjus ta mostra ses amor pa pesoas? (b) Ki papel inportanti anjus ten na trabadju di pregason? (Odja fotu ku dizenhu.)
8 Kes anju fiel ka ta iginora kuzê ki ta kontise ku pesoas ô atxa ma pesoas é ka inportanti. Envês di kel-li, es ta ama pesoas. Es ta fika kontenti óras ki un algen ki para di sirbi Jeová ta rapende i el ta volta pa Jeová otu bês. Tanbê, es ta fika kontenti óras ki un algen ta prende sobri Jeová i el ta faze mudansa na se vida pa el pode sirbi-L. (Lé Lukas 15:10.) Kes anju tanbê ta djuda-nu óras ki nu ta sta na trabadju di prega notísias sábi di Reinu. (Apo. 14:6) Enbóra es ka ta prega pa pesoas di manera dirétu, es pode orienta-nu pa nu pâpia ku un algen ki krê prende sobri Jeová. É klaru ki nu ka ta pode fla ku serteza ma anjus pô-nu ta pâpia ku un algen. Tanbê, Jeová pode uza otus manera, sima se spritu santu, pa djuda pesoas ô pa orienta ses sérvu. (Atus 16:6, 7) Má simé, el ta uza anjus pa djuda-nu óras ki nu ta prega. Nton, óras ki nu ta prega notísias sábi, nu pode ten tudu serteza ma anjus ta sta la pa djuda-nu. — Odja kuadru “Ses orason respondedu”.b
Un kazal dja tirmina di da tistimunhu ku karinhu. Na kaminhu pa kaza kel irman ta odja un mudjer ki sta parse tristi. Kel irman sabe ma anjus pode orienta-nu pa nu pâpia ku kes algen ki krê sabe verdadi sobri Deus ô obijetivu di vida. El xinti motivadu na konsola kel mudjer. (Odja parágrafu 8.)
9. Modi ki nu pode imita amor ki anjus ten pa pesoas?
9 Modi ki nu pode imita amor ki anjus ten pa pesoas? Óras ki nu ta obi un avizu ma un algen readimitidu, nu pode fika kontenti sima anjus. Nu ta mostra kel irmon ma nu ta ama-l i ma nu sta kontenti pamodi el sta ta sirbi Jeová otu bês. (Luk. 15:4-7; 2 Kor. 2:6-8) Tanbê, nu pode imita anjus óras ki nu ta faze tudu kel ki nu ta pode na trabadju di pregason. (Ecl. 11:6) I sima anjus ta djuda-nu óras ki nu ta prega notísias sábi, nu pode djobe maneras di djuda nos irmons na pregason. Pur izénplu, nu pode faze planu pa trabadja ku kes publikador ki ka ten txeu spiriénsia. Tanbê, nu pode djuda kes irmon ki dja sta algen grandi ô ki sta duenti, asi pa es pode prega notísias sábi.
10. Kuzê ki nu pode prende ku spiriénsia di Sara?
10 Má kuzê ki nu pode faze si nos situason ka ta dexa-nu faze tudu kel ki nu ta gostaba na nos sirvisu pa Jeová? Nu pode ranja manera pa nu trabadja djuntu ku anjus na pregason. Odja izénplu di un irman na Índia, ki txoma Sara.c Dipôs di 20 anu na sirvisu di pioneru, Sara panha un duénsa ki pô-l na kama. Pamodi kel-li, el fika txeu deprimidu. Má, ku ajuda di ses irmon i di leitura di Bíblia ki el ta faze tudu dia, poku-poku Sara ba ta ganha alegria otu bês. É klaru ki el tevi ki djobe novus manera di prega. Dja ki el ka ta pode nen xintaba pa el skrebe karta, el ta daba tistimunhu pa tilifóni. El ta txomaba ses revizita i es ta flaba el di otus algen ki staba interesadu na studa Bíblia. Kal ki foi rezultadu? Na poku ténpu, Sara dja tinha 70 studu di Bíblia! El ka ta pode studaba ku tudu kes algen. Pur isu, el pâpia ku alguns irmon na kongregason pa studa ku alguns di kes studanti. Txeu di kes studanti sta ta sisti runion gósi. Anjus ta fika kontenti di trabadja djuntu ku kes irmon ki sima Sara ta faze tudu kel ki es ta pode na trabadju di pregason!
ANJUS TA AGUENTA FIRMI
11. Modi ki kes anju fiel sta ta aguenta firmi?
11 Kes anju fiel é un bon izénplu na aguenta firmi. Dja ten milharis di anu ki es sta ta aguenta injustisa i maldadi. Es odja Satanás i txeu otus anju, ki sirbiba Deus djuntu ku es, ta rabela kóntra Jeová. (Jén. 3:1; 6:1, 2; Jud. 6) Bíblia ta pâpia di un anju fiel ki tevi txeu dia ta luta ku un anju mau. (Dan. 10:13) Tanbê, désdi ténpu di Adon ku Eva, anjus odja ma é sô poku algen ki skodje sirbi Jeová. Alén di tudu kes kuza li, kes anju ki é lial kontinua ta sirbi Jeová ku alegria i zelu. Es sabe ma na ténpu sértu Deus ta ben kaba ku tudu injustisa.
12. Kuzê ki pode djuda-nu aguenta firmi?
12 Modi ki nu pode aguenta firmi sima anjus? Sima anjus, nu pode odja injustisa ô pasa pa opozison. Má, nu ten tudu serteza ma na ténpu sértu Jeová ta ben kaba ku tudu maldadi. Pur isu, sima kes anju fiel, “ka nu dizisti di faze kel ki é dretu”. (Gál. 6:9) I Deus promete ma el ta djuda-nu aguenta firmi. (1 Kor. 10:13) Nu pode ora ta pidi spritu di Jeová, ki ta djuda-nu ten paxénxa i alegria. (Gál. 5:22; Kol. 1:11) I si nu sta pasa pa opozison? Kunfia na Jeová di tudu bu korason i ka bu xinti medu. Jeová sénpri ta djuda-u i el ta da-u forsa. — Ebr. 13:6.
ANJUS TA DJUDA KONGREGASON MANTE LINPU
13. Ki diziginason inportanti Jeová da anjus duránti es ténpu di fin? (Mateus 13:47-49)
13 Duránti es ténpu di fin, Jeová da anjus un trabadju inportanti. (Lé Mateus 13:47-49.) Milhons di algen na mundu interu sta ta mostra interesi na notísias sábi. Alguns di kes algen li, sta ta faze mudansas na ses vida pa es pode vive di akordu ku leis di Jeová i sirbi-l di manera ki el ta krê. Má otus nau. Anjus diziginadu pa “sipara kes algen mau di kes justu”. Kel-li krê fla ma es diziginadu pa es mante kongregason linpu. Kel-li ka krê fla ma kes algen ki pa algun razon es para di studa Bíblia i ki dexa di sta djuntu ku povu di Jeová ka ta volta pa Jeová más. Tanbê kel-li ka krê fla ma nunka ka ta ben ten prubléma na kongregason. Má, nu pode ten serteza ma anjus sta ta sforsa pa djuda kongregason mante linpu.
14-15. Modi ki nu pode imita anjus i mostra ma nu krê mante kongregason linpu? (Odja fotus.)
14 Modi ki nu pode imita anjus i djuda mante kongregason linpu? Nu meste sforsa txeu pa nu proteje nos amizadi ku Jeová. Nu ta faze kel-li óras ki nu ta skodje amigus ki ta ama-l i nu ka ta faze nada ki pode prujudika nos amizadi ku el. Di kel manera li, nu ta djuda mante kongregason linpu. (Sal. 101:3) Tanbê, nu pode djuda nos irmon kontinua lial pa Jeová. Pur izénplu, kuzê ki nu debe faze si nu sabe ma un irmon faze un pekadu gravi? Pamodi nu ta ama nos irmon, nu ta fla-l ma el meste pâpia ku ansions. Si el ka faze kel-li, nu pode pâpia ku ansions sobri kel asuntu. Nu krê pa nos irmons ki prujudika ses amizadi ku Jeová resebe ajuda lógu! — Tia. 5:14, 15.
15 Infilismenti, alguns algen ki faze un pekadu gravi ten ki tradu di kongregason. Na kes situason li, nu ten ki “para di konvive” ku kel algen.d (1 Kor. 5:9-13) Kel orientason li ta djuda kongregason mante linpu. Tanbê, óras ki nu ka ta konvive ku kes algen ki tradu di kongregason, nu sta ta mostra-s bondadi. Óras ki nu ta obi ku Jeová na kel asuntu li, kel-li pode poi kel algen ta da kónta ma el meste volta pa Jeová. Si el volta pa Jeová, nu ta fika kontenti djuntu ku Jeová i ses anju. — Luk. 15:7.
Kuzê ki nu debe faze si nu fika ta sabe ma un irmon ô irman faze un pekadu gravi? (Odja parágrafu 14.)e
16. Di ki maneras bu krê sforsa pa imita anjus?
16 Jeová da-nu un grandi priviléjiu di prende sobri kes anju fiel i di trabadja djuntu ku es! Nu krê imita ses bon kualidadi, sima ses umildadi, ses amor pa pesoas, ses kapasidadi di aguenta firmi i ses dizeju di mante kongregason linpu. Si nu imita kes anju fiel, nos tanbê nu pode faze párti di família di Jeová pa tudu ténpu.
KÁNTIKU 123 Ser lial i obi ku organizason di Jeová
a Ten milhons i milhons di anju, má é sô nómi di dôs anju ki ta parse na Bíblia: Migel ku Gabriel. — Dan. 12:1; Luk. 1:19.
b Bu pode atxa más spiriénsia na Índice das Publicações da Torre de Vigia na asuntu “Anjos”, na subtéma “orientação angélica (exemplos)”.
c Mudadu alguns nómi.
d Sima splikadu na Rilatóriu di Grupu Enkaregadu di Óbra di 2024, nunbru 2, si un algen ki tradu di kongregason ba sisti runion, publikadoris pode uza ses konsénsia trenadu ku bazi na Bíblia pa disidi si es pode kunprimenta kel algen.
e SPLIKASON DI DIZENHU KU FOTU: Un irman sta ta insentiva se amiga pa ba pâpia ku ansions. Má se amiga ka faze kel-li, pur isu kel irman ba pâpia ku ansions sobri kel asuntu.