Modi ki Jizus ta parseba?

Respósta di Bíblia

Ningen ka sabe modi ki Jizus ta parseba, pamodi Bíblia ka ta splika modi ki el éra. Kel-li ta mostra ma aparénsia di Jizus é ka éra kel kuza más inportanti. Má, Bíblia ta da-nu un ideia di modi ki Jizus éra.

Modi ki el éra: Jizus éra judeu, pur isu talvês el ta parseba ku gentis di povu di se mai. (Hebreus 7:14) Ta parse ma Jizus é ka éra txeu diferenti di otus algen. Pur izénplu, un bês el viaji sukundidu di Galilea pa Jiruzalen i ningen ka da kónta ma éra el. (João 7:10, 11) I ta parse ma Jizus ka éra txeu diferenti nen di se disiplus. Un próva di kel-li é ki Judas Iskariótis tevi ki mostra kenha ki éra Jizus na meiu di un monti di algen. Kel-li ta mostra ma el ta parseba ku otus algen. — Mateus 26:47-49.
Kabélu: Ta parse ma Jizus ka tinha kabélu kunpridu pamodi Bíblia ta fla ‘ma kabélu kunpridu é un dizonra pa ómi’. — 1 Coríntios 11:14.
Barba: Jizus tinha barba. El ta sigiba lei di judeus, ki ta flaba ma ómis ka devia ‘faze barba di manera ki es ta disfiguraba el.’ (Levítico 19:27; Gálatas 4:4) Alén di kel-li, Bíblia tanbê ta pâpia sobri barba di Jizus na un profesia sobri sufrimentu ki el ta pasaba pa el. — Isaías 50:6.
Korpu: Di sertéza Jizus éra un algen fórti. El viaja txeu kilómetru apé na se trabadju di pregason. (Mateus 9:35) Dôs bês el bai pa ténplu i el bota kes méza di kes algen ki staba ta bende la, na txon. Tanbê el kóre ku kes animal ki es staba ta bende na ténplu ku un xikóti di kórda. (Lucas 19:45, 46; João 2:14, 15) Un ensiklopédiaa ta fla: “Tudu kel ki nu ta lé sobri [Jizus] na kes Ivanjélhu ta mostra ma el éra un algen fórti i ku bon saúdi.”
Atitudi na róstu: Jizus ta amaba i el ta preokupaba ku otus algen. I di sertéza pesoas ta odjaba kel-li na se róstu. (Mateus 11:28, 29) Algen di tudu tipu ta txigaba na el pa resebe konsolu i pa pidi ajuda. (Lucas 5:12, 13; 7:37, 38) Ti mininus ta xintiba avontádi pértu di Jizus. — Mateus 19:13-15; Marcos 9:35-37.

Stórias inventadu sobri modi ki Jizus ta parseba

Stória inventadu: Alguns algen ta kridita ma Jizus ta parseba ku povu afrikanu, pamodi livru di Apocalipse ta konpara se kabélu ku lan i se pé ku ‘bronzi purifikadu.’ — Apocalipse 1:14, 15, Bíblia na Linguagem de Hoje.

Verdadi: Livru di Apocalipse ta uza txeu palavra pa reprizenta otu kuza. (Apocalipse 1:1) Óras ki livru di Apocalipse ta pâpia di kabélu i pé di Jizus, el ka sta ta splika modi ki Jizus ta parseba kantu ki el staba li na Téra. Envês di kel-li, el sta ta splika alguns di kes kualidadi ki Jizus ta tinha dipôs ki el resusitadu. Apocalipse 1:14 ta fla ma ‘se kabésa i se kabélu éra branku sima lan branku’. Kel testu li ta distaka kor di kabélu di Jizus, envês di se tipu di kabélu. Kel-li é pa mostra ma Jizus é un algen ki ten sabedoria pamodi dja el vive txeu ténpu. — Apocalipse 3:14.

Pé di Jizus ta parseba ‘sima kóbri purifikadu, óras ki el ta límia na fornu’. (Apocalipse 1:15) Róstu di Jizus tanbê ‘éra sima sól óras ki el ta límia ku tudu se forsa.’ (Apocalipse 1:16) Ninhun povu na Téra ka ten kel aparénsia li. Kel-li ta mostra ma kes palavra na Apocalipse, sta ta reprizenta algun kuza. Es ta siginifika ma dipôs ki Jizus resusitadu, el pasa ‘ta mora na lus ki ningen ka ta txiga na el’. — 1 Timóteo 6:16.

Stória inventadu: Jizus éra fraku.

Verdadi: Jizus éra fórti i korajozu. Pur izénplu, kantu un monti di algen ku arma ben prende-l, el ka xinti medu di fla ma éra el ki es staba ta djobe. (João 18:4-8) Di sertéza Jizus tanbê éra fórti pamodi el éra karpinteru, ki é un trabadju ki ta iziji txeu sforsu. — Marcos 6:3.

Nton, pamodi ki Jizus mesteba di ajuda pa karega kel staka di tortura? I pamodi ki el móre antis di kes otu ómi ki staba na se ladu? (Lucas 23:26; João 19:31-33) Poku ténpu antis ki el matadu, se korpu staba tudu pankadiadu i fraku. El pasa un noti interu sen durmi, i un di kes motivu é pamodi el staba txeu preokupadu. (Lucas 22:42-44) Na kel noti kes judeu maltrata-l i na kel otu dia di sédu kes romanu tortura-l. (Mateus 26:67, 68; João 19:1-3) Tudu kel-li poi Jizus ta móre más faxi.

Stória inventadu: Jizus ta staba sénpri ku róstu sériu i tristi.

Verdadi: Jizus ta mostraba kes kualidadi di se Pai, Jeová, di manera perfetu i Bíblia ta fla ma Jeová é un ‘Deus filís.’ (1 Timóteo 1:11; João 14:9) Na verdadi, Jizus ti inxina otus algen modi ki es ta ser filís. (Mateus 5:3-9; Lucas 11:28) Kel-li ta mostra ma Jizus éra un algen filís i otus algen ta odjaba kel-li na se róstu.

a Ensiklopédia di McClintock i Strong, volumi IV, pájina 884.