Kuzê ki Bíblia ta fla sobri tatuaji?

Respósta di Bíblia

Bíblia ta pâpia di tatuaji sô un bês na Levítico 19:28, ki ta fla: ‘Nhos ka debe faze tatuaji na nhos.’ Deus da kel lei li pa nason di Israel. Kel-li ta mostraba ma es éra diferenti di kes algen ki ta moraba pértu di es pamodi kes algen tinha nómi ô imajis di ses deus na ses korpu. (Deuteronómio 14:2) Nbóra kristons ka ten obrigason di sigi kel lei ki dadu pa Israel, nu meste da txeu atenson pa prinsípiu ki ta sirbi di bazi pa el.

Kristons debe faze tatuaji?

Kes testu li ta djuda-u pensa sobri kel asuntu li:

• ‘Mudjeris debe infeta ses kabésa ku ruspetu’. (1 Timóteo 2:9) Kel prinsípiu li ta sirbi pa mudjer i pa ómi. Nu debe ruspeta sentimentus di otus algen i ka txoma atenson dimás pa nos kabésa.

• Alguns algen ta faze tatuaji pa mostra es é kenha ô ma ningen ka ta manda na es. Otus algen ta faze tatuaji pa mostra ma es ten direitu di faze kel ki es krê ku ses korpu. Má, Bíblia ta fla kristons: ‘Nhos aprizenta nhos korpu sima un sakrifisiu bibu, santu i ki Deus ta seta, ta faze un sirvisu sagradu ku nhos kapasidadi di pensa.’ (Romanos 12:1) Uza bu ‘kapasidadi di pensa’ pa analiza pamodi ki bu krê faze tatuaji. Si é pamodi bu krê sigi móda ô pa mostra ma bu ta faze párti di un grupu, lenbra ma bus sentimentu ta muda, má tatuaji ta fika na bu korpu pa tudu ténpu. Analiza pamodi ki bu krê faze tatuaji, ta djuda-u disidi dretu. — Provérbios 4:7.

• ‘Planus di un algen ki ta sforsa, di sertéza ta ten bons rezultadu, má tudu kes ki ta faze kuzas sen pensa, ta kaba na pobréza.’ (Provérbios 21:5) Txeu bês algen ta disidi faze un tatuaji sen pensa dretu, má kel-la pode traze prublémas na faze amigus i na trabadju. Tanbê tra tatuaji pode kusta txeu dinheru i pode duê txeu. Piskiza i nogósiu di tra tatuaji, ki sta ta kria, ta mostra ma maioria di kes algen ki ta faze tatuaji dipôs ta rapende.