Kuzê ki Bíblia ta fla sobri faze makiajen i uza jóia?
Respósta di Bíblia
Enbóra Bíblia ka ta pâpia klaru sobri faze makiajen, uza jóia ô infeita di otus manera, el ka ta fla ma é mariadu faze kes kuza li. Má, envês di konsentra na nos aparénsia, Bíblia ta insentiva-nu pa nu infeita “ku un spritu kalmu i brandu”. — 1 Pedru 3:3, 4.
Bíblia ka ta kondena infeita
Kes mudjer fiel ki sta na Bíblia ta infeitaba ses kabésa. Rebeka, ki kaza ku Izaki ki éra fidju di Abraon, ta uzaba un argóla di oru na narís, pulsera di oru, i otus jóia karu ki Abraon manda-l. (Jénezis 24:22, 30, 53) Tanbê, Ester seta “tratamentu di beléza” pa pripara pa ser rainha di Pérsia. (Ester 2:7, 9, 12) Kes tratamentu di beléza li ta inkluiba produtus di beléza ô diferentis tipu di makiajen.
Bíblia ta konpara kuzas dretu ku jóia. Pur izénplu, un algen ki ta da bons konsedju ta konparadu ku ‘un brinku di oru. . . na obidu di un algen ki ta presta atenson’. (Provérbios 25:12) Tanbê, própi Deus konpara manera ki el trata nason di Israel ku un maridu ki ta infeita se mudjer ku pulsera, kolar i brinku. Kes infeitu li poi nason di Israel ‘rei di bunita’. — Ezequiel 16:11-13.
Stórias inventadu sobri faze makiajen i uza jóia
Stória inventadu: Na 1 Pedru 3:3, Bíblia ta kondena ‘kabelu transadu i infeitu di oru’.
Verdadi: Kes otu versiklu ta mostra ma Bíblia ta da más valor pa kel beléza ki nu ten di pa déntu di ki nos aparénsia ô kuzas ki nu ta uza pa infeita. (1 Pedru 3:3-6) Otus párti di Bíblia tanbê ta mostra kel diferénsa li. — 1 Samuel 16:7; Provérbios 11:22; 31:30; 1 Timótiu 2:9, 10.
Stória inventadu: Dja ki rainha Jizabel, ki éra mau, ta pintaba odju ô el ta poba “sónbra na odju”, kel-li ta prova ma faze makiajen é un kuza mariadu. — 2 Reis 9:30, nóta di rodapé.
Verdadi: Jizabel julgadu pa kes kuza mariadu ki el faze, sima fitisaria i mata algen. El ka julgadu pamodi se aparénsia. — 2 Reis 9:7, 22, 36, 37.