Modi ki fésta di Halloween kumesa?

Respósta di Bíblia

Tudu anu, na dia 31 di otubru txeu algen ta komemora fésta di Halloween, ô Dia di Bruxas. Má, Bíblia ka ta pâpia di kel fésta li. Manera ki kel fésta li kumesa i kes kuza ki ta fazedu na el, ta bai kóntra kel ki Bíblia ta inxina.

Na kel artigu li

• Stória i tradisons di Halloween

• Manera ki fésta di Halloween kumesa ta faze diferénsa?

• Di undi ki ben nómi Halloween?

Stória i tradisons di Halloween

• Samhain: Un ensiklopédiaa ta fla ma Halloween kumesa na es “fésta antigu ki ten aver ku relijion falsu i ki dja ten más di 2 mil anu ki un povu ki ta txomaba séltas ta komemoraba. Duránti kel fésta, kes sélta ta kriditaba ma mortus ta andaba na meiu di kes algen ki sta bibu i ma es podia pasa ténpu ku es.” — Odja kuadru “Di undi ki ben nómi Halloween?”.

• Kuzas ki ta fazedu na fésta di Halloween: Di akordu ku un livru ki ta splika modi ki fésta di Halloween kumesa, alguns di kes sélta ta bistiba sima fantasma pa es “pode inganaba kes spritu mau”, asi pa kes spritu ka prujudikaba es. Tanbê, es ta daba kes spritu kuzas dósi, asi pa es ka fikaba xatiadu.b

  

  Na Europa, pa vólta di anu 500 ti 1500 D.J., kes xéfi di relijion katóliku kumesa ta faze kes mésmu tradison di otus relijion i es insentiva kes algen di ses igreja pa bisti kes ropa di Halloween i bai di kaza en kaza ta pidi prezentis.

• Fantasma, vanpiru, lobizómi, bruxa i zunbi: Tudu kes kuza li sta ligadu ku dimónis. Un livruc ki ta pâpia di fésta di Halloween ta txoma kes kuza li di “kriaturas ki ten puder ki algen normal ka ten”. I tanbê, el ta fla ma es sta “txeu ligadu ku mórti, algen mortu i medu di móre.”

• Bóbra di Halloween: Na Inglatéra, pa vólta di anu 500 ti 1500 D.J., pesoas ta “saíba di pórta en pórta i es ta flaba ma es ta fazeba un orason pa mortus, si kel algen daba es kumida.” Es ta lebaba “lantérnas ki es ta fazeba ku un nabu vaziu i un véla déntu di el. Kel véla ta reprizentaba un alma ki staba prézu na purgatóriu.”d Alguns piskiza ta mostra ma es ta uzaba kel lantérna li pa spantaba dimónis. Na Mérka di nórti, duránti anus 1800, es kumesa ta uza bóbra envês di nabu pamodi éra más fásil di atxa, di linpa i di faze dizenhu na es.

Manera ki fésta di Halloween kumesa ta faze diferénsa?

Sin. Alguns algen ta atxa ma fésta di Halloween é sô un diverson i ma el ka ta prujudika ningen. Má, kes kuza ki pesoas ta faze óras ki es ta komemora fésta di Halloween ta bai kóntra kel ki Bíblia ta inxina. Kel fésta li ten bazi na ensinus falsu sobri mórti i spritus mau, ô dimónis.

Odja modi ki kes testu li ta mostra kuzê ki Deus ta atxa sobri kes krénsa ki sta ligadu ku fésta di Halloween:

• ‘Na nhos meiu ka debe ten ningen ki ta invoka spritus ô algen ki ta pâpia ku mortu.’ — Deuteronómio 18:10-12.

  Kuzê ki kel testu li krê fla: Deus ka ta seta pa nu pâpia ku mortus, nen pa nu finji ma nu sta ta pâpia ku es.

• ‘Mortus ka sabe di más nada’. — Eclesiastes 9:5.

  Kuzê ki kel testu li krê fla: Dja ki mortus ka sabe di nada, es ka ta konsigi pâpia ku kes algun ki sta bibu.

• ‘[Ka] nhos partisipa na nada ki ten aver ku dimónis. Nhos ka pode bebe na kópu di Jeová [Deus] i na kópu di dimónis’. — 1 Coríntios 10:20, 21.

  Kuzê ki kel testu li krê fla: Si nu krê ser amigu di Deus nu ka debe involve ku dimónis.

• ‘Nhos mante firmi kóntra manhas di Diabu; pamodi nos géra, é kóntra kes forsa spritual di mal’. — Efésios 6:11, 12.

  Kuzê ki kel testu li krê fla: Kes algen ki ta adora Deus debe fika lonji di dimónis, envês di finji ma es sta komemora algun kuza ku es.